بلد نفاج
و كان البلد بهتف
عما قريب
الهمبريب بفتح شبابيك الحبيب
يا محمد احمد
وتستجم
والحال يطيب
ومحمد احمد يا بلد
تعبان يطقطق في مفاصل الجوع
يضاري دموعو من فقرو
يتمغى ويمد رجليه
لا طالن امانيهو
ولا لحقن لحاف صبرو
ينوم واقف برا الشدره
جذور منشره في الخاطر
اكان تبقي الارض قدرو
يشيل الليل مناحات هم
يتنهف ودمعو يسيل
يستف كل مواعينو
ولا طلعت شموس فجرو
ولسه البلد بهتف
يا محمد احمد قوم اقيف
حتحت هدومك من هواميق الرصيف
الطير رجع بالحسره بي نبل المواجع
بالنزيف
والنيل يبلل في حلوق الناس
يتب مرات يمين يهبر شمال
عطشان وما لاقيلو قيف
يا محمد احمد قوم اقيف
اتوضا من موية المشيش
واكرف دعاشات الخريف
وازرع تقانتك بالحجي موال وهيف
وانده شيوخك
سو مدد مدد مدد
قول يا لطيف
تلقي الزرعتو قبيل حجي وموال وهيف
بتق نبت
ونبت معاو مليون سؤال
لي متين وكيف ؟؟؟
لي متين ندسو وشينا في بطن الارض
ووشينا كان صافي ونضيف؟؟؟
ولي متين نكون زي البكم؟؟؟
وابونا علمنا الكلام
ده ابونا كان زولا حصيف
يا محمد احمد قوم اقيف
وحتحت هدومك من هواميق الرصيف
|
