بإعتباري طرف أساسي في الكوماج إللي أسفر عنو البوست ده بوضح الآتي :
1/ مافي حاجه إسمها وجودي سوف يكون مزعج وأقدم أسفي وإنسحابي ، البيت ده بيسع لأي زول بشرط إنو ما يتجاوز حدود اللباقة.
2/ كان تكون أكتر شجاعة وتعتذر عن إنك وصفت عضوية سودانيات دي بإنهم حيوانات .
3/ إختلافي الجوهري معاك في حتة الإساءة دي ولسه في موقفي الواضح منها ، وما حإتنازل عنها.. الإشارة لإنك سرقت مجهود ذهني بتاع زول وما أشرت لإقتباسو ده موضوع ثانوي عالجو السيد/ الأمين العام برساله مهذبه ليك.
4/ والأكثر إيلاماً إنو غالبية العضوية ديل مروا على الإساءة وإتمترسوا في مقوله باليه :/ حمد لبد ، وبدر وأمل ، وحمد طلع الجبل! وده موقف سلبي البيتعامل معاهو بسلبيتو دي بطريقتو ، لكن أنا برفض الإسلوب ده وما بتعنيني الإشارات المغتغته لإنو أعير شخصيتي الإعتباريه ( منصب نائب الأمين العام ) شوية إهتمام ، وهنا لازم نميز بين شليل العضو وإللي ليهو كامل الحقوق في إنو يبدي رفضو إزاء موقف بعينو وبين شليل (نائب الأمين العام ) وعندكم اللائحة هي المرجع والفصل في شاكلة نزاعات دي.
5/ آثرت نقل البوستات- إللي أسهمت بوعي في إنو أبوظها- لمنتدى الإدارة بغية تنقيتها وتشذيبها ، لأنو القراء ما عندهم ذنب في الحاجه الحصلت دي. وهنا بسجًل إعتذار بوضوح لكل زول أسهمت في إنو أبعدو عن إنو يتداخل في البوستات الإحتليتها..
6/ ما بحب التبرير : لكن لمزيد من التوضيح حول إستيلائي على بوستاتو : عمدت إلى نقل إساءتو الواضحة وعمل ليها (كوت) في كل البوستات بحجة أفرمل المتداخلين القد يتداخلو بحسن نيه ، وأنبههم لخطل نواياهم السليمة تجاه الضيف البينعتم بحيوانات تراديشنال..
وده بمثابة إحتجاج واضح مني الهدف منو ما عندي إستعداد إتداخل معاهو مالم يعتذر عن الإساءة الواضحة لينا.
7/ بفهم تماماً إنو الإبتعاد عن حدود اللباقة والموضوعيه ، ده بيكون خصم على حاجاتي وما بيضيف لي حاجه غير إنو تتنامى مشاعر العداء جواي ، إللي أساساً ما محتاج ليها وعندي منها ما يكفي لتوظيفو في معارك تانيه.. لكن أنا عندي خطوط محدده ما بسمح بتجاوزا ، إذا عديتها ما بقدر أجمح تمردي.
8/ ولا عزاء لكل زميل/ه ، شافوا الإساءة دي وإنحازوا ل ( حمد ، لبد ).
|
