بوست للمثقفين فقط: وضعية ترفو حكايا لتُروى - نصوص قصصية لصلاح الزين

[أبوبكر عباس]

أحجز وأدفع للحصول على نسخة

[أبوبكر عباس]

[خال فاطنة]

بوست للمثقفين فقط

سلام الحبيب بابكر

نرجو شاكرين تعريف كلمة مثقف تعريف دقيق

عشان نعرف نحن جوة ولّ برا
المهم

لحين الطردة المتوقعة بعد التعريف ياهو قاعدين

[أبوبكر عباس]

المشاركة الأصلية كتبت بواسطة خال فاطنة

نرجو شاكرين تعريف كلمة مثقف تعريف دقيق عشان نعرف نحن جوة ولّ برا

السيد الأمين، سلام
ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.
أنا شخصيا فهمت وحبيت الكتاب بعد القراءة السادسة!

[قيس شحاتة]

المشاركة الأصلية كتبت بواسطة بابكر عباس

أنا شخصيا فهمت وحبيت الكتاب بعد القراءة السادسة!

كان كدي، إنت مثقف؛ لكن تعبان شديد

عليك الله يا دكتور، لو ما عندي حق أخش هنا، ما تعفي لي.

[سارة]

انا غايتو دخلت بعد شفت شحتة وخال فاطنة
يعنى بكدا انا معاهم برة برة جوة جوة


بس عليم الله عندى مزاج فى الكتاب
فانا احرص على اقتناء الكتب
وهى عادة قديمة

[أبوبكر عباس]

المشاركة الأصلية كتبت بواسطة قيس الصديق شحاته

عليك الله يا دكتور، لو ما عندي حق أخش هنا، ما تعفي لي.

الأيام أيام إنتخابات وأنا ح أنافس لنا في المجلس، عشان كدا؛ عفو شامل مع شاي سادة

[أبوبكر عباس]

المشاركة الأصلية كتبت بواسطة سارة

بس عليم الله عندى مزاج فى الكتاب
فانا احرص على اقتناء الكتب
وهى عادة قديمة

مثقفة بفلوسها

سلام يا سارا

[الرشيد اسماعيل محمود]

المشاركة الأصلية كتبت بواسطة بابكر عباس

السيد الأمين، سلام
ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.
أنا شخصيا فهمت وحبيت الكتاب بعد القراءة السادسة!

عليك الله حاول أقراهو تاني مرّتين، وواحدة برضو، وخليك مستعجل.
من الإهداء؛ الراجل دة شكلو كتّاب، والكتاب يستاهل تدفرو لينا علي وجه السّرعة

[شهرزاد]

أنا غايتوا ح أقراهو عشان أحصل علي لقب مثقفة ..
أحجز لي نسخة ..

[أبوبكر عباس]

إتصلت بالناشر* وقال لي: عشان خاطر الرشيد وشهرزاد المثقفين ديل؛ نزل ليهم القصة الأولى كاملة وخليك من موضوع "الست"، وأعمل تحذير للقارئ غير المثقف قول ليهو:
"لو ما فاطر أوعة تخاطر"
فالكتاب لا يقل عن زهرة الغرق في متعة فك شفرة مآلات العبارة (مبسوط لكوني إستطعت إستعمال كلمة مآلات دي!).
ــــــــــــــــــــــــــــــــــــــــــــــــــ ــــــ
*الناشر ماخد حقوق التصرف الكاملة في الكتاب.

[أبوبكر عباس]

عادي يا أُستاذ مٌبِر، ممكن تقشر بالكتاب دا، في فورأول (أكبر تجمع للمثقفين السودانيين). ولو ربنا خطاك حسن موسى، ما في زول بسألك يقول ليك دا شنو دا، ولّ دا، مقصود بيهو شنو؟! إستغل فرصة غيابو* دي.

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
* والله، أنا من شدّة ما حقّار، لمان ألقى مداخلة لحسن موسى جديدة في بوست، بقرأ أول شئ مداخلة حسن موسى، حتى أرجع أشوف موضوع البوست شنو!

كلما كبر المثقف كلما زادت سطوته.

[الجيلى أحمد]

الغريبة يابابكر كنت ولاذلت عندى فكرة بوست حول فكرة الكلام بتاع (العهد والوفاء) الحايم دا, لكن لقيتك مابتقصر كعادة يصعب عدم تكرارها,جايب سيرة أصحابك فى فور أول
______
ياأخى طلَعلتا ميتنو مبر دا, (يامبر واك أنا العرفتك بيهم , يامبر واك من زمنى العرفتهم بيك ...واغ واغ واغ)
يااما هو يجيك بى هنا ,أو تقعد انت بى جاى
شكلك ماحلو وانت مشلهت

[أبوبكر عباس]

المشاركة الأصلية كتبت بواسطة الجيلى أحمد

الغريبة يابابكر كنت ولاذلت عندى فكرة بوست حول فكرة الكلام بتاع (العهد والوفاء) الحايم دا, لكن لقيتك مابتقصر كعادة يصعب عدم تكرارها,جايب سيرة أصحابك فى فور أول
______
ياأخى طلَعلتا ميتنو مبر دا, (يامبر واك أنا العرفتك بيهم , يامبر واك من زمنى العرفتهم بيك ...واغ واغ واغ)
يااما هو يجيك بى هنا ,أو تقعد انت بى جاى
شكلك ماحلو وانت مشلهت

يا زول، أنا ما سبب في الكاروشة البتجيبا ليك السيرة دي! وبعدين عنوان البوست دا، إتا ما شفتو ولّ شنو؟ يا عادي!

[أبوبكر عباس]

المشاركة الأصلية كتبت بواسطة الجيلى أحمد

يااما هو يجيك بى هنا ,أو تقعد انت بى جاى

زمان عمي رسل برقية من كمير العوضية (غرب شندي) لأبوي بمدني (معروفة) قال ليهو فيها:
"يا نجيكم، يا نجيكم، فأختاروا؟"