*** مصطلحات عامّية سودانية ***

[أشتر]

المشاركة الأصلية كتبت بواسطة شبارقة

ياخ والله ذكرتني تعابير لي زمن ما سمعتبا ... شايل مدني ... شايل الخرتوم

أنت عارف كتيرين هنا ما بكونو فهموا جملتك الفوق دي .

الفِهِم كتّر خيرو والما فِهِم برضو كتّر خيرو ؟؟؟
طيب الناس دي بتعاين للتلفزيون ساي كدا عدم موضوع ؟؟؟
اول امبارح القريييب دا سمعتها من مرا عجوزة جابو معاها لقاء في قناة الشروق ...
ولّ بس عارفين شايلين المحنة وهمّنا نبني جنّة ...
هسي لو قالو ليهم بشيلوها كيف يقولو في قدح مونه ...

[أشتر]

اها يا شبارقة ...
من وين جات كلمة .. لنج ..
دي جديدة لنج ...

[تماضر حمزة]

المشاركة الأصلية كتبت بواسطة أشتر

اها يا شبارقة ...
من وين جات كلمة .. لنج ..
دي جديدة لنج ...

اهن من وين؟

[أشتر]

المشاركة الأصلية كتبت بواسطة تماضر حمزة

اهن من وين؟

وانا لو عارف كنت سألت ؟؟؟

[شبارقة]

المشاركة الأصلية كتبت بواسطة أشتر

اها يا شبارقة ...
من وين جات كلمة .. لنج ..
دي جديدة لنج ...

طبعا ً دي واحدة من الكلمات الأجنبية التي نستخدمها بمعناها وبنفس نطقها

زماااان لما كنا في الثانوي كان في درس في مادة اللغة الفرنسية بعنوان le nouveau وكان بيحكي قصة ولد جديد بالمدرسة ... وكلمة nouveau عرّبناها وأصبحت نيف ... يقولك : عجلة نيف ... وكتاب نيف ... وفيلم نيف .

أها قمنا سألنا أستاذ اللغة الإنجليزية عن كلمة لنج التي تقابل نيف فقال لينا لنج هي في الأصل كلمة لاتينية تعني (يادوب مخلوق أو يا دوب مصنوع) يعني حاجة جديدة بالمرة (launch) ... والعهدة على الأستاذ.

[شبارقة]

ما الفرق بين الطقطوقة والفرطاقة ؟

[آخـر المواني]

المشاركة الأصلية كتبت بواسطة فيصل سعد

سلام يا كوتش و مرحبيك بيجاي
اها بتعرف الجعمورة ؟؟

سلام ود سعد ..

طبعن اخوك لبد من الاجابة وكل يوم بجي اتاوق يمكن واحد يرمي الاجابة

قلت لي كلب الحر يعني حاجة خيالية ..!!

عشنا وشفنا ..

اهااااا ..

بتعرف البلقة ؟؟؟

[أشتر]

المشاركة الأصلية كتبت بواسطة شبارقة

ما الفرق بين الطقطوقة والفرطاقة ؟

لو قتا لي الطقطوقة شنو والفرطاقة شنو بوريك الفرق

[آخـر المواني]

المشاركة الأصلية كتبت بواسطة أشتر

لو قتا لي الطقطوقة شنو والفرطاقة شنو بوريك الفرق

الفرطاقة .. حسب منطقتنا .. هي ملاح بصل

مكوناته .. بصل + موية + نار + بهارات (ملح +شمار)
في البندر بسموهو (سخينة) و يضاف ليها دكوة

اما الطقطوقة دي ما عارفها ...

[شبارقة]

المشاركة الأصلية كتبت بواسطة أشتر

لو قتا لي الطقطوقة شنو والفرطاقة شنو بوريك الفرق

الطقطوقة بت طقطق والفرطاقة بت فرطق والماسورة بت نـقـّط

[فيصل سعد]

المشاركة الأصلية كتبت بواسطة آخـر المواني

سلام ود سعد ..

طبعن اخوك لبد من الاجابة وكل يوم بجي اتاوق يمكن واحد يرمي الاجابة

قلت لي كلب الحر يعني حاجة خيالية ..!!

عشنا وشفنا ..

اهااااا ..

بتعرف البلقة ؟؟؟

انت الظاهر عليك داير تدخلنا
في حيصبيص

[شبارقة]

المشاركة الأصلية كتبت بواسطة آخـر المواني

مكوناته .. بصل + موية + نار + بهارات (ملح +شمار)

النار بدل اللحمة ولا ّ شنو ؟

[فيصل سعد]

المشاركة الأصلية كتبت بواسطة أشتر

لو قتا لي الطقطوقة شنو والفرطاقة شنو بوريك الفرق

غايتو الفرطاقة دي ان ما اخاف الكضب
عندها علاقة بكيس النايلون و كدا
و الله اعلم ..

[فيصل سعد]

المشاركة الأصلية كتبت بواسطة أشتر

لو قتا لي الطقطوقة شنو والفرطاقة شنو بوريك الفرق

المشاركة الأصلية كتبت بواسطة شبارقة

النار بدل اللحمة ولا ّ شنو ؟

احتمال يكون قاصدة موية نار
و علامة الزايد + عترت ليو و كدا
تخيل يا عاصم انا متأكد في ناس معانا هنا
قطع شك ما بعرفوا موية النار !!

سلام ..

[آخـر المواني]

المشاركة الأصلية كتبت بواسطة فيصل سعد

انت الظاهر عليك داير تدخلنا
في حيصبيص

اها عشان نمرقك من الحيص بيص دي نشكل ليك ..
(بلقة) بضم الباء و ضم اللام مع التشديد وفتح القاف مع الترقيق






مع التأكد أن فتح الفاء و فتح اللام مع الترقيق والمرور ساي في القاف تعني العصاة التي يستخدمها شيخ الخلوة في معاقبة الطالب الذي لم يحفظ ورده













مشلعيب :
دا في حال قريت الباء فاء