كلمات من ذهب

[عادل عسوم]

حبيب الشعب دكتورنا مخير
بي عمركم وغربتكم دي ياحبيب ومن قبل كدة في أمدرمان الشاملة ولامة ديك بتكونوا عرفتو وعاشرتو أشكال والوان من الناس...
فيهم المسلم وفيهم غير المسلم وفيهم المسلم المتدين وفيهم المسلم قشرة وفيهم المنكر مرررررة واحدة!
فأكيد بتكون حصيلتكم من دة كللللو فيها الكتير المفيد ياحبيبنا!...
أنا غايتو عندي جدا لي (مع الأحتفاظ بفارق العمر الكبيييير عنكم)
هو أخو حبوبتي ود أبوها ...كان (لا يلقي عصاه عن عاتقه من الترحال والسفر)...
أهلنا كانو دايما بقولوا لينا عنو أنو شيوعي (كافر)
لكني كنت بشوفو بصلّي بالليل هناك في أوضتو وكمان بسمع صوتو دايما بيبكي بالليل!! وفوق دة كان رحمه الله راجل ذوق جدا وحنييييييين وكمان كريييييم ومن أكتر الناس (دفعا) في المناسبات وزول كان شفت مواصل لدرجة بعييييدة والراجل عاش لغاية ما فارق (رحمه الله) لم يتزوج ولكن برغم ذلك ما عهد الناس منه الاّ كل سلوك حسن!...
كانت بيني وبينو ريدة وتقدير وكان دوما بيقول لي ياعادل ياولدي أنت فيك صفة ربنا مابيديها لي كل الناس قلت ليهو شنو ياجدي ...قال لي (القَبول)!
ولمن سألتو يعني شنو قال لي بتعرفة أن شاء الله بعدين!...
المهم جدي دة ماخلى لا جمهوريات الأتحاد السوفيتي أيام ماكانت (صمّاء) ولا دول أوربا وكمان حتى دول شرق آسيا وعيييييك...
رحمه الله كنت في طفولتي أستمتع بالجلوس اليه أذ كان يحكي لي وكأنه يتحدث الى رجل راشد (ولم يكن عمري حينها يتجاوز السابعة بكثير)!...في مرة جاء خالي وقال له (أنت بتتكلم مع الولد دة كأنو صاحبك دة حيفهم ليك جنس كلامك دة؟) ياولد قوم جيب موية...فأقوم وأنا أنعل خاش خالي
المهم يرجع جدي ويقول لي ماتزعل ياعادل ياولدي من كلام خالك دة
-لكن ياخالي ليه هو مابيريدني زي ماأنت بتريدني؟
-لا يا عادل يا ولدي ...صدقني بيريدك (يمكن كمان أكتر مني) لأنو خالك لزم والخال والد ...لكن ياعادل ياولدي كل زول بيعبر عن ريدتو للآخرين بطريقة مختلفة!!
ويواصل جدي (شوف ياعادل ياولدي من سفري الكتير دة طلعتا بي قناعة مهمة جدا وهي أن البشر ديل كللللهم مهما كان دين الواحد أو جنسو أو دولتو الخير فيهم أكتر من الشر فأوووعك تحكم على الشخص بالسوء مهما كان تصرفو أو أو كلامو ...وصدقني ياولدي اياما أنا ماكنت بعرف أنو الرسول صلى الله عليه وسلم كان قال (ألتمس لأخيك سبعين عذرا فان لم تجد فلم نفسك))!
ـــــــــــ
معليش ياعمنا بابكر الظاهر أنا سرحت ونسيت كلام (أمولة) بتاع الأنقليزي وكمان كلام (بدر البدور)... لكن أسمع أنت قلت لي (هجيج) والاّ أنا اضاني دي بقت تجلّي؟
يازول والله مرحب بيك وحرّم لو نويت بس قول لي ...وتذاكر الطيارة ذهاب واياب علي أنا وعمرة مقبولة مقدما يادكتورنا...
محسوبك عادل حسن علي