اقتباس:
المشاركة الأصلية كتبت بواسطة ماجد تاج
ـ
طيب : على الواقع لو قلت ربع الكلام القلتو هنا عن الاخلاق ببقى بالفعل مجرد حالم ومتمني ما اكتر ، وزول ما عنده صلة بالواقع .. لأنه الحكم والغلبة هناك للقانوني ، لكن في المجتمعات الافتراضية دي يا بروف والبيقوم فيها الانتماء على أسس تختلف كتير جداً جداً عن الاسس البتقوم عليها المجتمعات في الواقع ـ لاحظ هنا أنا بتضامن وبختلف مع ناس ما أجتمعت بيهم ولا بعرف عنهم أكتر من كم الحروف المندلق هنا دا ـ وبما أنو المجتمعات دي قايمة في وسط المنافسة فيه شديدة ( دنيا الانترنت وما تطرحه ) بيبقى وقتها التشديد على ضوابط أخلاقية ( قبل اللائحية ) مهم للغاية .
ما أخافه هو الابتعاد عن المنتدى .. ودي ظاهرة خطيرة في النت ، بتؤدي لبوار المنابر زي ما بتعرف .
سودانيات نجحت بفضل المؤسسية وبفضل السعي لإقامة ما يشبه المدينة الفاضلة ( مع الفوارق ) في احتلال موقع متقدم ، وممكن من خلاله ( إن حافظنا على النسق ) نقدم أو يقدموا حلول تمس حياة الناس برة ، أشرف كمثال بمكتبته وقسمه الهنا دا قدم خدمات جليلة ولا تقدر لناس ما عندهم صلة مباشرة بالمنتدى لكن قدر بمجهوداته دي يعمل ليهم حاجة ، ممكن الكلام دا يتجاوز لما هو أبعد من ذلك .. تجارب حية لممارسات ديموقراطية ( بكافة صورها ) مع أنها في دنيا الخيال .. لكن ممكن تأسس لواقع ، ح ننقل الناس ببساطة من مربع التجارب الى واقع القياس بتجارب ، ح ننور الناس حول الديموقراطية بشكل عملي
وبما أنو الرابط والجامع هنا يا بروف هو أخلاقي أكتر منه لائحي ، ومع تقديرنا العالي والتام للائحة ( القانون ) لما نخوض التجربة دي ، ومع أنو الهدف أوسع من تجربة على النت .. يبقى ما ننسى أنو التجربة تجري على النت ، شان ما تكون النتائج مجهجة كتير ، أي نعم هي تجربة تقدم مثال لكيفية ممارسة الديموقراطية ، لكن اعتبرها تجارب على الفئران ـ مع الاحترام ـ ما ممكن نقوم نقيسها بمقاييس التجارب على البشر مباشرة وهي بتجري حالياً على الفئران ، ما أقصده أنها ممارسة ديموقراطية فعلاً .. لكن نقدها مرتبط بظروف ووسط إجراءها ـ النت ـ هنا المثالي أولى من الواقعي جداً ، والرابط ( العقد الاجتماعي ) هنا مختلف تمام الاختلاف مع الواقع ( دا سيميوليتر ـ كدا صاح ؟ ) والرابط فيه يقوم على الاخلاق .
ببساطة ما في مانع نلعب كوتشينة ، لكن لو عايز تعمل فيها حريف وبتاع غش وخداع بإسم القانون بدكها ليك وبخلي التربيزة كلها
ما عارف قدرت أوضح واللا لا لكن القصد أن الاخلاق هنا كمعيار أكثر أساسية من اللائحي ، وأن الفوارق بين الواقعي والانترنتي ما ممكن نتجاوزها ، هناك الوطن لا يسهل التخلي عنه أو مفارقته ، هنا أسهل وممكن ومتاح ، حتى لو بقينا قاعدين نتاوق من ورا الشاشة .
يظل الدافع للكتابة في سودانيات مختلف عن الدافع للبقاء على أرض الوطن
ـ
|
سلام يا ماجد ...
"الاخلاق" الانت عايز تحاكم بيها الناس دي مقصود بيها شنو هنا ؟ و بفهم منو فينا ؟!!
عشان أقرب ليك المسألة، نحن ما مختلفين عن هل الاغتصاب عمل أخلاقي أم لا، نحن مختلفين في مسألة تحتمل الاختلاف في الرأي !!
النقاشات دي كلها triggered بانو الانتخابات الفاتت في أعضاء إتصلو بأعضاء هنا لكنهم ما مشاركين حثوهم علي التصويت لمرشحين معينين ... في ناس شايفه العمل ده أخلاقي و من صميم العملية الأنتخابية ... و في ناس شايفه ما أخلاقي لانو بخلي ناس ما مشاركين معانا هنا يتحكمو في من يدير المنتدي .. اها الدبارة كيف ؟!!
ولانو ده منبر إسفيري و كلنا بنتداخل مع بعض بدون معرفة شخصية، يجب أن تحكمنا اللائحة و ليس "أخلاق" أي منا، لانو " أخلاق" أي منا دي بتخلف من "منا" ل "منا"!!!
و خليك من المنتدي .. أمسك أقرب صديق ليك ح تلقاه مختلف معاك في فهمك الكلي لكلمة "أخلاق"، خليه ناس - زي ما تفضلت (( ما أجتمعت بيهم ولا بتعرف عنهم أكتر من كم الحروف المندلق )) !!
الاصرار علي التحاكم بالاخلاق بيؤدي لجنس البوستات دي و كمية البل الفيها و تقرأ كمية الاتهامات المجانية و محاكمة الناس بفهمنا الشخصي !! و لو ما إنت زول محترم بحق و طيبت خاطر الناس دي... البوست ده كان لسه عجاجتو قايمة !!
مرة تانية أرى إنو الناس الحريصة علي تطوير التجربة الديمقراطية في هذا المكان - و أحسب ( ما حقت الكيزان !! ) إنو كلنا ذلك الرجل - تقعد و تتناقش في كيفية تضمين اللائحة و تعديلها - إن رغبت الأغلبية - بحيث تطابق ما يرتضي عليه الناس ... و دا ما بيعني إنو الانتخابات الجاية ح تكون مبرأة من كل عيب، لكن بالتأكيد ح تكون بعيوب أقل... و هكذا... كل مرة نردم الغلط البنشوفو لحدي ما اللائحة - عليها من الله ما تستحق - دي تطابق مفاهيم الاغلبية للاخلاق و نعيش في ثبات و نبات !!!
