معتصم كيفنك
زي ما قلت ليك فوق الموضوع ده موضوع مهم شديد
مما قمنا ونحن صغار .. لقينا نفسنا محاطين بالحصار المجتمعي
الوصاااااااية
كويس انو تكون هناك وصاية من الكبار علي الصغار ولكن ....
بتلقي كبارنا عاوزننا نكوت صورة طبق الاصل منهم
نحن لما كنا قدركم يا ابني كنا بنعمل كيت وكيت وكيت
وكنا بنتصرف علي وزن كيت وكيت وكيت
طيب اوكي يا كبارنا ... نحن ما رافضين نسمعكم ونعمل الاشياء بصورة كويسة .. بس يا ربت لو تدونا ثقتنا في نفسنا وتخلونا نعمل الاشياء وفق رؤيتنا ليها وبمعطيات الزمن الهسي النحن فيه ده ... وما تحصرونا في اطار دمنكم الزماااااان
يمكن انا عندي تجربة مع الشباب والاطفال عندنا في المدينة السكنية الخاصة بسكن العاملين في الشركة الانا شغال فيها ...
الشباب والاطفال قاعدين يعانوا كتيييييير من خلال آباءهم وامهاتهم واعمامهم زملاء آباءهم من خلال الحصار المجتمعي بتاع الوصايا ده
قدرت افتح لي معاهم كوة تفاهم حلوه ... بقعد معاهم وبشاركهم ملماتهم وبلعب مع الاطفال .. ومن خلال اللعب مع الاطفال والنقاشات مع الشباب قدرت اسمع صوتهم .. اعرف تفكيرهم ... وبالتالي كسبت ثقتهم وبقي مافي اي فجوه بيني ما بينهم
وكل حاجه عاوز امررها علبهم بقدر امررها باسلوبهم هم ومن خلال الوعي المشترك بيني ما بينهم
لدرجة إنو في زميل جاني قبل فترة وقال لي ... يا اخوي شكرا ليك ياخ .. اطفالي اتغيروا كتير في تصرفاتهم وبقوا يهتموا بحاجاتهم .. ولما سألتهم وقلت ليهم ماشاء الله بقيتوا تهتموا بملابسكم وشنط مدرستكم وتساعدوا امكم في المطبخ ... الكلام ده اتعلمتوه من وين ...
قالوا لي ... ده عمو ناصر قال لينا كده
والشباب بقوا يرجعوا لي في كل صغيره وكبيره .. ياخي حتي الزول الجكس بجي يحكي لي عن حبيبتو
ههههههه
كيف نقدر نسمع صوتهم
وكيف نقدر نتعامل معاهم من خلال معطيات زمنهم ووعيهم ومفاهيمهم
وما نحاصرهم بوعينا الزماااااااانك داك لنا كنا زيهم صغار وكتين حفروا البحر
شكرا يا باش علي البوست ده ياخ
|