يا أخي الكُبر دآ حاجة ثقيلة بشكل

[بابكر مخير]

الأكل...
زمان كان النوع البتريدهو من الأكل بتستمتع بي تناوله، حسي كدي ابقآ راجل وأكل الكنت بتألكهو زمان.. يا زول كم هائل تنحرم منهو وخاصة "الشطة" بأشكلها. بالغلط جزيئات وتقول يلحقوك السمحين..
أنا عن نفسي والبتذكرهو مع الأكل دآ كنت نباتي وبقدر أقول اللحمة دي ما أكلتها بصورة دايمة إلا لمن مشيت تشكوسلوفاكيا وبالأخص الإسكلوب...
ما عارف سر الحكاية دي شنهو هل هي أني كنت وجات كدآ من جماعات الرأفة بالحيوان ولا يمكن كان تأريخها مربوط بأيام كنت بترسل أجيب اللحمة من الجزار ودي قصتها يعني عذاااااااب..
كنا ساكنين في العباسية غرب وممكن تسميها العرضة ومع أنه إتعمل سوق هناك بعد الخور ناحية سينما العرضة حاليا لكن ما كان فيهو جزار فيبقى المكان التشتري منهو الللحمة سوق الجزر وعشان تمشي هناك الطريق المختصر هو تشق شارع العرضة وفي خط مستقيم تباري الخور وتكسر يمين ناحية بيوت ناس سر تجار وبيت جدي عبيد عبد النور شمال سينما كلوزيوم وبعدين يسار وزنك اللحمة قدامك. لكني كنتا من ناس "عوج الدرب" فبما أني في تلك المنطقة يحال أني ما أغشى توأم الروح قاسم بدري ونكسر علي بيت ناس جدي العم حيث أحبائي العميد وطلق النار وفي كتير من الأوقات البترسل فيها كنت بلتهي عن أنه اللحمة في البيت مستنينها وأتاخر وعينك ما تشوف إلا النور.
سبحان الله يبدو أن في هرمونات بتفرز كدآ وتخليك تنسى العقاب الذي نلته وينتظرك لو تاني إتأخرت وتعملها من جديد..
إعتراضين: "قالوا أنه المرأة كذلك هرمونات تفرز وتنسيها وجع الولادة وبيقولوا أنه حكاية رضاعة الثدي هي البتنشط إفراز هذه الهرمونات"..
لحدي حسي اللحوم البيضآ ما بأكل إلا دجاج معمول بروست يعني كنتكي إستايل وفي السمك إلا الفرايد ناس بياض وبلطي وكدآ أما المصايب ديك ناس شريمز فما كانت عندي نحو جاذبية زمان ما كان يغويني ولا حسة في ليهو عاطفة..
ناس يقولوا ليك المرارة يا حليلها حسي أيام العيد دي كان متعة وخاصة معها شطة بالآلتي "معقول أصلهو" ويا زول الكمونية ودي بقى حاجة ما عارف ظاتهو الناس بتأكلها كيف، أنا مسميها "سادة راجعة"..
ما هو أحشاء الخروف الصادة بعد ذبحهو من معدة لي مصارين وغيرهم من أجزاء بيستعملها الحيوان لهضم الأكل نقوم إحنا نطبخها ونرجعها لتكون طعام..

[youtube]https://www.youtube.com/watch?v=2Y0U3qcbFYc[/youtube]

[imported_عبدالله الشقليني]

(كنا ساكنين في العباسية غرب وممكن تسميها العرضة ومع أنه إتعمل سوق هناك بعد الخور ناحية سينما العرضة حاليا لكن ما كان فيهو جزار فيبقى المكان التشتري منهو الللحمة سوق الجزر وعشان تمشي هناك الطريق المختصر هو تشق شارع العرضة وفي خط مستقيم تباري الخور )

كنا في صغرنا نستأجر عجلات بقرشين العجلة الواحدة لمدة ساعة من سوق العرضة .

[بابكر مخير]

المشاركة الأصلية كتبت بواسطة عبدالله الشقليني

كنا في صغرنا نستأجر عجلات بقرشين العجلة الواحدة لمدة ساعة من سوق العرضة .

يعني قصدك من العجلاتي
يا "كوكي" واخد بالك بيكاسو دآ كيف زول علي نياتهو... ما قلت ليكم زول فنان

[بابكر مخير]

يا ربي هو الغط ولا الهلوسة..
نومي الأصلن خزاز بقآ كمان مشاركني فيهو "حمدوك"
الغط بي إسمهو والهلوسة بي شكلهو...
يا أخي ما عارف مشكلتي شنهو مع الزول دآ..
هل هي تكجينة كدي سآآآآآآآكت ولا إحساس داخلي تجاهو ولا غيرة علي البلد...
سبحان الله
قبل ما أقراء شيتن عن سيرته الذاتية وخلوها من تأريخ ميلاد ولا حتى كنت قريت جواب وزير الزراعة (الهو كان شغال فيها وأنهو خريج زراعة والصق به زورا وبهتنا كلية الإقتصاد) البيشكرهو فيهو على فترتهو القضاها في الوزارة وهي ما ظنيتها حتى تمت الخمسة لو ما أقل ووصف بأنه رفدية..
مرة كنت قريت كتاب رفدية فووووووووووق مكتوب. الموضوع: فصل عن الخدمة وما فيهو ولا كلمة كدي ترقد شعر الجلد كلهو أنه وأنه وقلت أنه الحمد لله الزول دآ ما قالوا ليهو حنسجنك ونوصي بأنك بعد مماتك تدخل النار والقصة كلها أنهو الزول دآ في تقرير أمني وصفه بأنه معارض للحكم... ياأخي والله الجواب دآ أرقى من جواب تعين حتى.
لسة كمان والهلوسة الميديا والإعلام ما أدوها الفرصة تتملكني براها بل بالعكس زادو في وجعي ما أدخل النت وإلا حمدوك ومكا أشوف نشرة وإلا حمدوك وبقيت وين ودوك ووين جابوك ياهو قدامي حمدوك...
يا أخوانا المدهش والبيخلي دمي يفور ويغلي حجة الناس يقولوا ليك..
لمن عرضوا عليهو وزير مالية، إعتذر..
يعني لو كان بقآ كان فيسيلوجيتهو وسايكلوجيتهو وكان لحق البلد وصلح إقتصادها ويشار ليهو بالبنان والحكمة ولا كان حيكون؟؟ ما كفاءة..
الكفاءة هي شنهو.. أنا من الأول بفتكرها من غير رابط أساسي بالمؤهل الأكاديمي.. تلقى عامل نجار كفء وتلقى طباخة كفء وتلقى تلميد جاد وكفء وأنها هي بلورة القدرة في أنك توجها للعمل الصاح..
https://mawdoo3.com/مفهوم_الكفاءة
حسي حميديتي دآ ما كفاءة، قدر بحركات بهلوانية وشغلبة ومقلبة بقى نائب رئيس المجلس العسكري الإنتقالي الفيهو ناسن حكو العسكرية من الألف لين الياء وقاعدين في الصف من وراهو..
يا أخي كفاءة البشير ظاتهو هينة، خمآ ليك الترابي ولعب بي ناس علي عثمان..
عشان كدآ أنا من أول يوم إحساسي الباطني شعر بأنهو حمدوك دآ مقلب حنشربهو..
ووالله يا أمة المجد والأبطال والصمود والثورة والنصرة..
بلدكم دي إلا سلمتوها لي زولن هوان حيصوطها ويجوطها وباكر تندمو حيث لا ينفع الندم لمن يلم ليكم فيها عسكري وممكن يكون من الحسي موافقين عليهو ديل لأمر في أنفسهم. مش إتقال هم والحيكونوا على قرب للإطمئنان على سير الحكومة الإنقتالية...
اللهم إني بلغت. اللهم فأشهد

[بابكر مخير]

لمن يجيك ذي يوم الليلة دآ في مسير حياتك والحمد لله.
يرجعك لي لي أيام متلهو.
ترجع بي ذاكرتك لي أيام الطفولة وكت كان عمرك ذي تمانية سنوات وإتا ما داري بأن هذا اليوم كان أول إدخال لكلمة جديدة في سيرة السودان "يوم الإستقلال" كان هذا اليوم شبيه بهذا اليوم.
نجاح ثورة سلمية سبقها نعم فترات طويلة قدمت فيها الدماء لتسطر بها حروف الحرية والتغيير.
وتمر بيك الذكريات لتسترجع إنقلاب نوفمبر وأيام جكم العسكرتارية لسنوات. كانت أقل دموية وخلالها سفكت دماء في أرجاء السودان وكان لجنوب القطر النصيب الأكبر من مدنيين امينين وعسكرين أيضا وتطعم حلاوة ثورة أكتوبر حيث إنتفض الشعب بقيادة جبهة الهيئات وكان حينها عمري في أحلى مراحله وهي فترة بداية الشباب وتطور الوعي بعد مرحلة الطفولة "طالب رابعة ثانوي"..
وتتذكر أنك قبل ما تنعم بحياة حرة مستقلة يرجع العسكر لطموحاتهم ويقوموا بإنقلاب مايو ويستمر حكمهم ستاشر سنة ذاق فيها الشعب من المر ما دفعه للقيام بثورته الثانية على العسكر والثالثة على حكم غيبهم كشعب صاحب الأرض والحق. فإستاثر به قلة وهم (حفنة من العسكر أو إدارة المستعمر من إنجليز وأتباعهم المصريين) وكانت رجب/أبريل وقبل أن يتنسم الشعب الحرية جاء العسكر "ورجعت ريمة لي عادتها القديمة" فإنقلبوا على الحكم الديمقراطي ولكنهم هذه المرة جاءوا متأدلجين يدعمهم حثالات من شذاذ الآفاق. فجثموا على صدور الناس. طغاة لا يرهبون المولى بل يرهبون الناس وكان الفصل التعسفي ليمكنوا أنفسهم من السيطرة التامة على أجهزة الدولة وكانت الملاحقات للبرياء بسجنهم وتعذيبهم بل وبقتلهم. فكانت حقبة من تأريخ السودان دموية بكل ما تحمل الكلمة من معاني ولا أبلغ إن قلت أسوء من أيام حكم المستعمر الأجنبي..
ودامت فترتهم لثلاثين عاما..
كتب لي أن أعيشها مع كل شعبي بحرقة وغبن متناهي.
لكن الحمد لله. فقد قَيَّضَ الله لي أن أعيش هذا اليوم وأفرح فيه كما فرح شعبي العظيم بعد أن دفع مهر هذا الفرح بدماء طاهرة وشهداء من خيرة شباب هذا البلد العظيم فيتقبلهم الله..
..
___________

لا أخفيكم قولا بأني كنت في حيرة من أمري..
هل أخط هذه الحروف باللون البمبي كعادتي حين سعيد وفرح..
أم باللون الأخضر كما هي عادتي..
لكن إسودت أمامي الفرحة فغلبني اللون الأسود حين جاء ذكر الشهداء

[بابكر مخير]

اليوم دآ بالنسبة ليا يوم الأمان والبوح بالذكريات..
قبلها كان الواحد بيخاف يذكر إسم زول من العرفتهم أول أيام إنقلاب الكيزآن يقوم يعرضهو لي الخطر...
من الأسماء الإتنحتت في ذاكرتي.. عمنا فضل علي وتيراب تندر آدم ومحمد عبدالله ومجموعة من أهلنا الإنصار المجاهدين.. شوقي بدري ذكر مرة مدينة بدري أنها فاتح البيت وذكر أنه لو لا ابراهيم قاسم لما كانت قدرت.. أنا في حالتي العكس كان هو الحصل فبفضل السيدة حسب سيدها بدري لما كنت إستقبلت هؤلاء الأبطال في بيتي زوارا لفترات بسيطة حيث يغبوا عين الشمس الحارقة بكوباية ليمون تكتل العطش وفنجان شاي يروق المزاج من المساككاة.
مع هؤلاء الأبطال ومعهم إخوتي الصغار ابوبكر عبد المجيد الأمير يعقوب ومحمد بشري فاضل البشرى "المهدي". بدينا شيتن كبير وكم كان خطير ضد هذا الإنقلاب المشين وكان لصرف النظر نلتقي في الأحفاد متخفين أولا عن أعين أجهزتهم الأمنية وتانين عن رئيسها العميد يوسف بدري خوفن من أن يعرف ولو سئل وهو الرجل الصادق الصديق فما كان قطع شك قال ما قالهو الشيخ فرح ود تكتوك للراجل دآك الجاهو عشان يحميهو: إن الصدق ما نجاك فالكذب ما بنجيك..
لكن وهو ذاك الرجل الحذق ولا أبالغ لو قلت أن كل حصاة في مجمع الأحفاد هو ملم بحركتها وسكونها.. فقد عرف الأمر ونبهني أن ناخد الحذر وهو ما شجعني يومها أن أطلب منه طلبان أحدهم أن هناك عدد من أهلنا المجاهدين ضعفت أماهم سبل العيش وطواااالي إستوعب جزء كبير منهم عندهم ف الأحفاد في الحراسة والسواقيين وكذلك الأخ بريمة في المطبع وهو الطلب التاني والذي كان من الخطورة بمكان وهو أن نستغل مطبعة الجامعة في طباعة المناشير الخاصة بالحزب وكان أن توفقنا في ذلك لأبعد الحدود وكم من أبنائنا من كوادر الحزب نجحوا في توزيعها وكان من المشرفين علي ذلك بجانب "بكور" أبوبكر ومحمد البشرى، الأميرة مريم نقد الله وإحسان كزام والإبن للأسف الشديد نسيت إسمه بس أظنه محمد وبذكر أنه ساكن المقرن "الغابة" مع أنه كان ناشط نافذ في حراكنا الأول وهو كان سرب لينا الخطاب الصادر من اٌستخبارات العسكرية عن تحرك وسط القوات المسلحة وللشهادة اليوم أقول أنه هذا الخطاب إبننا قدر يسربهو من مكتب مدير مكتب رئيس الوزراء الذي لم يطلع عليه وعلى غير مما ذكر أنه الخطاب قد أشار الي جهة معينة القايمة بالتحرك لكن ذكر أن وسط القوات المسلحة وكما نعلم جميعا أن العسكر كانةا قد أصدروا مذكرة وبين سطورها إشارة لمثل هذا التحرك..
من أكتر المواقف كنت عشتها مع مجموعة أهلنا المجاهدين من الأنصار أنهو يوم ذي حكاية التقيع علي الإتفاق الحصلت أمس.. أننا نتعاهد على كتم الأمر بيننا وقاااااااام عمنا فضل علي قال ليا: يا دكتور هآك المصحف شان نقسمو الخاين الله يخونهو..
عرقتا وإترجفتا وإتمنيت الأرض تنشق وتبلعني... هو ياعو الكلاشنكوف الكنت شايلهو أيام حركة يوليو وكان ذي الديكور لزوم القيافة وياهن الطلقتين الفكتين في الدروة بي ماركة أربعة أقيف بيها مع ناسن الجمر يلوكوهو والنار من حمرة عينهم تهبت. بفراسة أهلنا الغرابة عمك فضل طوالي مسك يد تيراب وقال ليهو إتا بتكون متذكر القول البنقولها..
الحمد لله
تعرفوا الحبانن ديل كان حصروا كم عربة رباعية الدفع متوفرة وكم بندقية قنص ومنه القناصين ووين الإستحكامات والله والله أنا بعد ضربت العربية في قدام دار الهاتف والإستشهد فيها من الكانوا راكبين معاي فيها قسم الله ووراق عليهم الرحمة بقيت بس مستني ما هو بعد كل الرصاص دآك إلا يومك وممكن تكون شرقت موية تروحك..
عذرني لمن كان معنا في تلك الأيام العصيبة ولم أذكر ما الكُبر ود كلب، ينسيك الحبان وما ببالغ لو قلتا الخوف من اليوم الواحد ينسى إسمهو....
ونشوفكم لي قدام...

[بابكر مخير]

مكتب مستر أحمد الطاهر في مستشفى الخرطوم التعليمي وبحضور الدكاترآ الفاتح، أبو قصيصة، سيد "رفيق الغربة حتى فرقت بيناتنا بلاد المهجر"، أبراهيم بدري وهنا وقف الكُبر سدا منيعا أمام سيل الأسماء الأخرى" إلا عن ذكر إسم الدكتور مامون محمد حسين شيخ المناضليين (طبعن دكتور سيد كان معاهو في قائمة الإعدام وربنا لطف بيهم الإتنين).
في المكتب دآ "والله أعلم" حظيت بأني كنت مع تلك المجموعة ممن ذكرت أسمائهم وغابت أخرى حملنا هم البلد وإنضافت الحبيبة نعمات مالك بعدها وكان فصيل من مكون التجمع الوطني. كانت الأغلبية من شباب حزب المؤتمر وبعض أهل اليسار وكنت ولا بدن كان هناك من أهل الوسط السياسي ممن شَاعَهم مثلي حب الحرية وخانتني الذاكرة ذكرهم.
كان الرأي أن يتوسع الماعون ويتم الإتصال بالأحزاب الموقعة على إتفاقية الدفاع عن الديمقراطية في مدني وكانت الأغلبية من شركائنا هم في بُوخٍ من أمرهم أن يشارك من حزب الأمة وسطهم بواحد من إثنين عبد الرحمن عبد الله نقد الله حفظه الله "الحاج نقد الله" أو صلاح عبد السلام الخليفة "يوبي" وتحركت في هذا المجال بالإتصال السيدة سارة الفاضل عليها الرحمة والتي عملت معها فترة ناجحة كمسئول عن شباب حزب الأمة والذي هو تحت الهيكل التي كانت على رأسه في مكون من أمانات حزب الأمة القومي "أمانة التنظيم والمرأة والشباب والخريجين".
كان حينها "يوبي" في المعتقل بسجن كوبر وعليه يتعذر أن يمثل الحزب في إجتماعات تكوين التجمع وأخي الحبيب "الحاج نقد الله" كان يشكو بإستمرار من آلام المعدة والتي تلازمه الي يومنا هذا شفاه الله وكل الأهل السودان من الأمراض وحماهم من المخاطر "بيقولوا ما معناهو أكثر المخاطر فتكا علي الإنسان هي نفسه والعياذ بالله من تلك الأمارة بالسوء".
بتذكر أنه كان الكثيرين من قيادات الحزب بين معتقل وغير معروف الجهة لأمور أمنية وعليه إقترحت علي السيدة سارة عليها الرحمة أن نشكر في هذه اللقاءات قيادات غير معروفة للعامة بنشاطها (يعني ذي تمويه) بتذكر كان من الأسماء الزهاوي وعبد الله الدومة لكن لي سبب نسيتهو أو متناسيهو لم نتوفق في يشاركوا مع بقية مكونات التجمع الأولى وقلتا ليها: يا سيدة أنا عندي زول ومحل ثقة فردت هو منهو عشان ندخل إسمه لرئيس الحزب "سيد صادق" في المعتقل في كوبر وأن يبدى رأيهو.
كان أن وافق رئيس الحزب على الزول الرشحتهو والذي أبلى بصورة جيدة ومتميزة في أداء هذه المهمة الي حين إتفقت قيادات الحزب بتبديله بالأخ الدومة..
القيادي كان هو الباشمهندس أحمد أبراهيم قاسم "كورية"..
بتذكر كان أمر ديباجة تكوين التجمع مشكلة واجهتنا بسبب إختلافات في رؤى الأحزاب داخل تلك المجموعة وبتذكر كان يوم حاسم في معالجتها في لقاء محدود في مناسبة زواج الأستاذ حامد من إبنتنا أمنة أحمد إقبال مالك.. واحد من الإجتماعات المفصلية التانية في موضوع إضراب الدكاترة كان في مناسبة عزاء جدي عبد السلام الخليفة وكانت رؤى مختلفة في التوقيت ولكن قد صدر الأمر بالتنفيذ وللأسف أنه ما كان له التوفيق التام...

[بابكر مخير]

سعادة اللواء التجاني علي صالح كنت ضيف عندهو في بيتهو سنة 1978 في أبوظبي مع أنه كان منزلتي مفروض تكون عند حبيبي وشقيقي سهل خالد موسى الرحمة كلها خاص بيهو..
لكن سعادتهو شيخ عرب بكل ما يحمل المفهوم السوداني. بهجة ودين، حزم وطرفة، فهمن زايد وعلمن واسع..
رجعتا السودان وكذلك هو بعد قضى فترة إندابهو في البحرية.
(حدث ما حدث) وإنقلبت وهو طبعن لساتهو في القوة وكان قائد كلية القادة وأنا بمعرفتي المحدودة بيهو ولكن تقتي بيها تجاوزت كل حواجز المعرفة..
مشيت ليهو وحكيت ليهو وهو كان أصلن مليان داير يطق..
لقيتهم هم كانوا برضك فاتحيين قنوات وصارحتهو بالحاصل مدنين.
مرة لقيت معاهو مجموعة من ناسهو وإستغربت الأمر كييييف بيجتموا في مكتبهو.. قال ليا دي أخر حتة بيفكروا يشتبهو فيها لإعتقادهم بأنه ما في زول بيتجراء يتعمل تحرك معارض من جوآ مكاتب القيادة وفعلن هو كان مكتبهو كله شبابيك وطالي علي المدخل الرئيسي..
حصل أني لحقتا بأخي سيد نصر الدين الهادي المهدي الي القاهرة وكنا على تواصلهنا وهناك مع الحاصل..
جانا زيارة أحمد مخير "كوريآ" في القاهرة وين كان ملجئ الأول وبعد طلع إسمي في القوائم فسالته عن الأنشطة والحرآك المعارض وصدمني بخبر أن صديقي سعادتهو التجاني أعتقل وكان قلقي كبير فمثل دكتور مامون وسيد حكموا عليهم إعدام، ماذا سيحل بصديقي..
الحمد لله في عودتي للعمل في الإمارات للمرة التانية التقيته سالم معاف ىظاهريا وما حبيت أسألهو عن تجربة المعتقل كما كان الحال مع أحبتي عبد المنعم سعد الدين شفاه الله ودعواتكم جميعن له بأن يديم عليه الصحة ودكتور نصري. لأنهم هؤلاء حكوا لي عن أهوال كان تلقوها في بيوت الأشباح.. حكيت لي منهو يا ربي "زهايمر" عن شكل جلد ضهر "نصري" وقلت ليهو والله ذي ورق كراس الحساب كله مربعات.....

[بابكر مخير]

كم شكيت من حكاية ضعف الذاكر المقرونة بأواصل الحتمية مع الكُبر..
لكن سبحان الله
هي بتلقاها لمن يكون الأمر متعلق بي الجمال والفرح والسعادة..
بكتب عن معارف التقيتهم في حياتي وكان لهم عليا impact وكنت خايف أنهو ذاكرتي كما حاجات كتيرة نخت مع الأكبر تبقى ذيهم وتفشلني..
لكنها كانت هناك دون أوميغا ثري ولا فسفور ولا غيرهو..
إنهمرت الأسماء ذي مطر لبى نداء مصليي الإستسقاء
فكانت مدرار جابت سيل وهدمت الحيطان الكانت حاجة ذلك الجمال..
يا أخي حتى بهونكآ التشيكية إتذكرتها وهي كان من القابلتهم في سنة أولى صيدلة لكن هو منهو الشافها مرة واحدة وما إطبعت فيهو كله ذي إسمهو..
شكرن ليك يا الذاكرة البلقاك وكت الحاجة ما ذي الحاجات السجمانة الإتنكرت ليا..
يا أخي كان النفس دآ سحبة وااااحدة تقطع بيهو ميل جري

[imported_عبدالله الشقليني]

دكتور بابكر مخير
تحياتي وكل عام وأنت بخير

ما كنت أحلم أن يقارب الملف لستون ألفاً ....؟
عينا باردة

[بابكر مخير]

المشاركة الأصلية كتبت بواسطة عبدالله الشقليني

الملف لستون ألفاً ....؟

لساتهو يابا
بينهو وبين العمر الفية (هو ستين والعمر فوق السبعين)
ما الكُبر هو القِدم يعني إتصور مقارنتن بالأرض العندها عدد لا يحصى ولا يعد من القرون أما عن السماء فهذه لست لديها قِدم ولا سنين...
عشان كدآ حنمد كمان نشوف لي قدام

المشاركة الأصلية كتبت بواسطة عبدالله الشقليني

عينا باردة

هو إتا حاشك من الحسد والغيرة
وإنت الملاك
ويابا
عينك حتى إن قالت تصيب بتخيب
ومع الكُبر
لا حلاتن معاهو يشوفوها
لا قوة تقول يتباهو بيها
ولا عمرن وأيامن جايات يستنو ليها

[بابكر مخير]

يا أخي مع الكُبر بتتشوش بصورة عجيبة يعني هدم تركيز يكاد يلهيك عن أيتها شغلة.. إتا تكون في لحظة صفاء ذهني ودي فعليا مستحوزة علي جل وكتك.. ما هو شنهو..
الصفاء الذهني دآ معناها أنك ما بتكون بتفكر في شئ وهذه الحالة عند الإنسان "السوي" العادي المتوازن المقاييس سواء جسدية أو عقلية صعبة جداً فهو يعيش في الواقع لكن ما لي ذي حلاتنا كدآ..
الذاكرة فاضية ذي ما يكون كومبيوترك حصل ليهو كرآش وما كتا عامل حفظ للفايلات الفيهو ويلا أبقآ حوش...
القدرة الجسدية لحقت بصات الكومر ديك وبص الكومر كان في التلاتينات ولغاية أوواخر السبعينات مستعمل وما تبقى منه ليومنا هذا. حالهو حالتنا كدآ ما بيمشيك ربع كيلو ولو حتى غيرتا ليهو المكنة وركبتا مكنة "داف" واللساتك بي سوميتو اليابانية..
التشويش أنكهيا ربي أنا في علم ولا حلم ما هو بتحصل حاجات كتيييييييييييرة من ماضيك حدثت وكانت بين السالب والموجب لكنها يومنا دآ هي الحقيقة المعاشة وأمسك عندك...
نوع من أنوا التشويش:
1- الزول الكبير والصغير؛ طريقة التعامل بيناتهم كنت بتشعر بأن حقوقك مهضومة وكان حلمك أنه لمن زول كبير يقول ليك حاجة وإتا ما مقتنع تباشر بيها وتعترض وتناقش ما تكتمها في حنانك وتمشي قولهو.. (تشويش محمود وإيجابي)
2- تلقى معلومة وإتا عشتها وعايشتها فعلين وتقراها حسي كسرد من الماضي وهي خالية تمامن من الحصل ومثال لي كدآ مجموعة ممن حظاهم الله بأن يمسكو القلم ويكتبوا في الصحف يأرخوا التأريخ بما يحلوا لهم. مراضاتن لحاكم مرهوب أو شهرة وقصد مرغوب. (تشويش خطير يعرضك لنوبة غضب قد تؤدي بحياتك فالقلب صار ضعيف ذي البابور المتهالكة وضخها نزل لمستوى حرارية بري في تغذية الشبكة بالكهرباء وما بتحمل)
3- زمان كان الناس لي بعضها في الأفراح ما بس الناس تجي الحفلة وبعدها ذي الشمات من بعييييييد يتونسوا بيك "زمان كان إجتماعي، يا أخي أصله راجلها حرامها من كل شئ، إتملوا أولاد حسي كيف مع الغلاء دآ يعيشوهم.. بتذكر خال يوسف عند ولادة زنوبة بتي قال ليا: كدآ يكون خلصتوا وما تبقى عليكم، الناس لم يجيبوا الطفل الأول التانيين يقولو ليهم خاوهو وكل مرة أنهم يزيدوا لمن يتملوا عيال وبعد يونسوا بيهم ويقولوا: مساكين محمولين.. كانوا لي بعضهم في الأتراح الواصني وكت الفطور والغدآ والعشآ تجي من كل بيوت الجيران حسي إنعكست بقوا الناس يمشوا لبيوت العزاء لزوم العضة. كيد الحصل في أرض الإعتصام زاد تشويشي لأنه كان صورة للكان زمان وبقيت مشوش هل القدامي دآ حقيقة ولا فلاش بآك...
وأخيرا ولست أخرن. دي مراعاة للصدق والإلتزام بمبدء قولة حق والمحافظة علي المناوشة وتوضيح وجهة النظر.. تتشوش لمن تلقى الناس تتطبل لي زولن ما بيعرفهو وبس يركبوا الموجة.... زمان كمال ود خالي موسى ولساتهو جاء جديد من مصر وهو في الحوش، جا السيد عبد الرحمن لزيارة جدي بابكر وقام كمال بصوت عالي هتف يعيش السيد عبد الرحمن قام واحد من الأسرة نهرو قصد أنه يسكت فردا حبيبنا كمال عليه الرحمة وليجازيهو ربه قدر طيبتهو وحبه للناس ومحبة الناس ليهو: طيب أومال تطبلوا لمين...

[imported_عبدالله الشقليني]

تحية لك : دكتور بابكر مخيّر
كنت ولم تزل سندنا في الدنيا ..
رب عمر طويل نتمناه لك أن يطيل سموق الشهاب الذي يطل في العلالي

[بابكر مخير]

المشاركة الأصلية كتبت بواسطة عبدالله الشقليني

تحية لك : دكتور بابكر مخيّر

الحبيب
أنا من يوم شفتك ضارب الكداري وبفكر
أنه لابدن هناك حكمة فيلسوف وراء المشوار الطويل من سكنك لغاية درا المركز السوداني
وضحت الرؤية عندي متكاملة...
القصة هي مشتركة بين هدر قدر الكلوري "طاقة" الباقية في الجسد بعيداً عن الأمور المستعصية "من باب إدعى أنها توبة" وكذلك لحظة خلو بالنفس أثناء السير وتحدي النفس بأنه المشي لساتك قادر عليهو...
غايتهو الثقيل دآ ما بندار لي زول لكن برضهو فيهو حلاوة....
الحبيب فلتنعم بما أنت فيه الأن وبما هو قادم..

[بابكر مخير]

خديجة الحفيدة الحديقة تلميذة ومدرستها يمكن خمسة بنايات من سكنهم هي وأمها وشخص المحتكر أريح مكان في الشقة.. بس وضع يد ساااااكت..
الأيام دي إجازتها من المدرسة باقي فيها يومين تلاتة وهي مستمتعة بالسهر لي أنصاص الليالي والصحيان بعد ما الشمس تقرب تقع.
اليوم وأنا راجع علي البيت بعد نهاية الشفت بتاعتي في المندولا مريت قدام المدرسة وشايف العمال يجيروا في الحيط وينقلوا مواد بناء.
رجعت السكن ولقيت الحديقة يانعة ونضرة وتبحلق في التلفزيون بي متعة مع الرسوم المتحركة وبي حق الكُبر الغتة والحسد الأصلن ما بيرحموا لا لي حبيب ولا غريب..
قلتا ليها شايف بيجهزوا ليكم المدرسة عشان خلاص الإجازة في نهايتها..
نظرة ليا مسكينة مكسورة خاطر حتى وأنا بي حقض الجلآكين المتملكني قلبي إنشطر وندمت وقلتا أحاول التظارف وأقول شيتن أأغير بيهو وقع المصيبة..
طبعن هم رجعوا من السودان قبل يومين تلاتة وشافت آثار الأمطار والبيوت الإتهدمت وكان دآ مدخلي لتجنب آثار العدوان المزاجي فقلتا ليها...
زمان في عمرك دآ كنا بنستنى المطر ذي الكانت في السودان وبطيبة الطفولة ونعومة الخلق الرهيف إنمسح من وشيها الصبوح تلك المسحة الحزينة وركزت معايا فواصلت بعد هذا النجاح الذي تكلل بإزالة جزء من الهجيمة الكانت وقعت عليها وقلت..
كان البيوت تقع والخيران تتملي وكنا نلعب في الموية المتجمعة والبيعرف يعوم بيعوم (لييية ما بتعوموا في الإسويمنج بول) ما إتجاوبت مع السؤال خوفن أن تتقطع حبال أفكاري وقبل ما أنجر المهمة ترجع تذكر المدرسة التي هي قريبة من الباب وعلي الأبواب ووصالت؛ وكان يا جيجآ (هكذا أسميها وهي بتناديني جيدوو) أجمل شئ في هذه الكوارث أنه بعض المدارس تنهار الفصول وتعطى إجازة تمتد يمكن شهور. خلاص عاشت القصة وترسم على جوهها الجميل علامات الإرتياح وأكيد أنها مرت الكريزآ وبدآ عليها علامات النصر عليا بأني كنت بكون في مثل حالتها هذه الوقتية ووقتية لأنها بتستمتع بالمدرسة وحتى دوما تقول أنها إفتقدت صديقاتها في هذه الإجازة ما برتاح للمدرسة.
من باب الونسة قلتا ليها حكاية الغياب من المدرسة بحجت أنه الفصل وقع وهذا ما يجعلني أحمل علي جدي بابكر الله يرحمه في تلك الأوقات لأنه الذيي في العمر كان الأمطار وقدرتها علي هدم المدراس تفرحهم وتعيشهم في نعيم إجازة خارج الدورة الدراسية لكن أنا الشقي دآ وعدد من زملائي في المدرسة يفوتنا هذا لأنه جدنا عليه الرحمة بنآ المدرسة بطوب وحجر وأسمنت فكانت تقف المباني لتقهر المطر وتصد الرياح التي كانت تتقاذف بالأسقف كما أسهم لعبة الدارتس...
وكان الحزن يصل قمتهو لمن أرجع من المدرسة وألقى أصدقائي الذي جازاهم الله بمطر قفل مدارسهم وهم في الأرض الرطبة والهمبريب الجميل ضاربيين البيلي...