شجرة،،،، وزرعناها،،،،
*بي 📝 الحنين،،، ،،*
*د. علي الشيخ،، ،،،،*
*شجره🌳 و زرعناها،،،،،*
الكلام على الواطه،،،،
و البذره،،،
و الدم السقيناهو،،،
كان في شجرة،،، غير الضرر و الاذيه ما لقينا منها حاجه،،،، شجرة عشعشت فوق رأسنا،،، و خلتنا مدنقرين و خايفين ،،، شجرة،،، لا بتخت ضل،،، و لا ثمره نافعه،،، تلم في *النمتي،،،* و ذنذنة أشباه أنثى البعوض،،،🦟 الانوفوليس ،،،، قد يكون لها جذور في جزر اليونان أو تلك الأخرى قبرص،،،، لكنهم أثروا جارتهم تركيا،،،، لشيء في نفسهم،،،، دعك عنهم،،،، شجرتهم ،،،، شجرة غير تلم الحراميه ،،، و الحرام ،،،، ما عملت حاجه،،،
البزعلنا ،،،، الواطه حقتنا ،،، سمحه ،،،، سماحة أهلنا السمحين و الطيبين،،،
و لسه ،،،، متماسكين ،،،،، و صابرين،،،، وعشمانيين ،،،،
هسه نحن زرعنا شجرة 🌳 جديده،،،، خايفين عليها،،،، بنحاحي ،،،، و بنربي فيها،،،، و بنسقيها ،،،،
مرة تجينا *هبوب،،،،* نقول يا لطيف،،، هبوب بلدنا بنقدر عليها،،،، في هبوب مستورده و كده،،، جايانا لي فهم و لي سرقت و قلع خيرات بلدنا،،،
مرة تقوم *كتاحه،،،* نمسك في يارب يا قوي ،،،، كان بقت على كتاحتنا ،،،، ما حقتنا،،، بنعرفها و بتعرفنا،،، زي ما قالوا الاسطوات،،، ناس الخبرات،،،،
كعبه الكتاحه ،،،، البتجي نص النهار،،،، و اكعب منها البتجي مع الصباح،،،،
مرة الغنم تلم في الشجرة،،، نقعد نساسك في الغنم،،، الغنم بنقدر عليهم،،،، *كعب التيس،،،،* اصلوا ،،،، مريس و متيس،،، و البضحك التيس معاهو عتان و سخلات،،، مركبين مكنة غنم و تيوس،،
زمان بنلعب،،، بنقول ،،،، *الروس،،،، الروس،،،، حباب التيوس ،،،،،*
و العزالين بعزلوا،،، و نحن نقول من قول العوازل سيبك ،،،،
نختي ديل كلهم ،،،، شويه شجرتنا تكبر و تخدر،،،، و صفقها يشيل،،، زي حنة العريس،،،، و نفرح،،، ونتلمه نقعد في ضلها،،، البعيد يجي و القريب يقعد معانا،،، ونحن بنسقي في شجرتنا،،،
تقوم المويه تقطع،،،، نجري على البحر،،، نغرف منه،،،
نلقى التماسيح 🐊🐊🐊 لسه بتلغف،،، و قافله علينا الدرب،،، بي قوتنا شلنا المويه،،، نلحق شجرتنا ،،،، زي العيان الكايسين ليهو دم،،، و فصيلته نادره،،، زي تراحمنا و سؤالنا عن بعض،،، ما قلت ليكم نحن شعب نادر،،،، نادر في تفاصيل مثيره حتى على ناس الموسيقى التصويريه،،،
حظنا،،،، *نتفك من تيس نقع في تيس،،، تاني بتعلم في السواقه،،،، يساسق بينا،،،*
شجرتنا بنعرف نربيها ،،،، المره دي بذرتها نوعها تاني،،،
ترابلتها شباب،،، ثوار،،، 🌳 شجرة ،،،، اتروت بالدم،،،، بدون سماد اجنبي،،، شنو يعني وديعه،،، دي زي المسكنات،،، نحن الصفحه دي ما بتاكل معانا ،،،، كلوكلو،،،،
*No,, and,,,, No*
*شجرتنا ما بتنقلع* بي اخوي و اخوك،،،، كرهونا زاتوا في الكلمه دي اخوان،،،، الخوخه التقلع ضروسهم ،،،،
*شجرتنا دي ما بتنكسر و لا بتتسرق* بالساهل كده،،، شجرتنا دي امانه في رقبتنا،،، ختوها لينا الشهداء،،، يا نصونها نحافظ عليها،،، نكبرها ،،،، يا نلحقهم،،،
شجرتنا دي مسكت في التراب،،، تراب الوطن،،،، بنعزها ،،،، بي العزيز و الغالي،،، عشان تكبر،،، و تثمر،،، و يلعبوا الشفع تحت ضلها،،،
في ناس شايفهم بجرجروا في بنابرهم دايرين يتحشروا يقعدوا معانا تحت ضل شجرتنا،،، و مالوا،،،، الضل بشيلنا كلنا،،، اقعدوا معانا و نضفوا و اسقوا،،، ما تقعدوا قعاد نقه و ونسه ساي،،،،،
*السودان بلد متعدد الثقافات،،، بلد يسع الجميع،،،، بلد حر،،، ديمقراطي،،،*
*الترزية الذين يصرون على تفصيلة واحدة،،، بضاعتهم لن تجد سوقا*
*د. علي الشيخ*
*الحنين*
*امدرمان*
*٢٤ سبتمبر ٢٠٢١*
|
