[تماضر حمزة]

المشاركة الأصلية كتبت بواسطة سجمان

كيفي ما فنجان وبن..
كيفي نسمة تمر علي..
شايلة حسك لي كيوف..
نافضة من عيني النعاس..
شايلة من الريد صنوف..
بني دايرو مع الصباح
طلة من زولاً ولوف..
ريحتو أنكه من دعاش
بعدو تتواشلنا زخة..
يالمعبالنا الفتايل..
بي عطر جواها خائل
جود نخاعن فينا بخّة..
عارفة لو الريدة سائل..
ريدي كان عدم الوسائل
ما بتوصلو كم مضخة..
شفتي كيف الريد مورط..
فيني جوة الجوف مقرط..
لا نقص لا مرة نخّ..
ريدي مو محتاج كتابة..
ولا نشر إعلان صبابة..
ريد عنيفا ماهو فخّة..
وشوقي بس لو جاكي مارق..
في الركب طقيع مطارق..
بالحَفِر جوايا سخّ..
وهطي الهم في الشرقرق..
جهزي الروح لي كيوفي..
وقهوتي..
شوق "محوّق"..
وريدي "صوفي"..

من بعد الصباحات والكيوف
الفيها من جيتك طيوف
وأنا عارفة انو الريدة باب
طوّالي عابرنو الضيوف
ف بالله أقعد واستقر!
صعب التردد والوقوف
في سكة العمر البفوت
أحلامنا لازم تستمر!
وأنا غايتو وريت الحلم
بيك بتحقق وشوف
كل ليلة طاريك منتظر