قصص من الدنيا؛ وبعض حكاوي...!!!

[عبدالمنعم الطيب حسن]

الفنان حافظ عبدالرحمن موسوعة عديل في علوم الموسيقى والفن..
سمعت له سهرات في التلفزيون..
حديثه منساب كموسيقاه..
له الرحمة بقدر ما دوزن وهذب وشذب احاسيسنا وشعبنا
بالابداع الموسيقي .. انه اب القيثارة والموسيقى الجزلة..

[عبدالمنعم الطيب حسن]

الفنان حافظ عبدالرحمن

[عبدالمنعم الطيب حسن]

رمضانيات-25
رغم الجراحات
رغم الاسى والاحزان
على فقد سودانيين وسودانيات اعزاء وكرام
ودمهم حرام..
تستمر الحياة..
والعسكر للسكنات
والجنجويد (ينبل)
...
كانت السفرة في داخلية الجيلي الثانوية رحيبة
ومتنوعة ولذيذة شاي الصباح وفطور بعدس او فول وغداء بطبيخ ومرات لحم محمر عديل كدة؛ وفواكه والعشاء زي الفطور..المهم كانت الاشياء معدن؛ الداخلية اصلا كانت مخصصة لطلاب مديرية الخرطوم وريفها البعيد
طلاب السبلوقة حتى تخوم شندي العزيزة التي بها بنات جعل..
وغرب النيل من الجزيرة اسلانج جنوبا حتى الوادي الاخضر والكوداب شمالا قريبا من المتمة..
ومن شرق النيل الشيخ مصطفى اللمين والفادنية حتى البطانة في ابودليق وابزليق..
وحتى جبل اولياء شرق النيل ديم البساطاب
والحلة الجديدة
وغرب الجبل حتى ايد الحد والسليمانية
كل هذه المناطق مشينا ليها زيارات وهيتنا وبيتنا فيها وضربنا الذبائح ولكن ذلك موضوع اخر..
واصلا انا مفروض ما اسكن في الداخلية فهي غير متاحة لابناء المنطقة فقد درسنا المتوسطة بالجيلي ونحن اصغر عمراً وهي ابعد بالمناسبة من الثانوية القريبة من الزلط الرئيسي..
اما وقد استخدمت (شفتنتي) وعلاقتي القوية مع استاذ الكيمياء صديقي المرحوم معتصم احمد علي معتصم كيمياء
وكان مشرفا على داخلية السوباط
فاعطاني الفرصة وجبتا عنقريبي ولحاف وملاية ومخدة واحتليت مكانا وسطا بين عشرة سراير في كل جانب العنبر به 20 سريراً
ومعنا الواك اكوج الذي درس معنا لاحقا في مصر..
يفتح الرادي بتاعو بصوت عالي
-يا الواك وطي الصوت شوية عاوزين ننوم؛
-في ناس عاوز تسمع انا اودي خدمة واللمش عاوز يسد اضان بتاعو
ههههههها
السفرة بها 10 طلاب كل واحد عندو عيشة
في الوجبة..
وسفرتنا بها طالب زايد؛ فهنالك 10 عيشات مقابل 11 طالب؛ وكل واحد قدامو عيشة واحدة والحدشراوي الجانا متاخر دا ما عندو عيشة بحاول يمشي قرمة من هنا وقرمة من التاني
وانا كزول سنستف مشيت طوالي؛ لمشرف السفرة واجيب عيشة زيادة واكلمو بالقصة وانو يخت في السفرة ديك 11 عيشة
ولكنه ينسى في الوجبة البعدا ويعود صاحبنا ولا يجد خبز زيادة
فاقترحت لناس السفرة انو نعمل فتة
ونفرق دم رغيفتي ورغيفتك على الكل
وناكل بمتعة وراحة
خلاص سفرتنا بقت مشهورة بالفتة
كل وجباتنا فتة
فمسوني الشباب
منعم فتة هههها
...
وكنا مرات نمشي نشرب شاي المغرب في بيتنا
ونلحق العشاء في الداخلية...
طلاب مصر شايفم بشكوا من فقر الوجبات التي بها فول وعدس وبيض وزبادي وفواكه
انا كنت شايف الوجبات دي كويسة جدا
ههههها
امي تخت لي اكلات على جنب وتقول ولدي دا اكل برة ما بنفع معاه
حتى لو مناسبة بجي البيت افتش ان شاء لقمة
خلف صاحبي وناقش الفلم
نكون بناكل في مناسبة يشوفني راخي
- يازول هو اكل اشبع ساهي الليلة الحاجة
ما مخلية اي حاجة على جمب
اوعى من المقلب
هههههههههههههههها

[عبدالمنعم الطيب حسن]

رمضانيات-26

رغم المحن والإحن
والجراحات الإتقَيَّحَن
وموت ناس عزاز
دمهم غالي وحرام
وسحن سحن
ولكنا نظل كما الاسفنجية
نمتص الاهات ولا نُقهر
العسكر للثكنات
والجنجويد ينبل
....
في اولى ابتدائي اعطاني استاذي حسن عبدالرحيم امد الله في ايامه اعطاني ممتاز كبيرة في كتابة حرف الالف.. وبكرة اعطاني ممتاز اصغر في كتابة حرف الباء لاني عملت سن للحرف في نهايته؛ وبدا وكانه حرف النون..
وكلمني بسبب الممتاز الصغير
واشار لي ان اكتب الحرف كما فعل جاري جلال الدين حسن محمد الذي ظللنا نقعد في كنبة واحدة حتى ساتة؛
وتاني اصبح الاستاذ حسن يصحح لي بممتاز كبير حتى نهاية اولى ليلاقيني لاحقا في ساتة؛
واذكر مشينا عصر يوم؛ وكان شتل البصل عند الاستاذ حسن.. وشتلت 4 احواض واعطاني الاستاذ 6 قروش فقد كان الحوض بقرش ونصف
واذكر ان استاذي المبجل جاء في الفصل صباحا واعلن عدد الاحواض والمبلغ
وقد سعدت سعادة ما بعدها..
ومرة سال الاستاذ حسن عن من يعرف حرف اسمه القاف
وكان جوابي: انه زي الفاء ولكن فيهو نقطتين.. واذكر ان استاذي شعر بسعادة بالغة
وقد سالني من الذي علمك الحروف والارقام
فقلت عبدالوهاب اخوي
مع انه للحقيقة والتاريخ والذكرى فان اختي عشة بشيري هي التي علمتني الحروف وكتابتها والارقام وكتابة بعد الحاجات الساهلة زي اب وام واخ واسمي
ولا ادري سببا جعلني لا اذكر معلمتي الحقيقية التي ربتنا لاحقا (بالقُشْقُشْ) كما علق وهبة دا زاته ذات مساء وونسة..
اعتذار كبير ومتاخر لعشوشة الرشوشة
وكل الحب لها ولوهبة وكل الاحترام لاستاذي الجليل حسن عبدالرحيم عثمان..

[عبدالمنعم الطيب حسن]

...
قال ابوي بعد شاكوش يصف ست الشاكوش :
يا ام شركا هبر تب قمَٓح القجاج
انتي مدينة بس واللاخرات حُجاج
..
وقال في نفس الشاكوش ولسته:
ما يستاهلك العريبي راعي الضان
يستاهلك برنجي حريف جيبو ملان
ركب عربتو بوووو ادلى في ام درمان
..
وقال يصف حاله بعد الشاكوش:
بام (صعيب)' تراني احوم
ومتحزم علي بطني وبقيت موهوم
بخيت السجلك واخد عليك رسوم
وبعد الحالة دي لي ريدة مافي لزوم
..
في لزوم يا جماعة يسال اهل مجلسه
فيرد المجلس: مافي لزوم مافي لزوم
..
'(ام صعيب)=اسم قديم لحلتنا

[عبدالمنعم الطيب حسن]

- عين السِيد بِتْزيد -
(اشارة عبدالدايم اخوي في اخريات الإجازة، عن حال شديراتي المسميهن انا حديقة، في بيتي الكائن بواوسي الشيخ عبدالقادر،) وقد راى ان الليمونات، وقد زادت اخضرارا وليمونن، والسَمَرة والسيالة خضرا وميالا..
والسدرة سدرت، والقرض حتا..
حتى النيمات وقد تكاثف ظلها..
والقمريات وودابرق، ومرتو.. الطير كله استكان وبنى اعشاشا، وقد وزع له محمد وفاطنة الموية هنا وهناك.. واصلا الجدول طوالي ماشي،
حرفيا معظم الإجازة بكون قاعد تحت الشديرات ديل..عنقريبي الهبابي، وجوالي والشبكة تحت الشدر فل اوبشن..
وكم كرسي وكتبي وجرائدي..
ومرات اغفو..
بي شوق عظيم لتلك الأنحاء..

[عبدالمنعم الطيب حسن]

المزرعةالسعيدة

[عبدالمنعم الطيب حسن]

والله يا منعم نجاة دي ملالة بس
احياااا انا..
عبدالرحمن دا كب..
محمد على دا اطيب زول
الخالة نفيسة دي فسلة شديد..
وعمر خواف..
ديل كلهم ناس من حلة صديقي منتصر
القابلتو هنا في الغربة..منتصر يتحدث معي وكأني بعرف الناس ديل، وكاني من حلتم
التي لم اراها ولم اسمع بها الا عندما التقينا هنا
على ضفة الصحراء.. في الاول استغربت، لاحقا مشيت ولما كانت تجيهوا خطابات،، كنت بسالو عن بعض الناس والتطورات، لاحقا جدا كان يمرر لي الخطابات، وامرر ليهو خطاباتي..
....
وظل يونسني هنا على مدى السنين عن ناس حلتم، وبقيت احب البحبهم واكره البكرهم، وعموما هو بكره معظم ناس حلتم والحلال المجاورة...😂😂😂
..
كلو زي دا .
المهم

سف وقارن كما يقول صاحبنا
عبدالله ود البوش
..
البوست دا مهداه لودالبوش،
الذي غادر بيته في جبرة،،
واستقر في بيته الجميل في غرب الجزيرة
صقيعة سلامة .
كل الحب للحلوين هناك
وبرضو مهداه للصديق العزيز
عبيد حسب الرسول الشيخ
في قرية بريبيرة ريفي المناقل..

[عبدالمنعم الطيب حسن]

محمد الفكي اول قحاتي يختها واضحة،
والغريبة قالها في وقت انحسار جنجويده واقتراب النهايات، ولكنها الضغوط والعمالة..
...
ياخ منقة دا غبي، وشكلو قابض على تقيل..
اصلا الدعم ما فضل فيهو حاجة والشعب وجيش الشعب مصر على دفن اخر جنجويدي في الخرطوم..
كنا ممكن نقول كلام كاسات هههههها
لكن منقاوي دا شكلو ما راجل كاسات..
دا النوع داك البكون كل القعدة كارهاهوا رغم انو بشرب ربع كاس، وبدفق كاس،
وبفط كم كاس....
اول واحد يشعشع بطردو..
وبعد ما تشعشع كل القعدة بتفتش عليهو فيهم ناس عنيفين ونقط نقط..
ولما يكتشفوا الطردة يشكروا الطارد الاول
وتستعدل جلسة الانس..
سمعنا -وسلمنا- في ناس قالوا بطبخ للقعدات وبتخارج بدري😂😂
يكفي ان صديقه وخليله المراهق جعفر سفارات داك..
المهم
#منقة_انتهى

[عبدالمنعم الطيب حسن]

لها الرحمة والمغفرة ولكم الصبر الجميل
ان الحزن على الام يا علي يصحبي
يستمر طويلا وابديا وسرمديا..
لقد غابت امي منذ نحو 18 عاما..
ما زلت حتى كتابة هذه الكلمات ابكيها سرا وعلانية..
افتقدها في الملمات العصيبة وما اكثرها..
وعندما اكون وحيدا سائقا في شوارع الرياض السريعة، تاتيني ذكراها وذكرياتها وتتهيج جواي المصيبة والغياب، وسرعان مع تنساب الدموع..
ابكيها وارتاح قليلا .
وفي كل مساء احكي لها واسمع منها ذات الحكايات والتعليقات والنكات.
اسمعها كل ليلة، اسمعها، واضحك في حزني وانتشي..
امك هي امنا كلنا يا علي ..

[عبدالمنعم الطيب حسن]

كتب صديقي عادل سناد،،
.............👇
رحم الله الحبيب أحمد الطيب بشيري
وبرحيله تكون القريه قد فقدت عزيز لديه قدره فائقة على الامتاع والمؤانسه وبث روح الغبطه والسرور في نفوس جالسيه
الراحل المقيم الحمودي نسخه نفدت من مكتبة قريتنا ويصعب طباعة نسخه أخرى منها طبق الأصل
الحمودي يمثل طيبة وعفة ذلك الجيل المسكون بحب الناس واسعادهم
لا خيل عنده ولا مال ودائماً ما يسعدك برطب لسانه ودماثة خلقه
الحمودي لم يمت طالما انت هنالك والباقون
نسأل الله أن يحفظم ويتقبل الحمودي في عالي الجنان
وشآبيب الرحمه تتنزل على قبره
والبركه فيكم وفي ذريته
ولا حول ولا قوة الا بالله
وإنا لله وإنا إليه راجعون

[عبدالمنعم الطيب حسن]

احمد اخوي،،،الرحيل المر،،
تاني قام واحد جميل من اخواني مات،
.......
يا منايا حومّي حول الحمى واستعرضينا
واصطفي
كل ّ سمح النفس بسّام العشيات الوفي
الحليم َ العف كالأنسام روحًا وسجايا
......
غادرنا قبل ساعات احمد اخوي
الوسيم الفهيم،
البقسم العدم،
البشيل فوق الدبر والدم،
،،،،
فقدنا في ظرف شهر
رحمة احمد الطيب الشيخ بشيري
واخوها
محمد احمد الطيب ود بشيري،
ومحمود اخوي
واليوم احمد اخوي
وما نقول الا ما يرضي الرب،
وان لفراقكم لمحزنون
وانّ لفراقك يا احمد الطيب لمحزنون،،
،،،،،
قام الكي اجدد تاني وهو لم يبر بعد،

[عبدالمنعم الطيب حسن]

جهزنا كل متطلبات حلة العزابة القطر قام..
انا وطارق الحسن،
واخر حاجة اللحمة مشينا لصاحبنا الجزار الباكستاني..
كم الكيلو؟
-20 ريال
وعندنا 16 ريال
طارق اقترح نشتري نص كيلو بعشرة
-انا
هات 800 جم ب ال16 ريال دي..
الحزار
- كيف هذا صديق
شرحت ليهو القصة اقتنع ولكنه
نقنق:
-انا 30 سنة هنا حزارة رياظ مافي نفر اشتري كدة
😂😂
،،
وطارق قرب يسميني 800 جم
المهم
ضربنا ال800جم، ضرب من لا يخشى القاوت
هذه الذكري بمناسبة عيد ميلاد صديقي
طارق الحسن محمد الحسن،
الذي يقضي اجازة الصيف بالقاهرة
الف صحة وهناء يا ترس
طارق الحسن السنوسى

[عبدالمنعم الطيب حسن]

في سيرة الناس الطيبين وبُساط
او
عبيد حسب الرسول الشيخ،

اول عمل اشتغلتو بعد الاقامة كان مع عبيد دا كان ذلك في مطلع 1998،
ومنذ ذلك التاريخ لم نفترق ابدا عملنا لسنين طويلة ذات العمل..
وكان عملنا ميدانيا في كل المملكة من تبوك في اقصى الشمال للطايف وفي وكل مدن المنطقة الشرقية،
الخبر والدمام وعنك والقطيف والجبيل، وراس تنورة
وحضرنا حفل في شاطي نصف القمر للفنان محمود عبدالعزيز..
وقربنا نعبر جسر الملك فهد وندخل البحرين
ثم مشينا الطائف ومكة وجدة
وفي كل مدينة مدة المشروع اقلاها شهر،
ومعظم شغلنا في الرياض..
وسكنا سويا في كل تلك الاصقاع شقق مفروشة.ونرتاد المطاعم..
عبيد له خاصية عجيبة فهو يعرف كل الشوارع والمداخل والمواقع في كل تلك المدن..
وهو اشهر مغترب ركب قدام جوار السائق
فقد كنت طوال تلك السنين انا السواق..
(حتى عندما اشترى عربية خاصة به، كنت انا السواق..ههههها)
وعبيد مقعد امامي، وجاء والدته ووالدته هنا..
وقد سفرنا والده من الرياض لحدت مكة ومطار جدة
استغرقت الرحلة اياما..
وقبلها كنت استانس مع عمنا المرحوم حسب الرسول بالساعات وهو في مقام ابوي وكان يضحكني دوما.. وخفة دم عبيد ورثها من والده اللطيف، خفيف القلب والروح..
كان عندنا مشروع مع صاحبنا هنا في الرياض
وفي فترة المشروع توفى ولد صاحبنا البكر وحزنا عليه حزن السنين وهو صديقنا المشرك
قلت لعبيد بعد فترة من الوفاة وانتهاء المشروع
- يا اخوي قريشاتنا العند فلان ما منها خبر
- اسكت يا زول قريشات شنو كمان
نبقى عليهو اتنين، نحن والدنيا..
اعفي بس ولا تذكر الموضوع دا تاني
وقد فعلت
عبيد انسان نبيل..
نحن جيل واحد تخرجنا سويا من مصر وتعارفنا هنا
هو حزب امة وانا يسار حزب الامة
ذهب لارتيريا مقاتلا من مصر مع قوات الامة
وعندما طُرح علينا للذهاب شرقا مع قوات مجد..
انا النصيحة اعتذرت، كانت الظروف صعبة تلكم الايام.. وقدّرت ان امي تحتاج للمصاريف شهريا..
لدواء الرطوبة والناقص من مصاريف الحياة اليومية، ومية ريال من السعودية تسعدها ايما سعادة..
وفعلا..
انا مشيت السعودية عمرة
وعبيد مشى ارتيريا
ولحق بنا بعد سنوات في السعودية..
طوال الربع قرن دا بيننا الاف الحكاوي والذكريات وحب بلا حدود,
عبيد صديقي ومن القلائل الذين احبهم بلا تحفظ..
نختلف نتفق نتشاكل لساعات ونعود زي الاخوان..
عبيد الان في الجزيرة، وولده الشيخ على وشك الدخول للجامعة.
..
ووشيهو ملان وقلبو كمان،

[عبدالمنعم الطيب حسن]

Elsadig
هلا الصادق، تسلم اخوي..
غالبا زعلان ليك، ولي نفسو،
ولي وهمة الغربة، ولي الامال البقت سراب،،
...
بتاع التخرج تلقاه اتخرج ٢٠٠٥ فاعتبرك ديناصور، وزعل ليك، عاوزك دفعتو ياخ اتغزر بيك، الناس بتتغزر بالدفعات،
وبتاع الاطفال الصغار بكون زعلان على تاخير الزواج، كيف يعني شكلك خمسيني مثلا واكبر واحد عمرو ٥ سنوات، اتزوجتا متين اصلو،
والبزعل كونك مطوِل في الغربة والحصيد لا يناسب سنواتها..
وزعلان على نفسه كونه في الغالب ذات المحطة..
وبتاع العربية تمناها ليك وليهو..
كل منا يا صاحبي يرى نفسه في الاخر، ويزعل للاخرين ولنفسه ويحلم بالعودة والرجوع لوطن القماري..

...
عد فات زمن القلوب اللهفة والراكوبة الملاذ،
...
بالله دا كلو ما بزعل يالصادق،
يزعل ونص وخمسة
..
تحياتي للحلوين بطرفكم ايها الفنان،