يا أخي الكُبر دآ حاجة ثقيلة بشكل

[بابكر مخير]

بس ذي ما قلنا مرة ومرات.
أنه ليهو محاسن..
البراءة أو الكياسة (والكويس حسب المفهوم السوداني هو الطيب البرئ).
بيقولوا لمن تكبر بترجع تبقى ذي الطفل.
تلقى الناس تراعيك خاصة لمن تكون ساكن مع بنياتك ووليداتك تلقى الجميع بكل جهدهو يحافظ عليك، يهتم بي أمرك من مأكل ومشرب وملبس. شايلين همك لمن تمرق لغاية ما ترجع وإن إتأخرتا ينزعجوا وإنت غبت يخافوا. إن كحيت ينهجموا ولو إشتكيت حتى من صداع يتجرسوا حتى قبل مماتك.
أها البراءة أو الكياسة واحدة من خواص الطفولة ودي بتتملكك.
البسمة تفرحك والمديح يسعدك.
كمان إن غلتا في حق زول!
يغلبك النوم وتحزن..
قبل كم يوم واحد دخل عربيتي وأنا كما هي الحقيق (ضاربني الزمهرير "الزهايمر") نسيت المفتاح جواها. أها جا واحد شاب وما شاء الله ختا تذكرة مواقف في القزاز القدامي من الداخل وشااااااااااال المفتاح. في الوكت دآ شافه نميري "إبني الذي يساعدني في إدارة المندولا (الكفتريا بتاعتي)" ومشى خنقه وناداني بأنه الزول دآ شال مفتاح عربيتك. جيت أنا متحنفش ولكمتا ليك المسكين بقدر قوتي وأكيد بالنسبة ليهو كانت كمن طقعهو زول بي سمسمة (طبعن لي حسي يدي لم تشفى وظنيتهو عضمة أإنكسرت "ما هو عضام العواجيز بتبقى ذي عود العشر") .
الحصل أنه العربية الملاصقة لعربيتي ويكاد حتى مستر تويوتا ظاتهو بيغلط في التفريق بيناتهن. كانت عربيته وهو برضك يظهر من هموم الدنيا نسى مفتاحهو في في عربيته وبالخطاء عمل الغلطة التي كلفتني ألم جسدي ونفسي ولم تكلفه إلا ضبيبينة ركت عليهو "دي لكمتي أو بنيتي أو كما تحبوا سموها".
والله وأقول كل الصدق يومها ما نمت وما بسبب اللألم ولكن لعذاب نفسي وما ذهب عني
احد الألمين إلا لمن لاقيت الشاب دآك وحضنته وترجيتهو أن يعفوا عني يسامحني وكان هو الأكرم والأشجع وذاد في ألمي أطنان من العذاب حين قال ليا:
أنا خفت أنك تكون أصبت نفسك بضرر. وقال: أنا متأسف لأني فعلن ما لاحظت أنها ما كانت عربيتي.
وعندها رحل ألم النفس ليترك المكان لألم الجسد يتحكر بي براح وإنتشار ولي حسي يدي تنتح.
والله يا محمد صلاح ولدي حقيقتن حصلت وما كلام أسافير

[بابكر مخير]

وذي ما قلنا؟
مع الكُبر العاطفة بتكون جيآشة والدمعة بتجري بدون "حرباشة" (من المعروف ناس السجارة "ديكي" دمعتهم دايمن جارية)..
وتحب، تحب بي إخلاص ومحبة؛ حتى اللي من الحنضل حبة. وديمة تتمني لو كل كان الناس متوالفة. ما مصارعة ومتخالفة..
دآ بذكرني قولة. لمن بطن الزول تكركب وتصدر صوت عالي وجلبة في لحنها ذي الشكلة "العرآك". بتوقل:
حتى مصارين البطن الواحدة بتتشاكلن..
تتشاكل نعم لكن ما بتختلف في مصلحة الجسد وكذلك كل أعضاء الجسد. يعني مثلن زول عنده قرحة تلقى اللسان بقى ما بيسثيغ الطعام الحار (شطة مش حرارة) ولمن الزول يزنق عقله الباطني في النوم يصحى وبي معاونة صديق (شرير. إبليس) يساعدهو في الحل .. ظاهرين بيتشاكلن لكن ما بيختلفن في المصلحة العامة..
دحن أمس قريت لقاء مع حبيبي وشيخي ودفعتي وقدري والحمد لي الله الخلا أنه قدري مربوط بيهو.
وقريت التعليقات.
لقيت أنه مصارين بلدنا "السودان" بتتشاكل وبس الزيادة أنها بتختلف حتى لو فيها ضرر نفسها وتتنكر للمصلحة العامة. أماعقلها الباطن مااااااااااا في صديق يساعدهو وكت الضيق لكن بتملكهو.. ينكر ويتنكر.....
أها بس نقول: البغلبهو يلقى شنهو كدآ. شنهو كدآ صابونة
الكلام دآ بي سبب بس ما عرفتا كيف أوصله

[imported_Hassan Farah]

الزهايمرالله يكفينا شره
https://www.youtube.com/watch?v=I94bagatiU4

[بابكر مخير]

إن كان يقصدوا أن بيل كوسبي حسي وفي عمرنا دآ. كل الجرائم البيتكلموا عنها حصلت في العمر دآ أو قبلها نقول ب خمس سنين.
يبقى هو برئ حتى لو ثبتت إدانته.
وأنا دآ مستعد الدفاع عنه مجاااااااااااانن وبإستمامة واقفا أمام أشد المحاكم صرامة ومتحدياً لوكلاء النيابة في من هم أكثرهم حنكة وأُقارع بالعلم أكثر المختبرات الجنائية تقنية وأناطح إقوى مجموعات لوبيهات المحلفين.
وأنتصر له نصراُ مبينا. لممسح إشانة السمعة التي حاول البعض إلحاقها به وأعود عليه بالملاييين من الدولارت تعويضاُ...
وسر دفاعي عنه يتخلص في حكمة سودانية أو عربية تقول:
أسأل مجرب ولا تسأل طبيب...
فالرجل حالهو هو حالي فكيف بحق السماء والملائكة وحتى إبليس أن يعمل الحكاية دي وقال بعد ما يخدرهن القوارير الخودر..
بعدين بلوم محامينهو ديل الأخدهوا قروشهو كلها وما عرفوا يصرخوا في المحكمة بأن ترجع الأدلة والثوابت لتلك الكلمة الإنجليزية الوااااااااااااااااااااااااااااااااااحدة والسحرية ...
Libido
هو أصلن مع العمر دآ...
خلاااااااااااااااااااااااااااااااااااااااااااااص
يا أخي بيقولوا؛ الرغبة دي ليها أساسيات، القدرة الجسدية ودي منعدمة، التركيز ودآ مستحيل، تقبل الطرف التأني وهو وينهو وين تلقى من يرضى قسرا أو طواعيتن مع عجوزن هرِم...
"يا كوكي وقفني عشان ما إنداح وتبقى شينة"
خلينا بالفونتن الصغير عشان ما كلو زول يقراهو

[عكــود]

[imported_عبدالله الشقليني]

الرياضة مهمة للكُبر...
تصور آخر مرة زرت السودان ، بنت عمي تخاطبني ( يا ولدي )
مع أني أكبر منها سناً !!!!!!!!

[بابكر مخير]

المشاركة الأصلية كتبت بواسطة عبدالله الشقليني

الرياضة مهمة للكُبر...

ما اليها دي النصيحة الختست حجر بيل كوسبي..
واخد بالك يا جيلينا الجميل.. ليك وحشة

[imported_عبدالله الشقليني]

دكتور بابكر مُخيّر
تحياتي
أنا بهاتي بالرياضة ، وبرضو ما بتريض.
زمان أيام الثانوي ، كان في صاحبنا بتريّض العصُر ، بترننق سوت .
تصور الناس بقولوا : دة مالو بتجارى العصُر .. دة جنَّ!
*
بالمناسبة الكوز القديم علي شمو كان شغال وزير الشبابوالرياضة أيام الرياضة الجماهيرية
الخاصة بمايو . كان يومياً يطلع العصُر بالترننق سوت . يجري وتتابعو كاميرا التلفزيون . كان بيعتقد مايو دايرا البيان بالعمل !!
*
يا حليل ناس هم ناسنا
ذكرياتُم ديما في راسنا
*

[imported_عبدالله الشقليني]

[rams]https://www.youtube.com/watch?v=QYL1s7802aY[/rams]

يا حليل مجلسنا ...

[بابكر مخير]

[QUOTE=عبدالله الشقليني;544545]
يا حليل مجلسنا ...[/QUOTE

ما عن نفسي لكن عن شقيقنا إتا وأنا "كورية".
كان له مجلس محضور من شباب الحلة الفي عمره في الحي الشرقي الخرطوم وبالضبط في عتبة صغيرة مبنية كحاجز للمشاة في طرفي جسر صغير فوق جدول تصريف المياة في تقاطع الزبير باشا مع عثمان دقنة.
كان مجلسهم منتهى البراءة ما فيهو غير الونسة البتاخد ليها ساعات طوال من المغرب حتى منتصف الليل..
مجلس سمر بس خالي من أيتها نوع من الموسيقى يعني نضمي وبس..
مجالس السمر ديمة مرتبطة بالغنا حسب العرف العام أو الخلوة بمحبوبة. هو نعم السمر مربوط بالليل عامة وكمان زيادة على كدآ؛ سوادهو فهل هو الشرط الأساسي للإنفراد بالمحبوبة "الليل" .
وبأيتها حال ما كل جليس السمر شرطا يكون الحبيبة.
يا هو ممكن يكون ذي ناس "كورية" شباب في عمر متقارب ويسكنوا في نفس الحي والبعض منهم زملاء في مدرسة واحدة.
هذا المجلس بقول ليك فعلن يا حليلهو..
لكن التاني دآك..
بيجيب الهوآ والهوآ بيسوق الزول للعرس..
ودآ الياهو سمر "السواد"

[بابكر مخير]

اليوم النفسيات كانن في الحضيض.
من الصباح مرآية الحمام وأظهرت ما لا تحب النفس رؤياه.
في العربية غصباً ومكره ومضروب بالشلوت أنك لازمتن تعاين في المرآية (أصول القيادة السليمة).
أول ما دخلت "المندولا" قدامي مرآيا (البيحز في النفس أني أنا الختيتها، يعني ذي الطبز عينه بي صباعه)
هذا الإكتشاف الكئيب. محبط ومزعج وأصلهو ما كان في ليهو داعي. إلا إمكن ياهو عشان يقهم كل شينن، مكرمش الوجه ومليا بكمية مهولة من التجاعيد المتداخلة مع بعضها كما هو حال المكرونة "الإسبجاتي" في الصحن.
غيرهو كمان الكميرا التي توثق قبح الزول العجوز والذي ما أقبح منه إلا الكميرات الفي جهاز جوال السامسونج وأيفون ذات الجودة العالية..
بالله عليك كرمشاية صغيرونية تكون مدسية وسط التجاعيد والأخاديد تبينها ليك ذي وش القمر بي حفرهو وبراكينهو الهامدة..
أنا دآك وإن ليا مراد ناس "السلفي" ديل البسهم وشي وأشوف برضك بيتصور "سلفي"..
إختراعات ما ليها إلا تنقص على حياة كل عجوزن ذيي كدي...

[imported_عبدالله الشقليني]

يا سلام يا دكتور بابكر
ذكرتنا الأيام الجميلة التي كُنا حينها نزور بيتكم في الخرطوم شرق . لازلت أذكر أن الباب الذي يفتح غرباً.
وقابلنا فيه الراحلة والدتكم الأخت الشقيقة الوحيدة للعميد الراحل يوسف . غطى المولى بغطائه النبيل مثواهم جميعاً.
ديك أيام لا تتعوض ، من نقاءها وحلاوة طعمها .
.....

[بابكر مخير]

مع الكُبر.
يكبُر إيمانك ما هو شنهو يعني وقالوا: الأعور طبظوهو في عينهو، ضحك وقهقه وقال ما هي أصلها خربانة.
دحن حسي ما أكبر الأمور هولاً وأكثرها رهبة هو المشية بالمرة.
أها مع الكُبر بيبقى ليك بالكان وعشته زمان وترجي الجآي أكيد وتراهو ما بيقوي إلا الإيمان...
تقوى العقيدة لييين قريب من التطرف. بالله عليك حسي أنا لمن زول بس يقول؛ صرافة الأنصاري لمن شعرت جلدي تكلب وأهتز كالدرويش في وسط حمد النيل وأطرب كمن هو حاضر كونشرتو يجمع ري تشارلس وأريثا والوليد ستيفي وندر وتلقاني أرتعش كمن "خليها يا كوكي أحسن" من التلذذ بسماع إسم كيان عقيدتي السمحة فنحن أحفاد (الإسم دآ ظاتهو بيلخبتني) النصرو الدين بسيوف العشر وبجعوا الكفار للمحافظة على البلد بالشكابة "طبعن مع تحفظ كبير في تسمية كفار إلا في حال المقصود بيها المستعمر ودآ قصدي هنانا".

[بابكر مخير]

لما الزول يكبر ويعجز.
في السودان يقولوا أنه خلاص بعد كدآ يرافق تبروقتهو. يعني القصد وبالعربي أنه بقآ غير ذي فائدة لغيره فأحسن ليهو يصلح علاقتهو فوق ويستنى مقابلة السؤال برصيد جيد ونضيف.
طيب شوف الناس ديك كيف تفكيرهم..
ترامب وهو ظنيتهو دفعة لساتهو طامح للفترة الثانية.
عبد العزيز بوتفليقة مع أنهو مننا لكن برضك عايز يلوي عود الدستور ويحكم ما عارف الكم لكن أكيد المرة فوق التالتة.
كمان حاجة تانية..
لكن كمان عشان تعرف اننا السودانيين ما أصحاب كلمة واحدة..
يعني نقول ونسأل؟
عمر البشير دآ مش سوداني وفي السودانيين كمان حقهو أشتر بمعنى أنه زول وفاااات الجعلتي والهدندوة والغرابة في الشتارة "التي هي صفة ملازمة للأهل".
مش مفروض يكون تبروقتهو إنسهكت من عصرهو ليها..
ويفكر في منكر ونكير ويلزم بيتهو لمن يجيهو الطواي حباله..
شنهو يعني عايز من عام 2020
يا أخي كفاك وأعمل لأخرتك كانك تموت غد. أما دنياك فقد عيشتنا فيها النكد..
طبعن سيدي خليفة المهدي قابل الموت فوق تبروقته في أم دبيكرات "زول عاقل".
أما عن نفسي فربنا يهون لينا عصرت التبروقة ...

[بابكر مخير]

الحساسية والحساسية والحساسية
هي تلاتة أعراض؛ نفسية وجسدية وأدبية.
بتقوى فيك وتستلمك وتتملكك.
حساسية في إلإحساس ذي ما قلنا من قبل كدآ.
شئ بسيط يتقبله كل شخص إلا إتا يجوط ليك رأسك وتتعقد منه وخد يا أسئلة ودون إجابات.. "أكون عشان أنا بترجف ذي القصبة وإن مسكتا كباية شاي مليان نصها بحمي بيها كل ممن حولي، أكون عشان لعابي ديمة سايل، إكون عشان الإصوات المتنوعة ومتباينة البتصدر من البطن وتشكيلتها بدء من صحيل الخيل الي مواء القطط وبعض مرات زئير (بتذكر زمان وإحنا ساكنين في عشر بيوت "الحي الشرقي" في الليل بنسمع زئير الأسد بتاع حديقة الحيوان... يا هو ظااااتهو المسكين البقآ أصغر من كديس في زمن الإنقاذ السجمان دآ). حساسية مفرطة لمن تتحسس من حساسيتك ظاتها.
حساسية الجسد. الجلد بيرهف ومحل رهيفة بتنقد وكل يوم إكزيما في مكان وبدون مبالغة ما تفرق بين الكان خشن والأصله ناعم، فوق ليين تحت وكدآ كدآ ..
حساسية أدبية في أنك كان عندك وضع وفرضاً يعني وليك هيبة ومكانة. حسي بتفقدها وتبقى كلهوعلى كلهو ؟؟
سك.
ملطشة يشيلوك من هناك ويختوك هنا، يناولوك، يلقموك وممكن بس وأصلن ما ممكن يراضوك الآ يشلو العندك لو هو أصلهو التكتحآ فيي.
وماااااااااااا بيدوك