عقد الياسمين

[جيجي]

سجمان
قلبي حلة..
شايلة في جواها كمين من خلوق..
والإنتشاء لمن يكون..
في الحلة كلها زول وحيد..
واقف على الصمام..
يحمّل في كرات الدم..
مهام حسي ويدفق فوقا..
هالات النشيد..
يحاسب في لسان مزماري
قبل الكلمة تطلع في الحلق..
يرويها تمرق بالقصيد..
ويحتحت في غبار كلماتي..
طول ما إنتي في
لا غبار عليا من ضلمة
وكبس.. من تاني إشراقي الجديد..

جيجي
لمن يكون
اشراق جديد
وجمال قصيد
كلماته ذي القيد تصيد
وحروفه بالاشعاع تقيد
فعلا بيكون الانتشاء
بس ماتنسى انه الانتشاء
ذي الشروق حالة زوال
وسر الحياة في الضلمة
ذي مافي الشروق
خليها حلتك التعيش
ذي مااراد رب الوجود

----------

[جيجي]

جيجي
كدي النحكيلك شوي عن القلب
قلبا عليل
مليان ودار
مجروح فراق
مكسور ظروف
مكتول ولف
متروك مع الاقدار يدور
يوم في الشرق ويوم في الغرب
يوم يمشي فوق
يوم تلقاه في السفلي التحت

------

سجمان
من تالايا ما غابت طيوف..
الليل مستف بالسؤال
والبال معطّن في الهموم..
للشايلو هم..
إلا ما واتت ظروف..
لفيتو شوقي الإنبهل..
"وجلة" وحبل
حقبتو جيتك ..
من همومك أوَجّلك..
من الفي القلب
شاحب وشيكي متلتلك..
والكان ولوف جافا ومشى..
أطري الزمن دولاب بلف..
يرجع يعود
الكان زمان بي هجرو
ناسي مسبلك..
راجيك تواصلي..
أمرقي منك وشوفي روحك
يمكن يبين مستقبِلك..

[جيجي]

سجمان
وكان..
ساحاتك فراغ
وكتين بكن بالشهقة..
أقسى الأمسيات..
وأنا بي قساي..
خانقاني عبرة
ودمعات تحندك في الخدود
مابي تنزل وتستحي..
للكان معمق..
فكرة النوى والشتات..
وفات رحول برق الصعيد..
وكتين يناوش في السحاب..
سافرتي فيهو بدون ميعاد
سافرات جوارحي وما اختشت
لحظة وداعك انفلات..
هشيني يمكن أنتبه..
في حضرتك..
لحظاتي في حضنك ثبات..

جيجي
في حضرتك
تبقى كل الدنيا انت
تتلاشى لحظات الزمان
وبنسى من وين الشروق
وانه في غروب كمان
وبيختلط وين الجنوب
وين الشمال
وببقى زي ضلك خيال
وانسى كل الناس
الا
خيالي
وحضرتك
--
في حضرتك
ببقى زي نفسك تمام
بسري في الشريان
واذوب
ببقى في قليبك حنان
وانفجر شوق زي بحور
واغرقك
----
في حضرتك
بصبح مدان لطلتك
اجثو واقبل كفتك
وابقى لحظات اندهاش
ضحكة صغير
لمسة حرير
وببقى زي طلة صباح
ضياه في عينيك يسافر
ويحضنك

---------------

[جيجي]

. سجمان
مشتاق طيوفك
والسكون لحظة تقيف
كلماتي في خانة صفر..
واتبن معاك
كل الرسمتو
معاك هناك..
يبقالي زي قطع الرحط
ذكراهو ما اتنتفت معاي..
قاعدالي هي..
والشوق تباعاً إتوهط..
ما تنسي تقري حروفي جيد..
صاحب العقل ياهو البميز ..
فطيت سطر وشرعت في السطر الجديد..
كيفن تميز بين نشيد..
وبين نشيد..
كيفن معاك نقدر نشيد..
الباقي من حبل انقطع..
ونساتنا والودع الحنين..
الودعتين والحمدو..
لغنايا ينبت "ريش" جديد..
براكي أقري وردي كان..
بغناكي بنتعش البَرِيد..

جيجي
طيوفك
ساكنة في الوتر البيدندن في القليب
مرات تجيب وترا غليظ مالياه شوق
مرات بتهمس بيه ريد
خايفاها يوم
مش زي رحط
تنتفلي شرياني الكبير
ويتكبى كل الفيه جووووو
زي خور كبير ساعة خريف
ويطفح كمان فوق البلد
وبيك يتهد الجريف
ويشيلك السيل للقليب
ماتخاف شديد:sad:
بتوصى بيك ويملاك ريش

----------------

[جيجي]

المشاركة الأصلية كتبت بواسطة سجمان
الوتر..
لمن فتر..
نقرشتا شعري علي الوريد
ودفقت فيو..
كوزين حسوس..
لما البلازما هناك شهق..
وطّيطو برضك بنسمع..
للجوة ساكن في الوريد مغروس..
علّيتو علانى وشرق..
الكان في أفلاكك بجوس..
ويجوز معاك..
الناس عموم تشرق تكوس..
يالتاية هوي ريشي النبت..
والكان مطوفش من زمن..
الليلة بي حرفك ثبت..
البيت هناك..
ولا نبحت كلاب..
ضيوفو جو والست تكوس..
تعالي تابعي..
وعن حروفك أبقي دافعي..
أصلو حرفي بلاك "بَرُوس"
وشلة أشواقي الهناكا..
ومن جديد..
تاني توّرت البسوس..

جيجي
ريشه زي طاوؤس تمام
مليان جنون كل الجمال
بيه اتجمل فتر
افرد جناحك للوجود
خليه كل الكون يشوف
الوانك الخاطفة البصر
واديني من حسنك كمان
خليني اتزين معاك
وادهش عيونك
والبشر
وابقى زي نجمك
الجنبك سكن
واسقيني حن
اسقيني ضيء
شان انور
وابقى زيك
ياقمر

-----------

[جيجي]

سجمان
ريدنا أصلاً هو الشعاع..
حاكرنو لي كل الخلوق..
لي كوني خيط..
لي وطني خيط..
للحلة خيط..
لي بيتنا خيط..
للدانقة خيط..
والقد علي ضل الضحى
برضو كان شاديهو خيط..
التربة والزرع النبت..
وبطونا بيهو اتستفت
برضو كان الخيط وسيط..
وكل زول في الدنيا دي
خشاها بي قطع الشريط..
شفتي كيف الريد موزع
عندي في الكون الوهيط

يعني ريدك مالي كل الدنيا
ضيه
هو المعتق بي جمالك
ومافي زيه
زيدوا ريدك
عبي كل الدنيا منه
وبرضوا ارحم
ومد خيوطك
ماظنك يوم بتبخل
بي فتيلة انشاء الله
منه

----------

[جيجي]

سجمان
ياهو الفضل من باقي ريدك..
شلتو بي آخر نفس..
كفيتبو كل الـ"ما" و"من"
بليتبو تعب الطين وكت..
فارقتي غبتي وراك يبس..
خيط الشعاع ما بنتهي
في العتمة يجري وراك لهث..
وكت إنتي في..
واليني حنك بالدفي..
فرّة وشي..
قمر العشي..
من نور وجيهك مقتبس

جيجي
يا زول عجيب
ياخيط شعاع
املاني ضي
وانسج خيوطك
توب حنان
وارسم قليبك ولونه
ولف بيه الروح ولف
وخلينا نكتل بالحنان
خلينا نكتل بالولف

-----------

[جيجي]

المشاركة الأصلية كتبت بواسطة سجمان
ساساقي شقيش..
من الشروق لا عن هنوووووووووك
مقتل شعاع نور الشمش..
ضراعي يكدح
وبرضو شايل معاي
هم الغبش..
وهم ريد دفقتو علي الدرب..
راجي طلة تنعوشو
يفردو من هذا الكمش..
يا طلة أكبر من شنو..
القاكي وين
أدفي قلبي المترعش..

جيجي
تلقاني في انة جريح
دمومه سالت بلته
وتلقاني في دمعة صغير
وجفلته
يوم اهله فاتوا ودعوا
وتلقاني في الالم البنازع
وفي دروب كل الغبش
ويمكن الاقيك في العريش
فى كوم ملابس
او يعني كرتونة اكل
او كيس درب
او حتي بس جقمةدواء
توقف نزيف قلبا
بس قطرتين
ويكون هلك
---------
بلقاك في عيون اليتامى اتشتتوا
وبلقاك في حرقة حشاام عيون اتقددوا
وبلقاك في عيون بنيتا جافلة من ضرب العدو
وبلقاك قدام الجيوش
ياوليد عزة ومهيرة
في غزة
وجباليا
مكان الصغار اتشتتوا
وسط نيران بيوتها
بالاخضر المتلفحوا

--------------
للتوضيح
الكلام دا كان ايام ضرب غزة
واخوناسجمان كان مودي معونات في العريش

[جيجي]

سجمان
فتشت ما فترت يداي..
قلبت ما خليت مكان
وتبنت خشم البقرة حتى
وفي حروفي وفي غناي
وفتحت عيني في الصقيعة
امشي واتلفت وراي
قصيتو دربك مرتين
ساعات هنا ومرات هناك
عِن لمة الأصحاب معاي..
قعدت أفتل في الرمال
واتخيلك جنبي وحداي..
وأفضل براي
مغبون علي الوكت انسرق
واتسلل الأمل الوقف
معايا ضد ضدي وعداي..
والحلة لاحت من بعيد
شقيان أبحت في التراب
عطشان ومافي سوى السراب
وريني بس كيفن لقاي..

جيجي
بلقاك وسط حرفا جميل
وخيال بينسج في الخميل
وزهوره من زهوك تميل
ونسيم كلامك
وابتسامك
وروحك الزي الحرير
بلقاك
كليمة بالجمال متشربة
وفكرا زي وهج الشمس
دفيانة بيك
كل النفوس متلفلفة
غيمة خريف
مليانه حن ومسرفة
نسام صباح
وقت الشروق
يداعب رويحتي
ويونسها

----------

[جيجي]

ال

مشاركة الأصلية كتبت بواسطة سجمان
شفتي كيف..
كهربتي عالية..
واحساسي بالمطرة بيفوق..
تش الجمر..
والنسيم وكتين يهبهب بنتشي..
حتى المهنضب في المعيشة..
من السموم مختوف وشي..
وأنا من هوايا وحبي لي..
ما بضاري واختشي..
نشقتو من بين السموم..
حَشِتو في الرئتين حشي..
عالجتبو..
هم بعاد..
وطول سهاد..
وكم وكم..
حكيتلو ما خليتلو شي..
وصيتي ليك..
.. خليك قريبة..
معايا ما تملي المشي..

كيفن امل
وانا اصله عاشقاها الدروب
الليك تودي وليك تجيب
وفي ضلمة الايام
بريت اثار مشيك
اصله دربك مختلف
فيه انواع الورود
وريحة العشب الرطب
وليه الفراشات شوق ترتجف
واصله مشيك زي نهر
لا وقف-
لاتعب
لامرة
اتقهقر رجع
في دربه كم ساقيات سقن
ونخلات تعانقن وزعردن

-----------

[جيجي]

المشاركة الأصلية كتبت بواسطة سجمان
مكتوبة زي عمل الدريسة
ما فارقوها السكة يوم..
وفي الدرب كان لاح وشيك..
والوصال أصبح وشيك..
كيف أملو في يوم مشيك..
حتى لو جاييك عوم..
اتبني مرات للدرب..
خليها أشواقي اتّرِب..
عقباً أجيلك منقلب..
أشواقي بانت في الهدوم..
يا تاية يا حليل المقيل..
والليل يعانق لي شليل..
والنسمة تنفح بالعليل..
يا حليلا فراقة الهموم..
أبقى واصلي معاي دروبك..
في السكة ما لقيت الينوبك..
اتعودت استنشق طيوبك..
واحضن أطيافك وأنوم..
-----------
وصيتي ليك حلمي اليجيك
إنتي أبقي عليهو عشرة..
والوداد الشايلو ليك..
مسخ النوم في العيون..
بقيت أشوف الدنيا عشرة..
طال غيابك ..
والنحل مشتاق رضابك
بالعيون مشتاق خطابك
بدون لقاك دنيايا خطرة..
خلي حلمك مرة يصدق..
ورسلي الأصل المعاكي..
خلي دنياي عامرة بيكي
لي زمن مشتاق رؤاكي..

جيجي
خلينا في الاحلام نتوه
وننثر الاحلام ورود
نسقيها من سحرك رحيق
شان تفتح وتملى كل الدنيا طيب
وتندي من طلك حنين
عشان تلون للقلوب
عشان تهدهد للضياع
وترجف الزمن العنيد
خلينا في الاحلام نتوه
وبيها تبقى الدنيا عيد

-------------

[جيجي]

وبتابع لو الله راد

[مي هاشم]

ده كلام جميل وقمة في التواصل الراقي..

أرجو تواصلي وياريت سجمان (لا سجمه الله) جا معاك..

[somiaadam]

جيجي ..بحرف الجيم تعلمينا جمال الوفاء
لك مني عقد من اللؤلؤ ..لهذا الوفاء
واصلي..واصدقاؤك ..دعينا نستمتع ..
سلام علي الدنيا أذا لم يكن بها
صديق صدوق صادق الوعد منصفا
دمتي بخير

[جيجي]

سجمان..
ماك متغابي..
وعارف إنك..
في جوايا..
فاتح شارع..
وكون متسارع..
زي عمدان النور..
يا راكب وساهم في شباكك..
ورامي شبابكك..
وطُعم الريدة..
وكم في فرعك جيت أتراكك..
وغنيت ليك..
وياما في غصنك..
أنا والريدة دوام نتساكك..
ماك طاريني..
ماك متذكر..
كم فرتقنا ضفيرة الغيم..
وغيم الريد كم سلب إدراكك..
كم بيتنا المطرة معانا..
وياما بكت في نوما غنانا..
وبلت بي عينيها فراشك..
حجيناها عشان ما تساهر..
وتقرا بخوتك لي يوم باكر..
هل تتذكر كيف ورتنا..
إنك عاشق ودافن راسك..
وإني وحاتك غرقان فيك..
ومحتاج ليك..
إلا كمان أرهقني مراسك..

جيجي
كبف نتغابى شوارعا في جواكا
فيها نساسق منك وليكا
وفيها خطاوي الريد مرسومه
وكيف نتغابى الشجرة الراكك فيها
وفيها غناك
وفن تغريدك
وريحة ريدك
وريحة الغيمة الحاملة دعاشك
وصوت المطر الساكن فيه
وتشلح ويبرق ضيء نسامك

----------