جهاز الامن والمخابرات يستدعي الشاعر الكبير أزهرى محمد على ويمنعه من مغادرة البلاد ....علي خلفية:

[Hassan Farah]

جهاز الامن والمخابرات يستدعي الشاعر الكبير أزهرى محمد على ويمنعه من مغادرة البلاد ....علي خلفية:
خمسة سنين كمان لي شنو
خمسة سنين كمان لي شنو
نشيلك هم على هم القراية امدق
ودي لا بتحوق ولا بتلحق
تلبس عورة الباطل تياب الحق
كفاك أرحل دي خمسة
ولا بتسوي زلط
رقصت على الخماسي سنين
أمانه عليك كم في الخط
خطاوي على الوجع عديتا
في السكه البديتا غلط
شعائر اقمتها وصليتا
لا نزلت عليك خيرات
ولا اخضرت مشاعرك قط
رهاف قامو الولاد الهجعة
ولطاف مرقن بنات الوجعة
لعبن حجلة جمب الشط
وقعدن يشخبطن في الرجعة
ورسمن في الغمام لوحات
ملامح لى وطن طيب ونكران ذات
وبت في الغيمة بتمشط
براحات الغنا الواسعات
وكتبن في الهوا وشطبن
تلات تسعات 999
اتمغى البحر في الميعة
واتحين سحاب العينة
في لهات التراب نقط
مرابي وعسكري منقط
منقط ومن هنا منقط
وناعم والكلام طاعم
يبين تحت التبن أرقط
ينوم فوق الجرح منحل
ويقوم زي الحبن منحل
دحين يا ورطة كيف الحل
كيف الحل وكم في الخط ؟
مفخخ وخطبتو الملغومة
تشيلا تصلحا الحيكومة
تصدق كضبتا الموهومة
تزيد في غيها المنحط
تزيد في غينا المنحط
غيبوبة دوار السلطة
والهوس العلينا هبط
سكرانا المنابر طينة
سكرانه المدائن هايصة
وأشباح القرى المسكينة
سكران التراب والموية
والسهله ودواهي الغابة
وأحزاب الهوى الكضابة
والحيكومة وقفت لط
وقف خاطر البلد مجروح
وقفنا على الجرح غافلين
نحن سلالة ﺍﻟﻮﺍطة وولاد الطين
بقينا على خشاش الارض
محل قامت صلاة الغلة نتوضى
نشوفك في المنافي رهاب
تلاويح ايدك البضة
وداعا يا حبيب الروح
وداع والسامر انفض
مرقنا على مدائن التيه خفاف
كان نابا كان نرضى
مرقنا ودمنا اتفرق
ولد شلناهو للأيام
مسك شارع المطار شرق
لمحناو زي خبر عاجل
وزي رفة حمام زاجل
ويا منسلي من ضلف
الضلام في الليل
تعاااال بالباب أكان راجل
واركز واوعى تدرق
من القبلي السحابو ربط
من العبادي يوم ينصر
في وش السما وينمط
وكم في الخط
نحن بنحب شاي الصباح
الشقلة والديم والجخيس
والثورة وامبدة السبيل بالعكسي
ومحجوب الشريف
ال بالمكارم مكسي
ادانا الطريق الما عتر في يخسي
انت رجفت واتحسست
وضع الكرسي
ونحن نزفنا مهر الثورة
بين البوت وضهر البوكسي
نحن هتفنا يااااا ليل
السجون اسمعنا
ياخي اسمعنا
ليه ايش معنى ؟؟
نحن مرقنا قدمنا الشعوب الحرة
في درب النضال ورجعنا
ونحن نزلنا لي اخر
درك وطلعنا
اجمل من ملائكة رحمة
فجينا الضلام ولعنا
قلنا الجاتنا في وليداتنا
جاتنا ان شاء الله تنفعنا
نحن بكينا يوم
بيت القزاز جدعنا
لا ادتنا الشوارع عين
لا صابت نفوسنا اللعنة
علمناك عناق اللهفة
والحرف البراود المعنى
علمنا الثبات والوقفة
وعلم نصلك المسنون
يعلم فجة الطعنة
وكم في الخط
مشينا على الجرح سيرة
وكل ما فحط الدفار
تطير من العيار طلقة
وتطرق حسها مهيرة
ينمل جلدك المدبوغ
على العلقة
سياط العسكري الطيرة
ونحن على الدوام نغفر
نسامح وخيرا في غيرا
سماحات الزمان الفات
زمان الدنيا بى خيرا
رزاز الونسة والضحكات
مطيرة تزفها مطيرة
على شديرة الغنا الحتت
خلاس تاني المطر شالت
خلاس تاني المطر ختت
وبركة وخير وبركة أخير
براك يالاهي سميتا
براك فتحتها النيران
على الناس الطلع زيتا
كمل رايا وفلت من ايدا
راس خيتا
على الهملة وقطعة الراس
وقع فوق راسا راس بيتا
وهيا ريتا لو شافوك
في النايبات مشمر في
الوحل جيتا
وجيدا يا مطر جيتا
وجيدليها البلاد بالجاتا
جلابة الجن والجنادب
والجراد وجلجلة الجلالات
والجنود والجنجويد
نبكي ونعيد كل السماحات
كل السماحات روحت
خلتنا لى باس الحديد
كل المصائب في أمان
هل من مزيد
هل من بوادر رجعة
للماضي البعيد ؟؟؟؟؟
هل من قصائد أو مكائد
أو مصائد تاني للدقشو الصعيد
وياااااااا بلد الكرام
طااااااالت عليك الكرسة
والجوك في الضلام
سرقوا المباهج خلسة
تبكي وتستغيث لا زول
سمع لا حسا
نتاح الضرس
الما بتحلو الجرسة
يديك السهر يقعد يتاورك لسة
تاريهو الوجع بين اللسان واللثة
والداير القلع احسن تلخلخو هسة
قبل الطير تقوم
يا الما بتعرف الخسة
في الطابور تنود
وتدقس تنوم في الحصة
غاااايتو على العموم
خلست خلاس القصة
ماااااات بطل الفلم
وطلعت حبيبتو اللصة
وطلعت شعاراتكم وهم
وطلعت حكاياتكم ملوص
فايرين تعوسو بلا فهم
ساسقتو بين ساسا ويسوس
فقرا ولصوص
ساقونا لى اخر درك
وباعوونا بى وسخ الفلوس
كم من نفوس خانت نفوس
بيناتا قاسم مشترك
صلت على نار المجوس
حاولنا نتحاشى الشرك
ووقعنا في فخ النصوص
قاتلنا في غير معترك
ودهستنا غارات البسوس
وأمانة عليك كم في الخط
وأمانة عليك يا بلد
السماح سامحيني
مجبور مرقتك من دماي
لليل بحهجهك السقط
ريح العوارض تلفحك
ومن ايدي تمشي سقط لقط
وخمسة سنين كمان في شنو ؟؟

ورئيسه يحتفل مع بناته بيوم الاب

YouTube

[زول الله]

صباح الخير ياخال
الخبر دا قديم
فعلا تم استدعائه لمباني الأمن واستجوابه
والقصيدة تم بثها في عدد من القنوات من بينها النيل الازرق
والاستاذ ازهري كان هنا في الرياض قبل شهر تقريباً وانا شاركت في تكريمه
لذلك لا اعتقد انو تم منعه من السفر








اقول قولي هذا واستغفرالله لي.......................

[Hassan Farah]

نيابة أمن الدولة تمنع الدكتور أمين مكي مدني من السفر


رئيس مبادرة المجتمع المدني، والقيادي البارز بقوى نداء السودان،
05-04-2015 03:08 PM
بسم الله الرحمن الرحيم

حظر سفر الدكتور أمين مكي مدني دليل على العسف والعشوائية

قامت سلطات المطار فجر اليوم بحظر الدكتور أمين مكي مدني رئيس مبادرة المجتمع المدني، والقيادي البارز بقوى نداء السودان، من السفر إلى القاهرة، بحجة أنه مفروض عليه حظر من نيابة أمن الدولة بموجب البلاغ الموجه ضده.

وأفادت سلطات المطار الدكتور أمين بأنه محظور منذ تاريخ من 23 ديسمبر 2014م من قبل نيابة أمن الدولة. وعلّق الدكتور على الخطوة قائلاً إن وزير العدل قام بإلغاء البلاغ المعني ووقف جميع الإجراءات المترتبة عليه وبناء على ذلك تم إطلاق سراحه هو وزميليه وكان على النيابة أن تتصرف وتلغي جميع الأوامر، قال دكتور أمين: (قرار وزير العدل بموجب المادة 58 (1) من قانون الإجراءات الجنائية معناها إلغاء الدعوى الجنائية ووقف جميع الإجراءات المترتبة عليها بما فيها من حبس وحجز ممتلكات ومنع سفر وعدم مغادرة العاصمة، وغيرها من إجراءات، ومعناه أنه يتوجب بعد قرار وزير العدل أن يتوقف هذا القرار فوراً، وبالتالي كان عليهم أن يخطروا الجهات المعنية بوقف تلك الإجراءات تماماً، فكيف يمكن أن أطالب كما فعلوا بأن أسال وأتابع معهم لدى كل خطوة أخطوها؟)

وبالرغم من استبقاء دكتور أمين لساعات في مبنى نيابة أمن الدولة انتظاراً لخطاب رسمي يؤكد إخلاء طرفه والسماح له بالسفر، إلا أنه في النهاية لم يسلم الخطاب المطلوب، وإن كان تلقى وعداً من مسئولي النيابة أنه سوف يسمح له بالسفر. وتبقى الحادثة دليلاً على عسف الأمن وعشوائية نيابة أمن الدولة.



إعلام نداء السودان

http://www.alrakoba.net/news-action-show-id-193049.htm