ازيك يا رحاب
اها ح اعملك رسول محبة ساي
سلمي لي على حبوبة شديد برضو
[align=justify]كان نسيت اهم زول طارق حبوكل ياخ و دا زول بيئة عديل . . .
و سر حبوكل – مع اني ما عارف معناها اكزاكلي اللقب ملفوح من بيت الشعر البيئة داك :
محل قديم العهد طالت به الطيل
عفا غير مرتاد،ومر كسرحب
ونخفض طام تنكر واضمحل
وزالت صروف الدهر عنه فأصبحت
على غير سكان،ومن سكن وارتحل
تنطح بالاطلال منه مجلجل،
احم،اذا احمومت سحائبه انسجل
بريح وبرق لاح بين سحائب،
ورعد اذا ما هب هاتفه هطل
فانبت فيه من غشنض وغشنض،
ورونق رند، والصلندد والاسل
وفيه القطا والبوم وابن حبوكل،
وطير القطاط والبلندد والحجل
و الله كان فهمت شئ الحس مكوة الكهرباء و هي شغالة و سلكا عريان . . .
ما علينا . . . و الشئ بالشئ يذكر . . . في سيرة اولاد بركات الراقين اخونا احمد السر و دا مجنون ام كلثوم . و الله لو ما ديمقراطية ساي كان نزعنا منو صفة راقي دي ، الطيب اب راس على علاته شجاع و بصرح بآرائه المشاترة . لكن انا بقطعا في حناني . . . في اللُباد بس يا معلم . . . الكتاوت اصلاً شغلته امتصاص الكهرباء الزائدة
المهم ديمقراطية ساي محترمين ليهو عشقه المجنون لام كلثوم ، و العجب لما يظبت ليك الغرفة 8 الطابق التاني بداخلية ترهاقا - هو و حبيب ذاك الدارفوري الجميل ( اقتصاد ) و حتى حبوكل ( قانون ) اصلاً منحّلين معانا ساي نحن اولاد ( بزنس ) اذ قضى امر صندوق دعم الطلاب المتنزل عن ثورة التعليم العالي بدايات التسعينات ان تتوزعنا المنافي بسياسة فرق جمعهم و فارق بينهم في المضاجع ذاتو . . . تاسيساً على سياسة عامة لتحطيم ( الصنم الجاثم على صدر " الثورة " ) . . . كما ينعق بوم الانقلاب المفتري على الثورة . . .
لكن اصرارنا على تقاسم الاسى و حلمنا ببكرة اجمل من ظروفنا كان كابرنا . . .
المهم عاوز ارصد ثلاث ردود فعل على عشق ام كلثوم و نموذج الحب ( الراقي ) عند احمد السر :
- الموقف السلفي الزاعق المجاهر بعداء أي شكل مائع مستورد ( غير محلي ) و متشبس بانو غناء ام كلثوم ما بخاطب وجداننا و دا تيار موغل في المحلية . . . لكن سمته الاساسية الشجاعة في طرح استهجانه لاستغراق الشباب في مياصة زي دي .
بالمناسبة عمك نيوتن دا استعجل ساي في صياغة قانون الجاذبية دا . . . ياخ في حاجات كدا بتشد للخلف ما لي اتجاه الارض . و لو كانو جمبوا ناس الطيب عبد الله ديل ما كان تفاحتو دي وقعت لي تحت . و هو ذاتو كان ضاق الجوع و جرب البطن التفوفي ما كان عمل نظرية من الاساس كان ضربا و مسح خشمو بكم قميصو - ان وجد - . " لو ما كان لابس على موضة الايام ديك على غرار طرزان "
- تيار الوسط - ماسك العصاية من النص - و شغال بتقية " الفضيحة و السترة متباريات " و لسان حالو شغال :
ما قادر اقول انا ما قادر اصرّح .
لكن مغيوظ و ما قادر يستوعب قصة ام كلثوم دي و لا نفاق " عشرة على عشرة يا ست " . . . كمان جابت ليها تقفيل نمر عديل ؟
و غنانا ما بجيب مجموع يدخلوا الجامعة ؟ . . . حنية اهلنا الشوايقة الكان سوا غناهم في عود كان خدّر ملا الواطة . . . عثمان حسين المعاه فرهد شباب الحب و رفّ علي جناح اخضر . . . و ابو اللمين العاوز يقيف وسط البلد و يهتف : بريدك يا صباح عمري . . . وردي الناضح بالحب القدر الكون دا كلو و اكتر بي كتير و بالثورة .. . الالتقط قفازها سيدنا المصطفى و صعد بيها مشارف بكرة الجميل و استشرف باكر الضواي لوطن اجمل للحب . . .
ملاحظين انو التيار دا اوسع . . . في الحقيقة هو مجموعة تيارات ، و اقرب لجبهة وطنية اعلاها صوتاً تيار يساري كان منفتح اكتر من على فضاءنا العربي . . . فيروز ماجدة الرومي جوليا بطرس . . . مارسيل خليفة و موغل في الانفتاح على الآخر و الاكثر تقدماً في طريق الحداثة عموماً .
- التيار المقلد و متماهي في النموذج الام كلثومي و سادر في تبيئته و توطينه على ارض واقع بائس و ممكن تقول سودنة النموذج الام كلثومي عديل كدا . . . و التيار دا ممكن نسميه التيار الحبوكلي الاستراتيجي . . .
ياخ مرة ظبتناهو ليك منضف الاوضة " قاشيها و ما فضل ليهو الا يرشها " و إضاءة خافتة و ال" النت " او الند كما يسميه العوام عابق ارجاء المكان مخالط ريحة الحيطان العتيقة للمبنى الاثري الآيل للسقوط كما مشت بذلك الاشاعة على رجليها و كذّبها صموده في زلزال لاحق في منتصف التسعينات ، مبنى " ترهاقا " او " تهارقا " كما مكتوب على جدران سفرته المشهورة بطبقها المميز " المادة الصفراء " التي احتار فيها خبراء الاغذية . و سبحان الله مؤشرات تزوير الكيزان من الوكت داك موجودة قال ايه كاتبين بره عليها " داخلية الشهيد ابو دجانة " التقول بنوها هم ؟ عليك امان الله سنتين و جوا زوروا انتخابات الاتحاد ذاتا . . ديل زيفوا طعم ليمون البلاد ؟!!
المبنى دا هدية " الجمعية الهندسية " لزملاءهم اللاحقين كان يعاني من طفح مجاري مستمر اذكر دكتور الانف و الاذن و الحنجرة لما عرف اني ساكن ترهاقا قال لي : عندك تضخم في الجيوب الانفية بيحتاج عملية لكن احسن تاجلها لحدي ما تتخرج ! . . .
كونت رأي في الدكتور دا من جملة تفاصيل . . . اول حاجة اتعامل معي كموديل و بحرك راسي من الشمال لليمن زي كأني مروحة تربيزة . . . النور المركبة في جبهته عامل زي عمال المناجم في روسيا دا . . . و تعقيبوا على ردي على السؤال الاثير : بتسجر ؟ تتوقعوا اجابتي كانت شنو ؟ لو قلت آي . . . كان اخدت محاضرة و انو العلاج توقف السجاير و ما عندك حاجة و زيارتك تطلع بيش . . . اخترت النفي طبعاً للضمان كدا و ( لا ) ذاتا حرفين و ( نعم ) تلات حروف و انا زول عيان و مرهق ذاتو و العيان مرخوص . . . خلونا نتسقط الرخص ياخ . جاني ردو صادم جداً و مكرّفس للمشعار . . . اصلوا ما راعى مشاعري كمريض : بتكضب مالك ريحتك كلها سجار ! طيب السؤال لشنو انت دكتور و لا حلاق ؟ مالك ثرثار كدا يعني لازم تحرجونا يعني عشان مرضانين ؟ . . . و الله من الاول عرفتك ما نصيح ؟ . . .
اعتقادي بعدم نصاحته هو الخلاني ما افهم قصدو في تاخير العملية . . . لكن ما اظنو الزول دا مجنون . . .
الثرثار انا دا و الله ، نرجع لغرفتنا او محراب حبوكل المعبق باريج النت و رائحة الطفح و الرطوبة الرسمت سيرة بؤسها على المراتب و اللحافات في شكل خرائط عوالم غريبة خيالتنا تدرك بعضها و تتقاصر هامات تخميننا لبعض عوالمنا المحكية بؤس و قتامة على سطح اللحافات و الحيطان العارية بعد تقشر البويه التي كانت تستر عورة الاسمنت .
في جو زي دا كان ناقص الموسيقى . . . مش ناقصة انتو نسيتو اصلاً نحن ( بصدد ) * الغناء و تبيئة تجربة مستوردة ؟ تحديداً لكلثمة ام الغناء السوداني . . .
و صاحبنا حبوكل منسدح على السرير التحتاني من السرير ( دبل بيد ) و سارح في عوالم ما بشوفوها بالعين المجردة لانو كان مغمض عيونوا الاتنين و يده بتتحرك في اتجاهات لا تشبهه جغرافيتنا و محكومة وفق قانونها الخاص و الانفعال واضح عليه بعالموا دا . . . بدلك عليه مراقبة قفصه الصدري و تسارع دقات مكينة من خلفه .
و الموسيقى . . . تتري
و مصطفى مضوي يلعلع :
الوليد الضيف ضيعتنوا كيف ؟
----------------------
* لمن طلل بين الجدية والجبل - جندح بن حجر ( امرؤ القيس ) تغنت بها هيام يونس
* بصدد دي كان مكرهنا بيها عبد الهادي او سوري دكتور عبد الهادي . . . وقتها كان عبد الهادي ساي و كانه كان بميز نفسو مننا نحنا الح نكتفي ببكالوريوس الله و الرسول دا .[/align]
|