خالد الحاج -- عليك الله نهرنى -- طيب
[align=center]صبية حالمة مفرهدا
فى ليل ضفايرك
نتكى
نغزل خيوط ريدنا البدا
ويبدا الحكى
ووجيهك المليان سنا
كون من ألق
إترص فى خاطر المدى
كون من أغانى مدوزنا
إلفة بشر
نشوة سهر
صبة مطر
طلة حدايقك وسوسنا
محجوبة بالحصن الحصين
مزروبة بى ريدنا المكين
إسمك فرح
طيبك طمح
ومن طيب حدايقك وسوسنا
فاحت نسايمك
فى جميع الأمكنه
محت بشايرك
كل أحزان السنين
شالت محاسنك
كل قبح الأزمنة
صبية حالمة مفرهدا
والريد بدا
شفنا معاك
ريدة الناس محاوشاكى
يمشى حداك
طيب المعنى يغشاكى
صبية حالمة مفرهدا
ليكى المحبة
وامنيات
عمرا مديد
ليكى المودة
وأغنيات
فرحة ونشيد
ليكى الصباح
والأمسيات
أعراس وعيد
وليك من قلوبنا
الريد أكيد
كل يوم جديد[/align]
[align=right]بدءاٍ
أعتذر لأخينا ود الشيخ، عشان سرقت واحد من عناوينه، أو جزء منه
مع إختلاف الموضوع، وتحية ماكنة ليهو
وتانى شنو
الغزل الفوق ده طبعا كان فى شان الصبية الحلوة، زمان يعنى، الإسمها "سودانيات"
وهسه طبعا عينى باردة ما عادت صبية يافعة، كبرت ونمت وبقت حديقة كاملة الدسم
أما عن موضوع "التنهر" أو "النهير"
فخالد الحاج طبعا عارفنى أنا عايزه ينهرنى ليه
ولا بد من "صنعاء" وإن طال السفر
شكر كتير للناس السعت وجملت رحلة العودة ومشوار سفر الجفا
والله ايام يا زمان
والله ايام يا سودانيات
خلاص كدى ابدا نهِّر يا خالد[/align]
|
