أمونة مشلعيب الشوق..
أمونة.. مشلعيب الشوق
وحُقْ الهوى الممدود سمات
سألتك..
يا.. محريبة الوجع الخرافي
الفيني قاسم..
نفسي حد الإشتهى
وميقِّن فيني عطر الأمسيات
سألت:
يا.. مْتَمِّرة العرق النزف
فيني وكتين التباريح جات
لمن تطل موية بروقك
واستعين بي لحظة من
جنس الوهج..
إني الأنا
المارق مِنَفِّضْ
إيدي من مطرة لقاك
بشوفا صورتك في الرزاز
وكتين بروق الليل أبن
للهجعة..
مابيات الرقاد
أنْزِل ألِقِّط المطرة البقت
سيرتك معاها
نقط.. نقط
والقاكِ ما بين اليفط
رموز..
لي رحلة الطل والدعاش
في زمن
فوقو الأرض..
يابسة ومهضلمة..
من عِرِقْ
ضرع السما الساكب
حليب البهجة في
كل النبات
أمونة يا كل البنات
يا جاية من
طعم الغنا
مُسداري هاك
دِرِّي لبنك في العروق
كان الْحَقَ الزمن الفضل
باقيلي من
عُمْرِ اشْتِهَاكْ
خليها سكلبة الحروف
أنا الباقيلي إيه؟؟
أفْتِل حِبالي وامدَّها
كَمَّلْتَ عاشميق الصبر
وما اظنِّي مارق مِنَّها
ولِليلِي صبحك ما دخل
ولا انبلج
في الليل ضياك
مدي إيديك للفروض
الجايا من تالاي غنا
وابقي ماسحة على الجبيرة
حتى إذا تَرِبَتْ يداك
صلِّيني حاضر
واستعيني على الفضل
بالرجعة لي مرتع صباك
أنا شِنْ بدوربو الشوق وكت
بشتاق وفاقد المشلعيب
وشن طعمو الغنا..
والجِتَّة راقدة هنا..
والروح..
الروح مشلهتة في سماك
ما لاقية أطياف الحبيب
وبرضي يا أمونة راجي
سكة المطر..
الحوية..
كان بِتْلَحِقْ
في يوم غناك
*******
عبيت شراعي هوى وشعاع
ونفخْتَ زمبارة الزمن
وكتين بِقَتْ
اللقيا مصلوبة في عقارب
والعشم قِدِّيدْ هبوب
ولسة راجيك في المسافة
البين رجوعك..
وبين خضوعك..
لي قداسة.. وبرجزة
يا فاتحة فيني الإندهاش
كوة في عمق الحلوك
جواي دلوك..
غارف حروفي الموجزة
وعارف!!!
إنو بينك (هو الرجوع)
ورجوعك..
هُوَ (بين)
ورغم إنو
رجوعك (هو بين)
يبقى الرجوع
إنك تبيني
بي قامة أكبر من يقيني
وتستبيني..
شامخة فارعة..
ذي هدير الموية شايلة
فوق تسابا ..
دعاش سحابا..
ريحة الحرف البعاني
من غنايا وطول شقايا
واكسجيني..
________________________________
|
