ود أب ضرس نفعتو النصيحة !
ود أب ضرس دا صاحبي ، منصوري ظريف يسكن ضواحي كريمة ، حلو اللسان و حسن الهندام و يعمل في مجال السمسرة .
تزوج امرأتين و طلّقهما قبل إكمال عام مع كلّ واحدة منهما .
قبل شهور و نحن نشرب الشاي في قهوة أبو عرب في السوق التحت بكريمة قال لي : ناس فلان ديل عندهم بنية سمحة خلاص ، و حديسا ينقط عسل بس مشكلتا قصيرة شوية ! باقيلك شنو ؟
فقلت له مازحاً إن الحجاج بن يوسف قال (من تزوج امرأة قصيرة فوجدها على غير ما يحب فعليَّ صداقها)
فقال : كان كدي ياني المعرِّسا !
قلت له : يا زول دا راي الحجاج ، ما رايي
ما تقوم تعرس بت الناس و تجي تطلّقا و ترمي اللوم فوقي !
قال : يا زول انا أخدت بي كلام الحجاج تب !
ثم تزوجها و سافر بها إلى المكابراب حيث تقيم أسرته و مكث بها أشهراً هناك ثم عاد إلى كريمة حيث قابلته قبل يومين و أنا متوجس من أن يكون قد طلقها ...
- أها عامل كيف مع المرة الجديدة ؟
- يا زوووول ... علي الطلاق لقيتلك الحجاج دا مافي أنجض منو ! ، أتاري أنا كنت مضيع زمني ساكت !!!
المشكلة الآن هي أنني أصبحت أفكر بجدية في تطبيق كلام الحجاج ، لا سيما بعدما أفضى لي على ود أب ضرس بما لا أستطيع نشره ههنا ، كما أن زوجتي على النقيض تماماً مما ذكره الحجاج !
ملحوظة / الكلام دا أنا كتبتو في (خاص بالأعضاء) لأنو المدام مرّات بتجي تتشمّر و تشوف أنا قعد اكتب شنو ، و هنا ما عندها طريقة لأنو ما عندها باسويردgap
|
