أشتر .... يا أشتر
اناديلك فتُبكيني ...
لساك موجوع والوجع ما زاد طريقاً زين ... شن بنسوي لو الزمن بقي شين
مستفين بيك في جوانا ... في حدقاتنا ... وفي ودالعين وبيك حاسين يا زول
حقك تكابس في الكواليس عشان نتوهط في قعدتنا لكنك عارف يا الحبيب براك ما بتحلي قعدتنا
حقنا فيك لما نفتش في البوستات عن حاجاتك في كل صباح ده حقنا منك وحق شرعي
ده الحق الفرضتو مودتنا وسماحة حرفك النديان ... وحتي لو الكلام صبح حزنان
ما تديرنا من وراء الظلام ات زولاً ضؤ وحرفك نور
اشتر ...
اول مرة راسلتك في الخاص قلت لي ابقي عشرة علي الصلاة
عرفت عمق ايمانك والايمان مصدر قوانا والدنيا ساقية .....
شوف حرفك صانع الود البيني وبينك وبينك وبين كل الناس الحبت قولك
يا اشتر ... لن تبقينا الدنيا ان طال حزننا فيها ... ولا حتي لو زاد الفرح قيراط
عرفت ليه بنغني للزمن وبنقول ليهو وقف شوية ...
وقف شوية عشان نمتع روحنا بي لمة حبايبنا
وقف شوية عشان الموت ما احكم مصايرنا
وقف شوية عشان نتلاقي بي ريدنا النسجنا حرف
وقف شوية عشان البينا خالص ريدة وحب ... وولف
ياخ وقف
وبرضو ما بقيف .. ندعي ليهو وندعي عليهو وبرضو ماشي وشايت شوتو
هي الدنيا دي شنو يا أشتر ؟
تصدق يا ود ابوعاقلة نفسي اجاوب السؤال لي زمن ولسة ما مرت في الخاطر اجابة
تعرف يا اشتر ... رغم اني تميت قراية ردك ما بين الدموع وكان حزنك مدادك
بس ياخي برضو بركة انك بتقرانا وجيت تكتب
ياخ تعال اكتب
تعال ورينا شكل الكتابة في موسمها الجديد ... تعال قالدنا بي حرفك
تعال ابكيهو فراق صاحبك ... تعال خلينا نبكي معاك .. تعال تلقانا ديمة حداك
تعال اكتب
