(المشكلة بدأت مساء الاتنين الماضى بعد محاولة نفر من الجنجويد التابعين لدكروم نهب عربة تتبع لمعتمد محلية نتيقة .. وحدث تبادل اطلاق نار فى نفس المساء بين عصابة دكروم وقوات الطوف الليلى المكون من كل وحدات الشرطة والجيش .. وبعد ذلك نجح الطوف فى اعتقال افراد عصابة دكروم وتم تحويلهم لمبنى رئاسة جهاز الامن الوطنى المقابل للمجلس التشريعى .. امس بالليل قام دكروم بأخذ قوة مسلحة وذهب لمكاتب جهاز الامن لغرض (تحرير) افراده المعتقلين .. المهم بعد شد وجذب وتهديد (دكروم قال لناس الجهاز انا بشيل ناسى ديل لو بقى عمر البشير زاتو قاعد جوه) تم اطلاق نار من جانب قوة دكروم الكانت اقل فى عددها من قوات الامن المتمركزة فى مقرها .. والهدف كان ارهاب ناس الجهاز .. بعداك قام افراد الجهاز بتبادل اطلاق النار مع الجنجويد وتم قتل معظم قوة دكروم المعاهو وهو برضو انضرب لكنو كان محجب والنار ما اكلتو .. بعداك قام جرى من قدام مكتب الجهاز واحتمى بدكاكين محطة السكة حديد (محطة البورصة) وقاعد يبادلهم اطلاق النار .. لمن زخيرتو كملت تم القاء القبض عليهو .. بعداك قام قاومهم وهو معتقل مما ادى بنائب مدير الجهاز لاصدار اوامر بتصفيتو .. فتم ذبح دكروم على يد افراد من الجهاز .. واخذت جثته للمشرحة .. لمن اهلو عرفو بالموضوع قاموا شالو عرباتهم وجو رئاسة الجهاز واتبادلو مع ناس الجهاز اطلاق النار وقام الجنجويد بقتل ملازم فى جهاز الامن باطلاق النار عليهو جوه عربيتو جنب مبنى وزارة التربية والتعليم .. الكلام ده حوالى الساعه 12 ونص مساء الامس .. اهة بعداك الوضع هدء .. لكن وفى حوالى الساعة 3 ونص صباحا تسلل افراد من الجنجويد لمكاتب جهاز الامن فى حى الامتداد وقاموا باطلاق النار على القوة المتمركزة هناك برضو .. واستمر التبادل حوالى ساعه ونصف لغاية الساعة 5 صباحا .. واستخدمو فيهو اسلحة تقيلة فى حالة اشبه بمطاردة الشوارع .. انسحب الجنجويد بعدها وهدأت الاوضاع والناس اصبحت مذهولة كل زول بيسأل عن تفاصيل الاحداث وفى ناس مشو اماكن عملهم والحذر بيحيط بيهم من كل جانب .. اهة فى المحيط بتاع رئاسة جهاز الامن كانت الرصاص الفارغ بيملأ جنبات الطريق .. وفى مكنة فى طرمبة بتروناس القريبة من المبنى تم احراقها .. ومن المشاهد برضو انو مبانى جهاز الامت الموجوده فى حى الامتداد تم تفريغها بالكامل فالاسر تقريبا ودوهم الخرطوم ومعاهم الضباط الكبار والضباط الصغار تم نقلهم لمكاتب الرئاسة .. وفى ناس بقولوا انو اسر الضباط ودوهم بيت الوالى .. المهم فى حوالى الساعة 12 بدأ اطلاق نار كثيف للغاية من جانب الجنجا وبالاسلحة التقيلة مما اثار الهلع ووخلى الطلبة يهربوا من مدارسهم والوزارات قفلت والبنوك والمؤسسات القريبة من محيط مبنى جهاز الامن .. بعدين اتسعت رقعة العنف وحصلت مطاردات بالكروزرات فى داخل الاحياء تم على اثرها قتل عدد من عناصر الجنجويد كما تم قتل افراد برضو من جهاز الامن ما متأكد منهم كم .. ولا تزال المعارك مستمرة حتى الان وسط انباء عن اغتيال (قرنتية) القائد فى مليشيات الجنجويد على يد افراد الجهاز فى خلال الاشتباكات النهارية .. لغاية هسى الضحايا المدنيين هم 6 منهم تلاتة من موظفى منظمة ورلد فيشن .. وطالب وطفلة ومواطن تانى .. والجرحة عددهم كبير جدا برضو .. دى اخر التطورات وسط ترقب بعودة الاقتتال بعد غروب الشمس .. ربنا يستر بس)
منقول من سودانيزاونلاين
اقول قولي هذا واستغفر الله لي...............
|