التونسية

[شبارقة]

المشاركة الأصلية كتبت بواسطة AMAL

شبارقة والبوستات ذات الطعم واللون والرائحة
ياخ شكرا ليك
كنت فاكرة بقصدوا زول مشي ومابرجع تاني زي بن علي كدا
شكرا ابو البنات

أوووو بت الشيخ شخصيا ً .. حبابك

عمي قرفان طوالي وزهجان من مرتو .. يوم قلت ليهو : ياخ مالك مع مرتك دي .. قال لي : والله المرة دي مجنناني في رأسي ده .. ما باقي ليها إلا تركبني التونسية وسألتو شنو يعني تركبك التونسية؟ ولقيتو ما عارف وأنا ذاتي كنت ما عارف.

تسلمي يا آمال ،،،

[شبارقة]

المشاركة الأصلية كتبت بواسطة الرشيد اسماعيل محمود

سلامات يا شبارقة،، ومبروك البوست الجديد (بعد غيبة)
في منتدي كوورة سودانية في عضو فاتح نفس البوست دا، وفي النهاية نوّه لي إنو البوست فاتحو شبارقة في سودانيات وهو قام بنقله للفائدة العامّة، في البداية أنا قلت يمكن شبارقة دا، مشترك في منتدي كوورة وهلالابي كمان.
في رأي إتكتب في نفس البوست ومخالف للرواية الإنت جبتها كاتبو عضو مسمّي نفسو (أبو عكّاز) بقول:

دة الرابط:
http://forum.kooora.com/f.aspx?t=32719379

تحياتي يا الرشيد

ومبروك البوست الجديد (بعد غيبة)

البعد غيبة أنا ولّ البوست الجديد ؟

زمااان كان في كازينو في الخرطوم إسمو : كازينو حمـّاد العائم .. قام واحد قال للتاني : العائم دي قاصدين بيها حمـّاد ولّ الكازينو ؟

الغريبة البوست بتاع التونسية ده أنا فتحتو صباح اليوم وطوالي ناس كوورة ديل شالوهو (صرة في خيت) .. معناها إنو الأخ الطوفان الأزرق إما عضو معانا هنا أو متابع لنا وفي كل الحالات نحن نشكره طالما ذكر المصدر .. صاحبنا أبو عكاز قصتو معقولة إذا لم نستصحب إنو أيام نميري كان ممنوع منعا ً باتا ً كتابة أي عبارات على عربات الحكومة وبالذات عربات الشرطة والجيش بخلاف الباص بتاعنا الذي كان (خردة) وخارج الخدمة ولك أن تكتب عليه ما تشاء.

شكرا ً يا الرشيد ،،،

على جنب: أظنك يا الرشيد إنت بحثت في النت عن قصة التونسية عشان كده ظهر ليك الموضوع بتاعي في نفس اليوم هنا وهناك.

[خالد غالي]

سلامات ياشبارقة

القصة الانا بفتكرها لكلمة التونسية دي هي انو في ثمانينات او تسعينات القرن المنصرم حصل حادث لطائرة الخطوط التونسية واظن ماتو كل الركاب وبعد داك ظهر المصطلح بتاع ركوب التونسية ده

[الرشيد اسماعيل محمود]

المشاركة الأصلية كتبت بواسطة شبارقة

على جنب: أظنك يا الرشيد إنت بحثت في النت عن قصة التونسية عشان كده ظهر ليك الموضوع بتاعي في نفس اليوم هنا وهناك.

أبداً يا شبارقة، شفت البوست حقك أوّل ما نزل، أنا عضوية خاملة في منتدي كوورة، لكن يومياً بدخل الساعة حداشر صباحاً أقرا الصحف الرياضية البتنزل بشكل ثابت هناك، لقيت نفس العنوان، دخلت لقيت كلامك، بس حقوقك حفظوها ليك.
عموماً:
روايتك بالنسبة لي أكتر منطقية من حقت أبو عكّاز

[طارق صديق كانديك]

سلام يابلدياتنا

البعجبني في كتابتك تجويد الفكرة ودائما الواحد بطلع منك بجديد. فشكرا ياخي على كل شئ.

بيني وبينك كانت فكرتي مشابهة لفكرة اخونا خالد غالي،ويبدو كنت راكب التونسية

تحياتي

[طارق صديق كانديك]

المشاركة الأصلية كتبت بواسطة كيشو

هسي الزواج دا كيف من الناحية الشرعية والقانونية؟

صباح الخير يامولانا

تحياتي ليك وللاخ فتحي وسيد البوست وضيوفو

يثير هذا التساؤل الكثير من النقاط القانونية حول عيوب العقود ، وبالفعل ذاك مبحث كبير الحديث فيه يطول ويتفرع ليشمل عيوب العقود كالغبن والغرر والتدليس وغيرها.

وبحسب ماورد في القصة، ان استمرار الزواج يرفع الرضا المعيب في أول التعاقد، الذي كان سبباً كافياً لفسخ العقد مباشرة، كما أعتقد.

خلوني أوعدكم ببوست إسمو( نافذة قانونية) سأشرع فيه قريبا جداً، نتناول فيه البنقدر عليهو ونتعاون فيه جميعنا.
ـــــــــــ
من شفتك ركزت على سيد اللبن قلت النحلق الزول ده نشغلوا بالقانون

[رأفت ميلاد]

المشاركة الأصلية كتبت بواسطة الرشيد اسماعيل محمود

أبداً يا شبارقة، شفت البوست حقك أوّل ما نزل، أنا عضوية خاملة في منتدي كوورة، لكن يومياً بدخل الساعة حداشر صباحاً أقرا الصحف الرياضية البتنزل بشكل ثابت هناك، لقيت نفس العنوان، دخلت لقيت كلامك، بس حقوقك حفظوها ليك.
عموماً:
روايتك بالنسبة لي أكتر منطقية من حقت أبو عكّاز

تعرف يالرشيد مشيت بهناك فى زول ولّ زولة ما عارف علق قال (يمكن الكتبا على الكومر قاصد تونيسية شبارقة) وده وارد شديد وشغلانية الكومر كشات ..

غايتو ناس كوورة ديل شكلهم رشاشات ومتعودين على التونسية

[أمير الأمين]

المشاركة الأصلية كتبت بواسطة طارق صديق كانديك

من شفتك ركزت على سيد اللبن قلت النحلق الزول ده نشغلوا بالقانون

اتنين لو قالوا ليك راسك مافى أهبشو

[رأفت ميلاد]

المشاركة الأصلية كتبت بواسطة زول الله

والله يامقدس باقيلي اذا شرحنا قصة التونسية زي ماوصلتنا ح تبقى مشكلة
ف قلنا نخلي الناس تعرفا بي شرح شبارقة المحترم دا
اهو في النهاية كلو ترحيل

سنة يالحيطة






اقول قولي هذا واستغفر الله لي..................

حقو تفتى لينا وشبارقة يشيل شيلتو .. جابت مساطيل وكشات ما عارفة المصيبة الأكبر من كده شنو

تعرف مدنى كانت المصدر الأكبر للحاجات دى .. كان فى مشاغلة كده ما عارف قصتا .. بقولوا فيها (وشك) ويضيفوا ليها يا جميل .. يا عسل .. يا أنت ولّ حاف كدة .. فى دكتورة مفلقصة كده زمن الدكاترة النسوان يتعدن على اليد .. طالعة فى الكفر وسايقة ليها عربية .. قام واحد شرامى كده ناداها (وشك) .. أندرعت فيه لامن دخلتو الحراسة .. من اليوم داك غلبتا المرقة .. تدخل سوق الخدار كلو يكورك (وشك) من بياعين وزباين .. المستشفى (وشك) السينما (وشك) لامن طفشت من البلد

[شبارقة]

المشاركة الأصلية كتبت بواسطة خالد غالي

سلامات ياشبارقة

القصة الانا بفتكرها لكلمة التونسية دي هي انو في ثمانينات او تسعينات القرن المنصرم حصل حادث لطائرة الخطوط التونسية واظن ماتو كل الركاب وبعد داك ظهر المصطلح بتاع ركوب التونسية ده

مرحبا ً بالأخ خالد

ما ينفي هذه الفرضية إنو الخطوط التونسية كانت مميزة جدا ً في كل شئ .. لم تتعرض لأي حادث طيران في ذاك الوقت .. بحثت في النت ووجدت إنو أول حادث ليها كان في إيطاليا في سنة 2005م وكان حادث لطائرة صغيرة تحمل 34 راكبا ً إيطاليا ً (سواح) بالإضافة إلى طاقم الطائرة وكانت في طريقها من مدينة باري الإيطالية إلى جزيرة جربة التونسية وهبطت إضطراريا ً في البحر ونجا منهم 24 راكب.

شكرا ً يا خالد ،،،

[شبارقة]

المشاركة الأصلية كتبت بواسطة الرشيد اسماعيل محمود

روايتك بالنسبة لي أكتر منطقية من حقت أبو عكّاز

شكرا ً يا الرشيد

تسلم ،،،

[شبارقة]

المشاركة الأصلية كتبت بواسطة طارق صديق كانديك

سلام يابلدياتنا

البعجبني في كتابتك تجويد الفكرة ودائما الواحد بطلع منك بجديد. فشكرا ياخي على كل شئ.

بيني وبينك كانت فكرتي مشابهة لفكرة اخونا خالد غالي،ويبدو كنت راكب التونسية

تحياتي

هلا وحباب أخونا ود كانديك

تشكر يا طارق على ذوقك وكلامك الطيب

طبعا ً كما كتبت في ردي على الأخ خالد لم تتعرض التونسية لأي حادث في تلك الفترة .. وهذا ما يدحض الفكرة بتاعتكما

[شبارقة]

المشاركة الأصلية كتبت بواسطة رأفت ميلاد

تعرف يالرشيد مشيت بهناك فى زول ولّ زولة ما عارف علق قال (يمكن الكتبا على الكومر قاصد تونيسية شبارقة) وده وارد شديد

هو زول يا رأفت ومسمي نفسو (الحلفاوي) وكلامو منطقي في إنو العسكري الكتب التونسية في كومر الحكومة (إذا كـُتبت فعلا ً) يكون سامع بالتونسية الأصلية المكتوبة على الباص.

[لنا جعفر]

شباااارقة...مشتاقين ياعاصم ياخ
ليك وحشة....
امس اتذكرناك بي حاجة جميلة انا وبعض الشباب
صحيت لقيت بوستيك...توارد غريب
المهم انا محيرني ياخ السودانيين ديل
لي قصة واحدة تلاقي تمنمية مصدر
وانت كرطاني ومن (خير) غير الناطقين بها تكون مسططططح ومستمتع
والمدهشني اكتر رأفت الما نستو مدن التلج الحكاوي دي
بوست جميل وزي ماقال كانديك بتوصل فكرتك من الاول
وتقعد تقابل المتونسين والمتونسات
اتوحشناااك يازول انت وبوستاتك
تحايا للجميع الهنا ومحبة برضو

[شبارقة]

المشاركة الأصلية كتبت بواسطة لنا جعفر

شباااارقة...مشتاقين ياعاصم ياخ
ليك وحشة....
امس اتذكرناك بي حاجة جميلة انا وبعض الشباب
صحيت لقيت بوستيك...توارد غريب
المهم انا محيرني ياخ السودانيين ديل
لي قصة واحدة تلاقي تمنمية مصدر
وانت كرطاني ومن (خير) غير الناطقين بها تكون مسططططح ومستمتع
والمدهشني اكتر رأفت الما نستو مدن التلج الحكاوي دي
بوست جميل وزي ماقال كانديك بتوصل فكرتك من الاول
وتقعد تقابل المتونسين والمتونسات
اتوحشناااك يازول انت وبوستاتك
تحايا للجميع الهنا ومحبة برضو

أهلا ً وسهلا ً ومرحبا ً بالأستاذة / لنا

غايتو مداخلتك دي حقو أقشر بيها .. أعرض بيها وأقعد أدوبي

المهم انا محيرني ياخ السودانيين ديل
لي قصة واحدة تلاقي تمنمية مصدر

فعلا ً .. خيالنا واسع ياخ

والمدهشني اكتر رأفت الما نستو مدن التلج الحكاوي دي

تعرفي يا لنا عمك رأفت دا جرابو مليان حكاوي وبلاوي بس داير ليهو واحد يبدأ ليهو الموضوع .. ينطبق عليهو المثل : الـ بلقى الهواء يضري *

شكرا ً ليك تاني يا لنا ،،،

* غايتو المثل دا إلا يشرحو ليكم طارق كانديك أو فتح العليم