سلام يا مقدس..
ثم الشوق وبعدو..
بوست تريان بالذكريات الحميمة..
الذاكرة بقت خربانة لكن زمان عندنا حبوبتنا الله يرحما كانت حافظة الأحاجي دي بصورة عجيبة وفي كل يوم نسمع واحدة ..
من بعض الأحاجي البتذكرا في واحدة بتقول فيها..
في واحد رسلوهو لي حاجة ما بتذكرا فمشى لقى نسوان بتمشطن وواحدة منهن قاعدة في حفرة الدخان
قومي يالمرا وارمي الراجل في الحفرة .. واحدة من النسوان البمشطو فيهن ديل الراجل كان زوجها قامت بالحداد عليها معطت شعرا بعد داك بعدت المناحة..
في حتة في النص كدا ما متذكرة لكن المهم قالو الزول دا أسمو برغول..
قام شافا غراب قاليها مالك الليلة يا قملة حاشكال حالة الأشعار
قالت ليهو: قملة حاشكال حالة الأشعار عشان برغول وقع في النار..
قام الغراب نتف ريشو كلو قام شافو الراعي سألو مالك الليلة ياغراب الديش منتوف الريش
قال ليهو:
غراب الديش
منتوف الريش
وقملة حاشكال
حالّة الأشعار
عشان برغول
وقع في النار
قام الراعي كسر كرعين غنمو شافو البحر سألو قال ليهو مالك الليلة يالراعي غنمك كيسور..
قال ليهو:
الراعي غنمو كيسور
وغراب الديش
منتوف الريش
وقملة حاشكال
حالّة الأشعار
عشان برغول
وقع في النار
قام البحر عكر وحومر حداداً على برغول..
تاني قام منو جا سأل البحر
قال ليهو مالك يا بحرنا عيكور
قام البحر قال ليهو
بحركم عيكور
والراعي كيسور
وغنمو كيسور
وغراب الديش
منتوف الريش
وقملة حاشكال
حالّة الأشعار
عشان برغول
وقع في النار
غايتو طشاش طاش فتقوم تفتش لينا القصة دي وتجيبا كاملة لامن أجيك بي واحدة تانية..
