بوست للمثقفين فقط: وضعية ترفو حكايا لتُروى - نصوص قصصية لصلاح الزين

[أبوبكر عباس]

أحجز وأدفع للحصول على نسخة

[أبوبكر عباس]

[خال فاطنة]

بوست للمثقفين فقط

سلام الحبيب بابكر

نرجو شاكرين تعريف كلمة مثقف تعريف دقيق

عشان نعرف نحن جوة ولّ برا
المهم

لحين الطردة المتوقعة بعد التعريف ياهو قاعدين

[أبوبكر عباس]

المشاركة الأصلية كتبت بواسطة خال فاطنة

نرجو شاكرين تعريف كلمة مثقف تعريف دقيق عشان نعرف نحن جوة ولّ برا

السيد الأمين، سلام
ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.
أنا شخصيا فهمت وحبيت الكتاب بعد القراءة السادسة!

[قيس شحاتة]

المشاركة الأصلية كتبت بواسطة بابكر عباس

أنا شخصيا فهمت وحبيت الكتاب بعد القراءة السادسة!

كان كدي، إنت مثقف؛ لكن تعبان شديد

عليك الله يا دكتور، لو ما عندي حق أخش هنا، ما تعفي لي.

[سارة]

انا غايتو دخلت بعد شفت شحتة وخال فاطنة
يعنى بكدا انا معاهم برة برة جوة جوة


بس عليم الله عندى مزاج فى الكتاب
فانا احرص على اقتناء الكتب
وهى عادة قديمة

[أبوبكر عباس]

المشاركة الأصلية كتبت بواسطة قيس الصديق شحاته

عليك الله يا دكتور، لو ما عندي حق أخش هنا، ما تعفي لي.

الأيام أيام إنتخابات وأنا ح أنافس لنا في المجلس، عشان كدا؛ عفو شامل مع شاي سادة

[الرشيد اسماعيل محمود]

المشاركة الأصلية كتبت بواسطة بابكر عباس

السيد الأمين، سلام
ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.
أنا شخصيا فهمت وحبيت الكتاب بعد القراءة السادسة!

عليك الله حاول أقراهو تاني مرّتين، وواحدة برضو، وخليك مستعجل.
من الإهداء؛ الراجل دة شكلو كتّاب، والكتاب يستاهل تدفرو لينا علي وجه السّرعة

[شهرزاد]

أنا غايتوا ح أقراهو عشان أحصل علي لقب مثقفة ..
أحجز لي نسخة ..

[أبو دعد]

المشاركة الأصلية كتبت بواسطة بابكر عباس

السيد الأمين، سلام
ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.
أنا شخصيا فهمت وحبيت الكتاب بعد القراءة السادسة!

كنت قائل بتاع الجزيرة للدراسات الاستراتيجية

كدى الدينا نبذة عن الكاتب خلينا نشوف مثقف

[أبوبكر عباس]

المشاركة الأصلية كتبت بواسطة أبو دعد

كنت قائل بتاع الجزيرة للدراسات الاستراتيجية

كدى الدينا نبذة عن الكاتب خلينا نشوف مثقف

داك، صلاح الدين الزين
ودا، صلاح (الزين)
من قرية العامة، وصفه عاطف مكاوي موسى ب:
"صلاح الزين، ان تحدث معك بطريقة المثقفاتية (وما أدراك ما البنيوية)، قد لا تفهمه أو تفهمينه للنهاية، ولكن ان تحدث بطريقة ابن قرية (العامة) أو كما يقول هو ترجمة لها (The general) فيكون الكلام قرويا خالصا وواضحا (لحد الضحك)."

يرتدي تي شيرت وجينز وسفنجة في الغالب ولديه دكتوارة في العلوم السياسية أو حاجة من هذا القبيل.

[أزهري سيف الدين]

المشاركة الأصلية كتبت بواسطة بابكر عباس

ح أنزل حوالي ست صفحات من كتاب الأستاذ صلاح الزين (ليس هو بتاع مركز الجزيرة للدراسات الإستراتيجية) والكتاب مكون من 168 صفحة، أي يزول يعجبنو الصفحات الست ويراسلني يطلب نسخة، دا، طوالي تعرفو مثقف جدا.

سلامات يا بابكر ومشتاقين
اعتبر مشاركتي دي (سُمبُهار) في تربيزة المثقفين دي قبل ما أقرا الست صفحات، وألحقني بي (جَرّتي) في الخاص بالله
لو الجَرّة طلعت سمحة بجيك نازل بي جاي

[أبوبكر عباس]

المشاركة الأصلية كتبت بواسطة حسين أحمد حسين

عرفنى عليه مطلع ثمانينات القرن المنصرم صديقاى العزيزان، علي العوض عباس وأمينة الرشيد نايل. فصلاح الزين؛ رجلٌ مِمْراحٌ فوضوىُّ الروح، وفوق ذلك مثقفٌ عضود. وصعوبة مفردته الثقافية تتأتَّى من دراسة الفلسفة، وبالأساس الأنثروبولوجيا. ولعلى أجد بينه وبين إبراهيم جعفر عقدَ شبه.

كل الود.

عشان أبرهن ليك يا حسين، انو أنا مثقف جينيا؛ فعلي العوض عباس، إبن عمي لزم.

صلاح الزين، يا حُسين، غير (كدا، صاح يا وهاد؟) انو مثقف عضود، فالرجل من أجمل السودانيين على الإطلاق ويختلف عن بقية المثقفيين اليساريين بأنه متسق جدا.

[حسين أحمد حسين]

المشاركة الأصلية كتبت بواسطة بابكر عباس

عشان أبرهن ليك يا حسين، انو أنا مثقف جينيا؛ فعلي العوض عباس، إبن عمي لزم.

صلاح الزين، يا حُسين، غير (كدا، صاح يا وهاد؟) انو مثقف عضود، فالرجل من أجمل السودانيين على الإطلاق ويختلف عن بقية المثقفيين اليساريين بأنه متسق جدا.

تحياتى يا دكتور،

الآن أشهد أنَّك مثقفٌ بالوراثة، علاوة على الثقافةِ بالتثاقف. واللهِ لقد سعدتُ بهذه المعلومة أيَّما سعادة، ولنا عظيم الشرف. فنعم إبن العم ونعم إبن عمه.

على العوض عباس، ذلك العِصامى الخلوق، والصوفىُّ العميق، له علىَّ أيادٍ بيضاء بالغة، وكذلك السيدة أمينة. فأرجو أن تغريه منى السلام (سواء فى ناصر/أو فى اليابانية، أو فى أىِّ جزءٍ من اليابسة).

أما ود الزين المسرحىُّ الصبوح يا عزيزى، فهو نسيج وحده، الذى ليس له صنو، فى الإلتزام والإتساق الفكرى على كلَّ الصُّعُد. فالرجل سامرٌ لا يُمل، وله القدرة على كَلْكَلَةِ الجبال.

ذلك النفرُ من النَّاس (على، أمينة، والعربى)، أنا مدينٌ لهم بمحامدَ عِظام. فلهم ولك منى التحياتُ والإحترام.