الي أشتر يا صاحب الحُزن النبيل

[محمد مصطفي]

ثم ماذا بعد هذا يا صاحبي
لو بكينا خالد الحاج مليون عام لما اكتفينا
وما بتغسل دموعنا حزن مكن كل الدواخل فينا
ما دام مكتوب من رب العزة يا أشتر نحن رضينا
فاخرج الينا نحمل عنك بعض ما تحتويه نفسك من حزن أليم
يا صاحبي ...
هذه الحياة علي امتداد الطريق لنا فيها محطات ... الي ان يحين موعدنا
محطتنا الخالدة هنا حين التقيناكم ورزقنا الله كل هذا الود فيكم ............
فلا تحرمنا ودادك والتواصل ... ولن تجني بانفرادك حاملاً آهات ذكراك الجميلة
لرجل حملنا في عالمه الجميلة وظللنا بكل الحب وجمع التضاد في السياسة والفكرة والاعتقاد
يا أشتر ...
تعال يا صاحب الكلمات ... تعال قول لينا عن حزنك .. وعن ليلك .. وكيف بتعيشو انت براك
يا زول كفاك .. ما تسكن الألم بين مسامك وفكرتك .. ولا تجعل مذاق حياتك آهة
فخالد يستحق حزنك ... ولكن الحياة تستحق ان نعيشها حتي نكمل مسيرته
هو نداء العودة يا الحبيب
تعال نتشارك الاحزان وبرضو نعيش تعال يا زول

[الرشيد اسماعيل محمود]

محمد مصطفي تحيّاتي..
شكراً ياصاحب..
فقد قلتَ كلَّ ما في الخاطر..
فقط لو نسمو قليلاً فوق جراحنا الكبيرة..
فقط.
تحيّاتي وعزائي أشتر.

[الجيلى أحمد]

تحياتى يامحمد,

وعبرك التحية لصديقنا أشتر..
كنا والله بالأمس فى سيرته مع سارة وعم رأفت ..

فياأشتر ياصديقنا
تلك سنة الحياة ,
فعد ياصاحبى
لاذال فى النشيد بقية

[مرافي]

سيتعافى من حزنه ويعود أكثر املاً يا محمد

بس انتوا ما عارفنو اشتر في كل شيء....

[طارق الحسن محمد]

المشاركة الأصلية كتبت بواسطة مرافي

سيتعافى من حزنه ويعود أكثر املاً يا محمد

بس انتوا ما عارفنو اشتر في كل شيء....

حزنه عجيب
وحقو براه
اشتر زول
براه
سوف يعود حين يعود

[محمد مصطفي]

اقتباس:
المشاركة الأصلية كتبت بواسطة الرشيد اسماعيل محمود
محمد مصطفي تحيّاتي..
شكراً ياصاحب..
فقد قلتَ كلَّ ما في الخاطر..
فقط لو نسمو قليلاً فوق جراحنا الكبيرة..
فقط.
تحيّاتي وعزائي أشتر.

الرشيد تحياتي يا صاحب
وينك مُختفي .... فقدناك
قالو لي ضاربين القرير جناين وموية
وجيتو انتو بي وجوهكم السمحة واكتلمت الاية
وكلنا بذات الصوت
الي أشتر ,,, عود يا صاحب

[محمد مصطفي]

اقتباس:
المشاركة الأصلية كتبت بواسطة الجيلى أحمد
تحياتى يامحمد,

وعبرك التحية لصديقنا أشتر..
كنا والله بالأمس فى سيرته مع سارة وعم رأفت ..

فياأشتر ياصديقنا
تلك سنة الحياة ,
فعد ياصاحبى
لاذال فى النشيد بقية

كل التحايا الجيلي
نعم .....
ما زال للنشيد بقية
ننتظر عودته ....

[محمد مصطفي]

اقتباس:
المشاركة الأصلية كتبت بواسطة مرافي
سيتعافى من حزنه ويعود أكثر املاً يا محمد

بس انتوا ما عارفنو اشتر في كل شيء....

مرافينا .... تحياتي وودي
نأمل ان يتعافي قريباً ويعود
فنحن في اشد الحوجة للجميع
وأشتر فينا ذو شأن ومعني
فخلينا نقول ليهو
بطل شتارة ياخي وتعال
كفاية كده ..........

[محمد مصطفي]

اقتباس:
المشاركة الأصلية كتبت بواسطة طارق الحسن محمد
حزنه عجيب
وحقو براه
اشتر زول
براه
سوف يعود حين يعود

بما انك جيت يا طارق
شايل حزنك وكابا دموعك
جيت تقالد حروف الناس والكلمات
اكيد ارتحت ....
هي نفسها
علي أشتر ان يكون هنا
لو ارد تضميد الجراح
فلن تتوقف الحياة ... ولا هي آخر محطات الموت
الي أشتر ...
ارجع ياخ

[محمد مصطفي]

لسة ما رجع

[سمراء]

هو أشتر غائب !!!!
كدى اتحسس حولك يامحمد ..بتلقاهو
اشتر ده طيف
ياهو داك واقف وعاصر على قلبو وماسك ركائز سودانيات
واقف ورافع فوق راسو الامانة التقيلة
واقع بين نارين ...
قلبو ...وعقلو
ارادتو ...والامانة
لو عليهو ماداير يفتح سودانيات عشان مايفتح نار جواهو
بس مغصوب بحب الخال وحب عشمو فوقو ...
اشتر للزول البعرفو ، انسان من طينة مختلفة
مكوناته خلاصية
ربنا يقدرو

[هيفاء عبدالستار]

محمد مصطفي كيفنك ..

أبو عاقله يا خوي ..

شايلنّو الحزن في الجوف

علي خالد ...تقل شيلنا ..

لكن نسوى شنو هذا ما قاله القدر ..

نبكي وتسير بنا الحياه ..

تعال .....

[أشتر]

المشاركة الأصلية كتبت بواسطة محمد مصطفي

ثم ماذا بعد هذا يا صاحبي

الحزن يا جنا مصطفي
ياتو يوم خلّ زول في حالو !!!
ما طواااااالي حاقص لينا ...
الوجع .. ما نضحك لينا يومين إلا ويداهم مُصر على تسييح الفرح ومَكَنَتنا ... حتى مَكَنَتنا وصابرين !!!
إنها .. المدوّرة دي ... مرات بتعصر علينا شديد ياخ !!! وفي كل مرة توقّعنا ونقوم .. ياما خبتت بينا الواطة وسرعان ما نقوم نِنْتفّض .. ماب نستعدل إلا بعد مسااااااافة تهبشك مصيبة أخرى جديرة بالاهتمام ...
مرات بنكون دايرنها تمشي سرعة سرعة ... ومرات نغني ليها يا زمن وقّف شوية ... شفتا المجابدة دي كيف !!!!!
غايتو زي الخلقونا مصفّحين لكن ما ضد الرصاص ... (دا كلام زول بطمّن في روحو فما تشتغل بيو كتير)
ثم نقوم نعلن الحرب على الواقع ولكن !!! الزارعا الله في الحجر بتقوم ...
والـ الله كاتب ليهو عمر جديد للأسف .. لا يدري بأيّ أرض يموت ...
شفتها كيف ماشه بينا والبني آدمين في تِنِقّزم دا فصاحة منهم ساي !!!!
شواظ يا زول تَشلْوِط ... وبعاين في ورقي ساااااكت ولسان حالي .. كاضم ..
فـ قمتا (قعدتا) ليكم تحت هذا المنبر (أتجول) في دواعيس الداتا بيز لكي تمرقوْ كلو ... وأنا أرزح تحت وطأتكم أئن من الألم والوحدة والفقد الأليم ...
ربما أمرق إليكم انسان قابل للانصهار مجددا في خلايكم الجنها تنقسم دي ...
ياخ انا كل يوم حايم وسط اللمة دي منسي .. وبقرمش في تمرة فؤادي ولسه ما فنيت مُصاصتا تقوم تقول لي إتا وين !!!!!
كان إتا أو الرشيد ...
في حدقاتكم ياخ .. في جواكم .. بين خفقاتكم وعايش فيكم .. مارق ليكم وداخل في عصب الناس التحتانية نلوك الحسرة وباقي الزاد الما كفاهم وما كفّانا .. شن بنريد والحال بطّال !!!
قاعد انا والله .. والله لا وراك البي اتش بي (بي أنا دا) دلاني في الوِدَي .. وِدَي غير ذي زرعن وقااااطي إلا من وسوسةٍ ولغاويس لوغريزمات كان مشيت جطها ليكم سوف تفلسعون الفلسعة الياها ..
وعشان نمسك فيكم قوي لازم أقعد ابعبص تحت هذا المنتدى ...
وقعت ليك الحكاية ولّ أقوم اخش ليك بنمرة صفر اجيب نفسياتك الواطة !!!!
لا تنكش ياخي ولا تنبش
ما يخص الذكرى للذكرى وما يخصني لا تلكزو ...
ما قتا ليك ؟؟؟ مااااااا تاني قامت جقلبت وجقلبتا بت لخبتا !!!!
وبت لخبتكم ...
فهل ورد إلى مسامعكم .. ولّ نقوم نحلج فد مرة !!!!

[محمد مصطفي]

اقتباس:
المشاركة الأصلية كتبت بواسطة سمراء
هو أشتر غائب !!!!
كدى اتحسس حولك يامحمد ..بتلقاهو
اشتر ده طيف

واجمل طيف بنحسو يا سمراء
أحر التعازي
وكل التحايا

[محمد مصطفي]

اقتباس:
المشاركة الأصلية كتبت بواسطة هيفاء عبدالستار
محمد مصطفي كيفنك ..

الجميلة هيفاء
خالص الود والتحايا وكل الشوق
بوجودكم انا ديمة طيب