لطائف المنتديات (منقول)
وجدت حوار شعري جميل جدا يتكلم عن منطقة (قبقبة) التي يذهب لها الناس للدهب..
وكان التبادل والسجال بين...
ابن القمبرات: نزار سراج احمد الحاج
و ود السويقيات:جعفر حسن العطا الملقب بـ(ودالمادح او الطيار)...
(وهي قصائد طويلة)
اتمني ان تنال اعجابكم..
في البدء قال نزار سراج احمد...
يالدهب النفيس الباهي لونك وغالي
شارد فكري فوقك وفيك شاغل بالي
جيتك والعشم فوقك تتم امالي
ياخي اديني منك بالحجار وتسالي
قبقبة نفسي ازورا وليها ناوي القومة
بسبب الدهب عينينا جافت نوما
يالله الكريم ادينا بوكس وقومة
قبقبة ماشي عليها حتي بكرعي
اجميل من اقامة وشقة في المنشية
يالدهب المتبر ليك مني تحية
يااالله الكريم اطنان بالكيلو وخلية
مفقود السنين الليلة جات اخبارو
راجع بجهاز الليلة عاد لديارو
خلاهو السفر،شغلو الدهب واخبارو
راجع للعدس وكتر غبارو
والحلال(القرى) عدمت شباب ورجالا
بسبب الدهب صبحت نفوسا اشغالا
سافروا قبقبة قصدو السفوح وجبالا
والبيت الكبير الليلة حارسو حتالا
تسرح بالجهاز وتمني نفسك كيلو
تمسح في الارض بفد اشارة تشيلو
ان حظك كعب واتمادي في بوهديلو
تلعن ابو الدهب ..لابو البجي وبمشيلو
مزعج يا اب كدر غرابك ان زم
فالح في الحديد فوق الدهب مانم
طاط ما طاط تكورك وتاني مابهتم
انعل ابو صناعتك ماكذب من سم
والداير الدهب يقع الجهاز الجيبي (جهاز الكشف GBX)
افضل مكتشف ياهو البطفي لهيبي
يارب العباد اتمني بيهو تنقيبي
والقى لي خلية تزيد علي ترطيبي
قبقة مرة وقاسية الا مابتتملا
فيها دهب يحير لا كمل ولا قل
تزهج منها وترجع تجي تتدلا
زي تمر الفكي وباقة عسل عوض الله
والعجب العجيب العيشة فيها تحير
الوش بالوسخ يصبح دشن ومتغير
احلام المنام احلاها تصبح نير
تحلم تستحم وللبستو تغير
ياحليل اللحوم بالدمع مرشوشة
فارقنا النعيم ومشينا دار الدوشة
ناكل في السخين قرشنا قرقوشا
قرقوشا قسما يجرح حشي الحنكوشة
فيها حقيقة مرة بقولا من جوايا
اومك في نهارك وشمسك الشواية
لومك في سمومك ودا البهد قوايا
والعدس البمحن وبجيب لوايا
ان حظك سمح خلية غليدة
تفرح وتنبسط روحك تزيد تنشيدا
وان حظك كعب مابتلقي فيها حديدة
ترجع بالزعل حمي وعدم توريدا
ويارب العباد ارزق جميع من زارا
يركب ليلي علوي ويبني بيتو عمارة
في مسك الختام انا ود ملوك السارا
ود المك سراج ان غفا مابتجارا
|