عندما رقصت مايا بين عبد الله جعفر وإبراهيم الكامل

[عكــود]

ألف شكر يا أسمر،
وتعجبني متابعتك واهتمامك.

[هيثم علي الشفيع]

ياااااااااااااا إدارة فنية

ويااااااااااااااااا الزوووووول

ويااااااااااااا أشرف السر

هووووووووووووووي

أنا عندي مداخلة غليييييييييييييييييييدة في البوست دة
كتبتها الخميس
وجاي الليلة أشوف أستاذ (عبدالله جعفر) والعمدة قالوا لي شنو عنها؟؟؟

ألقاها مافي؟؟؟؟؟؟؟؟؟

وما تقولوا لي أكتبا تاني ..
عشان ....هي ذاتا كانت شنو ؟؟

نسيت



إلاّ




ما عافي ليكم

[عبد المنعم حضيري]

أسمر يا راقي

كتر خيرك كتير على الفديو

تسلم

[Abdullahi Gaafar]

اسمر يا جميل

الف شكر علي التسجيل والذي يمكن فيه متابعة حركة كل أعضاء جوليا مع الطنبور
مبااالغة
انا شفتها في التسعينات ترقص مع طنبور ود اليمني ومن اليوم داك كل ما اشوف واحدة بترقص شايقي بقارن بيها

جوليا موهوووية وممكن ترقص علي اي ايقاع بس في الشايقي مخالفة
شكري وودي
عبد الله جعفر

[Abdullahi Gaafar]

هيثم
سلام
وجيتك براها هنا تدي البوست نكهة مميزة ....وبرضو لو في طريقة يا ادارة فنية ترجعو الكتبو هيثم

تحياتي وتقديري

عبد الله جعفر

[ناصر يوسف]

غايتو بغد التحليل العميق لرشيدويه
وبعد كلام الجميل عبد الله جعفر عن مايا و التربال ابراهيم الكامل عكود وعن جوليا

يعلم الله تاني ما عندي كلام

ياخي اقول ليكم شنو غايتو غير


احبكم جت عليكم

البوست ده جدد لي فكره قديمه حأستأذنكم إنياطرحها للنقاش العام ببوست منفصل

لا حولة ولا قوة الا بالله

كتابة تتعب احاسيس الزول ومحاثيثو ظاتها ياخ

[عكــود]

سلام يا هيثم وعساك طيب.

ياخوي مداخلتك دي ما نزلت هنا، فأنا متابع البوست مداخلة مداخلة.
لو كان نزلت واتحذفت بالغلط، كان من السهولة إرجاعها.
والأمر كذلك فما لك غير إنك تتوكل على الحي الذي لا ينام و
تكتبها تااااني؛
وللإحتياط، أكتبها في الويرد وأنسخها هنا.
للضمان يعني.

تحياتي.

[هيثم علي الشفيع]

التحية والتجلة والتقدير
العمدة عكود
أستاذي المبجل عبد الله جعفر

شكري وتقديري لاهتمامكما


و





وحاااااااااااااة سيدي علي*
نزلتها هنا ..

ورجعت قريتا بعد التنسيق والحذف والإضافة


كمان عاوز تطلعنا زهمرنا يا عمدة؟؟؟
ياخ أنا لسة ما بقيت على الزهايمر
و -حلااااااااتي-
صغير وجاهل


المهم:


المداخلة كانت عن :
الحديث الطيب الذي أورده الأستاذ عبدالله جعفر
عن إبراهيم الكامل ...وعن المقطع العامي والفصيح الذي أتى فيه
وكتبت ما معناه
(دهشة تتحدى فغر الأفواه)

وطالبته بالمزيد

وطالبت شخصك الموقر-يا عمدة-
بايراد بوست -بل بوستات-
عن العالم/التربال/المبدع :إبراهيم الكامل

وشاغلتك في آخرو...
بي
(ما تخاف....ما بنقول ..محسوبية)




أها..


روحّوا لي دة ذاتو


______________
* أوردنا قبل ذلك أن "سيدي علي" المقصود هنا
هو السيد/علي الشفيع محمدصالح متّعه الله بالصحة والعافية

[عكــود]

سلام تاني يا هيثم،

خالد، رحمه الله، كان بدأ بوست توثيقي عن التربال ولم يمهله العمر لإكماله.
البوست فيه الكثير وتجده هنا:

http://sudanyat.org/vb/showthread.php?t=17644

تحياتي.

[فيصل سعد]

المشاركة الأصلية كتبت بواسطة عكــود

سلام يا هيثم وعساك طيب.

ياخوي مداخلتك دي ما نزلت هنا، فأنا متابع البوست مداخلة مداخلة.
لو كان نزلت واتحذفت بالغلط، كان من السهولة إرجاعها.
والأمر كذلك فما لك غير إنك تتوكل على الحي الذي لا ينام و
تكتبها تااااني؛
وللإحتياط، أكتبها في الويرد وأنسخها هنا.
للضمان يعني.

تحياتي.

سلامات يا عمدة يا حبوب و ماك طيب،، طيب مداخلتي
انا مالك ما رديت عليها، يعني إلا الزول يبقى شايقي و يكسر
لسانه قواسيب قواسيب حتى تردوا عليه

أرقد عافية..

[عكــود]

المشاركة الأصلية كتبت بواسطة فيصل سعد

التحايا و التقدير للاخوين الكريمين الدكتور عبد الله جعفر و إبراهيم الكامل على هذا الإبداع المتفرد،، تذكرت أن الراحل المقيم الاخ خالد الحاج في إحدى زياراته للخرطوم كتب بوستا حميما عن إبراهيم الكامل مدعما بصورة لإبراهيم بمنزل خالد الحاج يظهر فيها جليا بساطة و تواضع العلماء..

مجدد التحايا..

المشاركة الأصلية كتبت بواسطة فيصل سعد

سلامات يا عمدة يا حبوب و ماك طيب،، طيب مداخلتي
انا مالك ما رديت عليها، يعني إلا الزول يبقى شايقي و يكسر
لسانه قواسيب قواسيب حتى تردوا عليه

أرقد عافية..

حبيب الشعب فيصل،
ليك السلام مطبوق.

أولاً، كانديك ساعة رديت عليهو، ماهو مولود في الزومة
تانياً، البوست "روكة" وانت صاحب حق.
تالتاً، أعتذر ليك عن هذا السهو حتى ترضى عننا وتواصل معانا في البوست.

أبقى شمعة.

[فيصل سعد]

المشاركة الأصلية كتبت بواسطة عكــود

حبيب الشعب فيصل،
ليك السلام مطبوق.

أولاً، كانديك ساعة رديت عليهو، ماهو مولود في الزومة
تانياً، البوست "روكة" وانت صاحب حق.
تالتاً، أعتذر ليك عن هذا السهو حتى ترضى عننا وتواصل معانا في البوست.

أبقى شمعة.

عكود،، الزول الوسيم في طبعه دايما هادي
ليك السلام و التقدير و الاحترام، و الواحد
تاني الا يلكزك بمحنة انا عاذرك
تب و عارفك مشغول في عوم ناس بانكوك و كدا،
بخصوص الكاديلاك فهو اكيد مع ناس "من يرغب من
القبائل" و محسوب معاك تب.. أما لو دايرني ابقى
شمعة فادينا طلة في خاص بالأعضاء و طالبنك مداخلة
و تعقيب و خاطرة و رأيك يهمنا..

ابقى طيب..

[هيثم علي الشفيع]

عمدتنا الحبيب

قرأت الخيط الذي أهديتنيه من أوله لآخره

ولو كنت أعرف كيفية الإقتباس من بوست آخر
لاقتبست منه المداخلة الأخيرة للأخت (سمراء)
وهي تطلب منك مواصلة ما بدأه الخال العزيز عليه رضوان الله ومغفرته...



أرجو شاكراً من الإدارة الفنية
نقل "نسخة" من البوست المعني لمنتدى الحوار

على أن تتكرم -مشكوراً-
أخي عكود
بتكملة ما بدأه الراحل الغالي..

(وإن كان في ذلك بعض ثقل في نفسك)
أو

كما بدا لي..

[عادل عسوم]

سلام ياعكود
البوست دا (يزوزيلي) ليهو زمن والله...
لكنني ما أن (اهبش) يراعي إلا واسووف (الجوال ليس فيه إمكانية لتشديد على الواو)...
اعدك أن شاء الله بعودة إذ مافتئ نصا الأحباب الدكتور عبدالله جعفر والتربال الحميم إبراهيم عكود ينفحان في اروقتي بالشذا. ..
لكن ارجو ان تسمح ويسمح لي الحبيب عبدالله بهذه ال(وجهة):
بالنسبة ل(جوليا) اختلف معك يادكتور في كون رقيصها يعد (انموذجا) لرقيص الشايقية (الانثى)...
مافي شك انو جوليا مبدعة وقد اتقنت الرقيص الشايقي ايما إتقان من حيث التماهي مع الإيقاع وتناغم الحركة مع الكورص وعزف ودالبركل (وان كان قع يمسخا بي عزفو الشين دا)
أعود لي جوليا واقول:
جوليا بالرغم من ابداعها إلا أن (اسلوب) رقيصها ليس سوى (رقيص رجال)...
نعم رجال ياعكود ويادكتور عبدالله!...
فعيب جوليا انها (تنتر) يدها ولا (تتلها)...
وشتان مابين (النترة) و (التلة)!!!
و(تداعيها) مع الكورص وعزف الطمبور ليس سوى تداعي ذكوري ليس إلا.
وأرى بأن يسعى البعض منا إلى رفد البوست بأمثلة لرقيص نساء ورقيص رجال كي يتبين الأمر اكثر
اقول ذلك وفي الخاطر رقيص فتح فور وود الشايقي واب شنب...
ومن نسائنا ست النفر وست الجيل وبت البركل...
أها رأيكم شنو؟!

[عكــود]

سلام يا عادل،

ملاحظتك في رقص جوليا له ما يؤيده، لكن رقصها هو الرقص السائد مع إيقاع الدليب الآن.
فإيقاع الدليب اختلفت وتيرته من الإيقاع البطئ إلى السريع، وتبعاً لذلك فقد تسارع إيقاع الرقصات.
حتى بداية الثمانينات كان الإيقاع بطيئاً بعض الشئ وكانت أغنيات عثمان اليمني مثالاً لذلك:
تلّت إيدا ومالت شمالا
وميّلت حفلتنا بي حالا
يا ناس صلّوا علي جمالا

وأغاني النعام آدم، مثل:
مادام طار جنا الوزين يادوب قل نوم العين
لرؤياك مشتاقين خطفتا قلوبنا ركيت وين
و
يا مُحُمَد دا بلودو وين؟
قولِى امو منو ابوهو مين؟؟
انتنى ومال فدع اليدين
سوا عوم فرخ الوزازين
جسمو زى الملبن يلين
فى القرير ارضو اعز طين
تستحى القمرة من الجبين
جوز عيونو سهامن سنين
قلبى فى الدقات والرنين
تعترف تشهدلو بق بن
قبلى كم عشاق عديدين
زى دا ما شافو المساكين
عقلى اصبح فى جيم وسين
مانى عارف دارو بى وين
ابيض الفاطر بلا الصين
بسمو يشفوبو المجانين

تلّت الإيد وميلان الحفلة بي حالا وعوم فرخ الوزازين، لا يناسبه الإيقاع السريع؛ وهكذا كان حال أغلب أغنيات ذلك الزمان، تشابه إيقاع الجابودي والحُمْبيْ.
وربما يكون من ذكرتهن من أسماء (ست النفر وست الجيل وبت البركل) من جيل "جنا الوزين".

بعدها جاء الإيقاع السريع وساد، وخير مثال لذلك أغاني عيسى بروي وجعفر السقيد وعبد الرحيم البركل وغيرهم، فصار أقرب إلى إيقاع الرَتْرتو. وفي حقبة الإيقاع السريع ظهرت جوليا.
لذا يبدو لك أن رقص جوليا وغيرها الآن يشابه رقص الرجال.
شخصيّاً أفضّل الإيقاع القديم والوضوح في كلمات الأغاني المؤداه.

أما عن عزف عبد الرحيم البركل فاتفق معك تماماً بأنه "قع يمسّخ عزفو" رغم براعته فيه.

ده عن رقص جوليا، وفي إنتظارك عن عبد الله جعفر ومايا والتربال.

تحياتي.