من سحارة الكاشف .. (ينـز) صوت الناي المعتق

[عكــود]

سلام آيات
وكل متذوقي الجمال!

ياخي زي ما عملنا ملف لأبو داؤود.. ليه ما يخلينا نعمل واحد للكاشف..؟

الرشيد ياخي إنت زول فنّان
رغم سماعك من رادي الجيران!
وعاد نحرس نرجاك يا ود عثمان

من هسّع حأعمل فولدر جديد للغناء الحينزل هنا.

شكراً آيات

[wadosman]

غصبا عنك يلفت نظرك
مهما تحافظ و تاخد حذرك...تصبح عاشق غصبا عنك...!!

[rams]http://www.sudanesehost.com/uploads/user_uploads/vipmohdosman2f56/gusban_anak.mp3[/rams]

لينك للحفظ

[آيات]

المشاركة الأصلية كتبت بواسطة طارق صديق كانديك

ذاك الصوت الحنين .. صوتُ لا تكاد تسمعه حتى يغشاك البهاء وتتلبسك رحمة عجيبة تجاه كل شئ اذ أنه يلامس منا القلوب ذات طرب .. !!

والكاشف في واسطة الغناء السوداني يذكر له الراسخون في الجمال كونه الذي استطاع بعبقريته أن ينتقل بالأغنية السودانية بطريقة فاصلة من مرحلة الى أخرى .. !!

ولا أكاد أسمع رائعته التي نظمها القدير سيد عبدالعزيز ( انت عارف انا بحبك) حتى تمايلت طرباً كدرويش] مجذوب الى علٍ .. !!


هواي مناي حياتي حبك بالمحبة
بلاك أشوف النور ظلام
وأذوق طعم كل حاجة مرة
زورني مرة
إن رأيتك بالقرب مني
أسعد أظني ... هل تدري إني
أحس بعظمة وشأن كبير
أفرح كتير فرح كبير
أكاد اطير من الفرح

--

فأكاد أطير من الفرح .. !!

شكرا العزيزة آيات .. سنكون بين الحاضرين دون شك .. !!

طارق ..أسعد الله نهارك.. وروح الكاشف تحلق بيننا .. وصوته مازل يسري فينا كما النار في الهشيم
أغنية أنت عارف .ساحرة . خفيفة وجذابة تسمو بروح المحب إلى مناص الوله والوجد وبها شطرات .. موغلة في الوصف العذري الخفيف ..او إن جاز لي التعبير (غزل دمو خفيف) يعني مثلاً بقول ,.. صغير .. غرير الطرف حالم .. أفرح كتير وأكاد أطير من الفرح.. وبها إنفعال واضح غير مفتعل .... يعني إنفعال ممكون
ويبدو أن المحبوب عارف ولكن يتجاهل ..وده المجنن عبد القادر
العلاقة بين سيد عبد العزيز والكاشف ترجع إلى فترة عشرينات وقد التقاه في ود مدني .. وقد كان الكاشف صديقاً لأخ سيد الأصغر ..ولم تنقطع العلاقة حتى حضور سيد للعمل بالنجارة وهو كان سبباً مباشراً في معرفة سيد العزيز بعبيد عبد الرحمن .. اما هذه الأغنية فترجع إلى الخمسينات

شكراً مرة أخرى ..سعيدة جداً بحضورك

[آيات]

المشاركة الأصلية كتبت بواسطة عكــود

سلام آيات
وكل متذوقي الجمال!

الرشيد ياخي إنت زول فنّان
رغم سماعك من رادي الجيران!
وعاد نحرس نرجاك يا ود عثمان

من هسّع حأعمل فولدر جديد للغناء الحينزل هنا.

شكراً آيات

أهلييين عمدتنا ....
سعيدة بحضورك الزاهي
لكن هسة اها ابياتك الفوق ده نشوف ليها ملحن .. كان نلقى ليها
وخليك قريب

[شبارقة]

سلام يا أيات

المرحوم الكاشف كان مدرسة براهو وكان عبقري زمانو

الكاشف كان متقدم على الزمن العاش فيهو بكتير

صوت جميل ... أداء رائع ... مبدع ومطرب.

[آيات]

الشال منام عيني
عبيد عبد الرحمن

الشال منام عيني وفؤادي جارحه
إن شاء الله يلاقيني وبهواي أصارحه
نتقابل الأتنين وأشكي ليه مر البين
لعل قلبه يلين يعطف على المجروح
والروح تناجي الروح والعين تشوف العين
والأيد تصافحه
أقول له ياحبيبي متى يبقى قريبي
متى تبقى حاسس بي ليك بالمودة أبوح
بين الرياض والدوح جالسين ومتآنسين
أن واب عيون ناعسين في الحب افاتحه
نقيف في شاطي النيل يعطف على ويميل
واٌقولو أنت جميل يابدر نور ولوح
يازهر عطر يفوح والأ أنت مين؟
قال في إبتسام ياسمين عبقت روايحه

[عادل عسوم]

ست الذوق آيات
نشأتُ في بيت يؤمه الكاشف-صوتا-من خلال مشغل اسطوانات أتي به المرحوم الوالد من مصر ايام عمله في السلاح الطبي بالجيش الانجليزي...
وبقي صوت الكاشف -في خيالي-مشبعا برهبة ...أومايشبه (القداسة) نتاج الهالة التي يضفيها الفونوغراف لصوت المؤدي!
وهي (قداسة) تشبه كثيرا تلك الهالة التي تضفيها صورة (السيد علي الميرغي) بشاله ذاك الذي يحيط بعنقه ...والتي ظلت تزين حائط (لقدابة) جدي ودعسوم في البركل سنين عددا...
وبقي سماع أغنيته البديعة (الليل مابنومو) راتب لنا كلما يممنا الى فرشنا!
...
بالفعل فقد كان الكاشف (فريد عصرو) في الابداع
اذ أضحى بابداعه ذاك فيصلا مابين عصر وعصر!
وبقيت بصمة صوته واسلوب ادائه فارقة في خارطة الغناء السوداني!!
أما ان سالتنين عن أغنية له خالدة في وجداني فأجيبك بأنها (حبيبي أكتب لي وأنا أكتب ليك)
نقشة:
قبل أعوام استمعت الى شاب أسمه (عماد) ...على ما اذكر.
كم أجده يقترب -بنبرة صوته- من صوت الكاشف!
...
مودتي

[عبد الجليل سليمان]

و آيات إذ تكتبين.
لا حول لا قوة .
ولي في مغناك ( طوبتان).
شكراً على هذه النفحات .

[سمراء]

آياتى الحبيبة
لايأتى الجمال ..الا من ذائقيه !
احبك يافتاة
كما احب هذا الـ(الكاشف) للروعة ...
مقاعد امامية يابت

[آيات]

المشاركة الأصلية كتبت بواسطة شبارقة

سلام يا أيات

المرحوم الكاشف كان مدرسة براهو وكان عبقري زمانو

الكاشف كان متقدم على الزمن العاش فيهو بكتير

صوت جميل ... أداء رائع ... مبدع ومطرب.

أهليين بشبارقة
ليالي زمان ..حوت الممتع الكثير وكان الكاشف حاديها .. بصوت ناغم شق وحشة الليالي الحزينة فأناخ قلوب العذاري بجوار عاشقيهم وصدح بجميل الحرف .. في خرطوم الأربعينات وهي ملئى تزدهي بالزينة والثريات في المحال التجارية الفخمة وتجارها من يهود وأغاريق وأتراك وشوام.. والجميع يعيشون لحظات سعيدة تحت رعشة نغم فنان..كيف لا وهو صاحب الصوت الطرب ..والعبقرية التي تتجلى مع كل إيقاعاته.
شكراً ..

[آيات]

المشاركة الأصلية كتبت بواسطة عادل عسوم

ست الذوق آيات
نشأتُ في بيت يؤمه الكاشف-صوتا-من خلال مشغل اسطوانات أتي به المرحوم الوالد من مصر ايام عمله في السلاح الطبي بالجيش الانجليزي...
وبقي صوت الكاشف -في خيالي-مشبعا برهبة ...أومايشبه (القداسة) نتاج الهالة التي يضفيها الفونوغراف لصوت المؤدي!
وهي (قداسة) تشبه كثيرا تلك الهالة التي تضفيها صورة (السيد علي الميرغي) بشاله ذاك الذي يحيط بعنقه ...والتي ظلت تزين حائط (لقدابة) جدي ودعسوم في البركل سنين عددا...
وبقي سماع أغنيته البديعة (الليل مابنومو) راتب لنا كلما يممنا الى فرشنا!
...
بالفعل فقد كان الكاشف (فريد عصرو) في الابداع
اذ أضحى بابداعه ذاك فيصلا مابين عصر وعصر!
وبقيت بصمة صوته واسلوب ادائه فارقة في خارطة الغناء السوداني!!
أما ان سالتنين عن أغنية له خالدة في وجداني فأجيبك بأنها (حبيبي أكتب لي وأنا أكتب ليك)
نقشة:
قبل أعوام استمعت الى شاب أسمه (عماد) ...على ما اذكر.
كم أجده يقترب -بنبرة صوته- من صوت الكاشف!
...
مودتي

أهلاً عادل
سعيدة بحضورك بين ظهراني مدينة الكاشف الغنائية
عند العودة للماضي تضيق الأماكن وتتسع المعاني .. هب أنك زرت مدرستك الثانوية او شوارع وملاعب الطفولة ..تجدها قد ضاقت بمارحبت في الماضي ..لكن معناها يملأ روحك حينها ويتحشرج في حلقك .. لكن هنا الكاشف يمثل لي المعنى الذي يخرج غصباُ عنك .. لترى الحياة لامعة مع مقدار كل بحة صوت .. كنت عندما أسمع عن الكاشف من أمي ..أجدها تنطقها بقوة وتقدير .. لم أفقه كنهه الإ عندما زحفت من الطفولة ...نحو مرامي الصبا .. .
أغنية حبيبي أكتب لي أو (رسائل ) من كلمات عبيد عبد الرحمن 1954
تمثل تقريباً فترة مابعد رسائل النظرات واللحاظ .. التي كانت تحيق بالعشاق وتردى بهم إلى مهاوي الوله والوجد ..سمعت تسجيل لها بصوت (مصطفى سيد أحمد) في قعدة وفعلاً هي أغنية جميلة جداً.
وشكراً مرة أخرى

[سماح محمد]

الجميــــــــلة آيــات
ده بوست سمح عدييييل

الكاشف مدرسة
وغناء لا يُمل
أغانيه بالنسبة لي من اهم كلاسكيات الموسيقى السودانية
وبحبها جدا

أنا غايتو تبع جماعة الكاشف
أمشوا أنكتوا لينا ودعثمان الغرقان في أبوداؤود ده ..
غنية غنيتين بي جاي يا ودعثمان.. عارفنك كريم

[شبارقة]

المشاركة الأصلية كتبت بواسطة آيات

أغنية حبيبي أكتب لي أو (رسائل ) من كلمات عبيد عبد الرحمن 1954
تمثل تقريباً فترة مابعد رسائل النظرات واللحاظ ..

كل الناس مفتكرنها مكتوبة في محبوبة لكنها كانت في محبوب ... والمحبوب هو الشاعر سيد عبد العزيز.

[جيجي]

المشاركة الأصلية كتبت بواسطة سمراء

آياتى الحبيبة
لايأتى الجمال ..الا من ذائقيه !
احبك يافتاة
كما احب هذا الـ(الكاشف) للروعة ...
مقاعد امامية يابت

جنس تضامن هو لكن

[wadosman]

المشاركة الأصلية كتبت بواسطة سماح محمد

أنا غايتو تبع جماعة الكاشف
أمشوا أنكتوا لينا ودعثمان الغرقان في أبوداؤود ده ..
غنية غنيتين بي جاي يا ودعثمان.. عارفنك كريم

سمااح...

جينا طالبين السماح برضو و خلاص نعوم معااكم بجاى
بس خليت عكود علكيم...