[imported_الأغبش]

عزو يالذيذ مشاقين ياراجل ..
غايو بتذكرناو في حاجات تتور علينا الحنين ..
طبعاً كانت هوايتي الأولي مناصفة مع الكورة العجلات ..بديت من مقاس 24 وانت ماشي .. ابوي كان رافض تماما فكرة يشتري لي عجلة دي عشان في واحد في حلتنا وقع من عجلة واتعوق شديد .. شوية شوية اقنعتو انو اشتريها براي ..وقد كان ..اول عجلة عبارة عن كدر ولساتك وميزان ومقعد ... شوية شوية لحدي ما وصلنا الفوينكس الماخمج ..بعتها عشان ادفع بيها مصاريف سنه أولي في الجامعة ...

كنا شلة مكونة من قرابة ال15 فرد ..نقيم منافسات السباق والمشاوير الطويلة للقري المجاورة ..ومرات نسوقها من الدلالة في السوق الشعبي امدرمان حتي الفكي هاشم ..
ألذ مافيها الحوامه في الزقاقات الضيقة نخت العجلة اليها الجرس الدوار الكبير داك في المقدمة وباقي الجيش وراهو ... يوم واحد فينا طقش ليهو حاجة كبيرة رقدت شهور ..

أشهر عجلاتي في بحري كان دكان عمك عز الدين قريب من شارع المزاد ..موجود حتي اليوم ..

يوم انقلاب حكومة الإنقاذ وصلنا حتي كوبري شمبات ونحن في طريقنا للدلالة ورجعونا ... عشان كده الحكومة دي بتذكرني العجلة طوالي



عزو ..الساعاتي برضو في طريقو للإنقراض مع ظهور الموبايلات ...