عــــــــــــودة ... وحلم
والشارع المبهوت يعاينلك
يحنضل بي سكاتو غناك
وينتاوق يعاين للخطى الماشات يطنش
يتكفى ويرجاك
تغسل طرحة الليل الممدد في مشاويرو المعاك
بقة صباح
تدعك هديمات السكات وتشرهن
فوق حبلك الممكون جراح
هدّامك الماسك دريبو على التمر
قاوا الجروف شان جاتو وحّدا
لاعيوش بي فوقا لا ريقان جرم لا اللوبي شابك لا الملاح
لكنو ما شال من طرف تمراتك الراكزات سوا
و طلحات عوين المدرسة
الواقفات مراح
و الشمس فوق توب النويوير المرق
ركَّت تقريه التواريخ و الخبارات
المدسدسة في تياب الحلي
والعمم القبيل شربانى والتريانى
من عرق النهار والليل وشايات الصباح
ركّت تناديلو الأمان الفرّ من شدرو وسكن آخر
زقاق في ذكرياتو اللسة ما لمّت
في باقيها اللى راح … باقيها راح
وكانت بتحلم من زمن تشطف ملاياتا وتقش الحوش
عشان باكر بعد باكر بيبقو وشى صفاح
وصفحة كتاب العالمين تشهد على ريدنا
الأراضي الفينا ممدودة وهواك
تشهد على انك رسول الغنوة لي هادى الخلوق
وانك براك
تشهد على زفة عصافيرك بنات
الفكرة والخاطر معاك
تشهد تقرّيلك بطان أبريل درس عزتنا
شان يكبر يغنّيلك
زنازينك تضيق توسع وهادى الدنيا
ما وقفت على ضيق لحظه واتباكت
وأمانيك القبيل راحت تشاقق شوك لقاك
تلقاك ……مسادير ضلت الواقع
ولا اتلايم هواها وراك ولا انضارت
تقيف تكتب على صدر الغمامة نشيد
ينقّط في الفيافي مطر
تشد في نصها الوديان خدار وخدار
تلف بالباقي حد الشوق مناديل القبيلة سفر
قناديل الكلام المات تولع في حشاك قمر
تنوّر في الليالي الحن تدودرلو الاماسى وتر
يهاتيبك
يا غنوتك في الريح مشوار على كف الأماني
يا رسمتك تبريح يا شوق على نبض المعاني
ضحتك غنوات تبكينى
وتشيل من خاطر الأحلام مناديل التهاني
وتكتبك في البال على كل الحيط موّال
سبابير القبيله تطول وما تشيل الحروف شبّال
وتكتبلك بنستناك على الأبواب وبيناتنا الغنا الهطاّل
وكمين من شهيد وقصيد ورجيان الخلاص الطال
وكمين من سؤال واقفات على باب الإجابة
سحابة تتقاطر مهابة وفال .. تناديلك
علي يا فضل
علي .. يا .. فضل
وعلي ود فضل آخرة مَهر هادي الصبابة
يقيف على حيلو ويجيك
مسنود على حبر النشيد
خاطر من الغيم البعيد مشدود على لحن الغناوى البّاقة ضو
ممدود على كل القلوب الفاتحة في الشارع
قهاوى
ولون من الشفق البغسّل دهشة الحلة المجرتق شوقا عيد
وملموم على حيل التراب
آخر سحاب شاهد على وكت الفجيعة ومستحى
ومتخبّى في وردة أماني المتعبين
مادد على خدرو النصيحة وريد وريد
وهادا السحاب نقّط على كل البيوت لون الأرض
يا لونّا يا هادى العلي
يا هادّينا في كل الشوارع لون نضال
مكتول على عشقك طفل ومجروح ورا شوقك
زمان الغنية والعرس الحلال
مارق من آخر رمش فيك
رشفة بنات العالمين ايوووووووى
وركزة شفعك في البال
وكاتبنك على دخلة نفسنا الجوف
مروق حس الغناوى بلاك محال ومحال
ويا حفيان على دروب القوافي وسكتن
ماسك شباطين الحضور و الضو وغايبات المنافي
مواويلك جرس فسحة مدارسنا
وشهيق الوردة في وش الغمامات التوافى
مناديلك تقطّع من وشى الأيام حواشي اللهفة
فوق قوز الغناوى الصايمة من رجعة غناك
لي بكره ما غنتلو مافي
شعاع في شعاع نلقط غيمك الولهان
عشان نكتب على جيد الخميلة
غنينا يا هادى الجميلة
غنى لا كتر انشداهك لا انتباهاتك قليلة
غنى ما حالت قوافيك بين عيونك ومستحيلا
غنى شايلنك ترابنا وصوت قماريها ونخيلا
عمرو لا الغنوات حتكمل لا حتقنع من شليلا
والعيون في القيف تحلّق تتكى وتنزل في نيلا
غنى شبّال البنيات البنقط بين كتيفات القبيلة
غنى مرسال العصافير الحكاية وضجة هدّ الصمت حيلا
وغنى يا هادى الجميلة
رحيق البكرة كان قطّر على ورد الأمل مسدار
يشيل باقي الندى النوّار
يلّون شهقة المريود
ومن مرقة دخول الروح تسافر دهشة العابرين
على سكة هواك ورود
وتتواعد مسامات الحضور في الضو
تجرّح ضلمة التاريخ تلوّح في الفيافي شهود
تجيك تحلم غنا وآمال
نلقّطلك قناديل المدينة سحاب نشتتلك ضفاير غنوتك مرسال
ونكتبلك على الموجات مداين عشقك الموّال
ولا كضّب في جيتك ريح ولا مطر الفرح هقّال
وتنصنت خطاك الفكرة تمرقبك نفس طالع من آخر بيت
نفس نازل على الحلاّل
كتاب البكرة يتمارى وسطور الحاضر الفى البال
تشد تركب قفا الأحلام ويتلايم حصاراً طال
وشن تسمع بلا الغنوات
وشن يرجع بلا المارق من الغيمات
و..شن يفلع قلاع الظلم غير حجّار نضال ما مات
|
