مداخلة (2)
حكايات من الايجارات
ذات مرة من المرات قلت أعز نفسي و أجر لي شقة في حتة محترمة .... حتة ما بجيها النظام العام و اي زول فيها جاري ورا سلوكه الشخصي و قد كان حي راقي شديد و الراقي ود الراقية سيد الدين السمح ابو صلاة واحدة في الاسبوع داك...
سكنت كاي ساكن بس سيد الدكان الوارث الشمار بالمهنة أجي طالع يديني تقرير كامل عن السلوك الاجتماعي لناس الحلة و كذلك أجي داخل لكن ما كنت شغال بالموضوع شديد .... مرة الساعة بدري معاي أشرف السر الحي الدنيا دا... زمن السحور و الوقت داك ما في اي رمضان و ناس البيت الماجر منهم دقوا الثكلي ... ديل ناس عجبيبن ابوهم مات و خلي ليهم عمارة حدادي مدادي و اتقاسموها قسيم مرارة .... اي زول استغل بحياته الا بتين سيد النصيب ما جاهن ديل قاعدات مع الوالدة.... أها الساعة الصباح بدري البتين ديل دقن الشمطة فيهن واحدة عاملة فيها الشريف الرضي و بدأت بردحي مخلوط ببكاء تشتم في أختها ال الله و الرسول عارفنها ديك و مع الشتم بتندب حظ الأسرة واسم ابوها الاتمرمغ في التراب و شتيمة عينة: يا تيت يا تيت ..... عملتي لينا سمعة و الله يرحمك يا ابوي و بركة المت بدري ما حضرت الحصل لينا .... يا تيت انتي الليل دا كلو من عربية لعربية جاتك داهية
أها الشريف الرضي بعد انتهي من كل ردحيها دا ... أختها كانت very professional , و بهدوء شديد قالت ليها شنو شابكني الليل كلو و الليل كلو .... انت قايلة في فرق بين الليل و النهار و لا بالنهار بصغر و البصغر دا اشارة كعبة شديد بس اللهم إني صائم ..... بعدين انتي قايلة الما عارفك منو و ما تفتكري أمي دي ساذجة عارفة كل حاجة
و الكلام دا اتقال بهدوء تحسد عليه ... بس الشريف الرضي انفعلت شديد يا خي : انا تقولي علي كدا .... انا يا تيت و يا شبه التيت ..... تقولي أمي عارفاني والله قطع لسانك .....................و بدت تبكي
الام المسكينة شكلها رفعت راسها كدا و قالت ليهم عارفاكم الاتنين يلا اتخمدن نومن الدنيا صباح
ناصر أزيك يا خي
|
