نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 08-07-2007, 01:49 AM   #[1]
Asaad Alberair
:: كــاتب نشــط::
 
افتراضي نانسى X فضيلى جماع

[align=center][/align]

[media]http://aafat.org/backup/Mesa.wmv[/media]

http://aafat.org/backup/Mesa.wmv

كعدها دوما زينتنى العزيزه حنينه مساء الخميس الفائت بمحادثه تلفونيه فحواها أن الجمعة غدا، على كوب من الشاى، ملتقانا بديار الاستاذ الفاضل فضيلى جماع وأن قطب رحانا ستكون ألمطربه نانسي . قبلت الدعوه دون تردد... هذا قدري ولا مناص فانا تطربني جلسات الموده وموسيقى الترم ترم ....وتحرك مكامن الرقص فيى أنغام الجالوا. كيف الخلاص يادنيتى .... ترارا را ترارا را تم تم..... كما تأوه محتارا قبلي عبد الحميد يوسف فى على كل حال شكلك جميل غضبك بديع ذى بسمتك...... وأى ابتسام ذلك الذى انسكب علينا أمسية الخميس.
أقول حزمت متاعى بعد ساعات عمل يوم الجمعة وتوجهت صوب اللقيا. فى الطريق إلى ضاحية هارو رغم تجهم العسس وحشر أنوف كلابهم فى حقائب اللندنيين الا ان المدينه كانت مبتسمه وهى ترفض ان يبتل مساءها بسحب عابره او يعكر صفوه بعض البزَات العسكريه المنتشره فى الافق.
وصلت ديار أسرة الاستاذ الفاضل فضيلى جماع ممنيا النفس بفنجان شاي وأمسية للأنس والطرب. تواضعت أمانيى أمام أريحية شيراز وبقية العقد الودود. وجدت كوب الشاى (بى قدره قادر) تحول الى مائده (مستديره).
سئلت (بضم السين) مجموعه ثريه من الاعراب عن الباقى من لذتهم: قال عبد الملك أبن مروان محادثة الاخوان فى الليالى القمرعلى الكثبان العفر (ياخى طخ). وقال سليمان بن عبدالملك .. قد اكلنا الطيب ولبسنا اللين وركبنا القاره (الخيل) وامتطينا العذراء فلم يبقى من لذتى الا صديق أطرح بينى وبينه مؤونه التكلف وقيل التحفظ.
وجدتنا نشارك ابن عبدالملك فى اكل الطيب والعشم فى انس الصديق.
كان صديقنا مضيفنا الفاضل فضيلى, أخذنا فى هدوء فى عوالم الأدب العالمى. تحدث عن ألادب الروسى وعن عوالم فئودور داستايوفسكى وعن الادب السودانى وتعبان لوليونق. حديث شيق سرد فى تواضع مدهش يسهل عليك المتابعه بل المشاركه.
بنفس هدوء الحكى أنسرب السرد الى ربوع سودانا (نحييك وأنت كل آمالنا) تنوعت المواضيع وشملت طرائف فى ثقافة اكرام الضيف (الضيف قربه .... أملاها ودردق(ه)ــا ) وتسلل الانس الى نواحى الحقيبه وثقافات الغناء والطرب، ثقافة عنت على اذاعة أمدرمان أن تطالها. تحدث عن فضل أغنيات الحقيبه على مسيره الاغنيه السودانيه واستشهد بأبيات شعر غنائي عديده. رغم كجنتى لأغانى الحقيبه (بالدس -من غير اعلان) الا أنى وجدت نفسى مفتونا. .
يااااااااااااا صوتها لم سرى....
الصوت هنا للمطربه نانسى .......صدحت
[align=center]فى الضواحى وطرف المداين....[/align]
سرى صوتها فى الحضور تخلل عصب الحس واستلب الانتباه. الغناء عند نانسى حالة من الوجد تتنزل عليها من حيث تدرى ولاتدرى, تسلم نفسها لها طائعه. يستعزبها السامع ويتعذب بها من هدت أكتافهم حمى النستالجيا (ام برد).
[align=center]أغفرلو ياحنين
.......ياحنين
وسامح لو ظلم.[/align]
شجن وماأدراك ما أشجان نكابد فيها أطراف وأعماق الليل فى غرف تدمى وحشتها الافئده. نتجلد ونخرج الى صباحات عجزت أشعة الشمس عن ملامستها نرتدى ثياب المكابره وأن "...ماتمشى حالك ياسرحان".
الاستماع الى نانسى يصيب الوجدان بالرهق, اذا فلابد من لقيمات (as such) نرتاح عليها. دورا آخر من الشاى الصاموتى واللقيمات المبهره (بى بليلة مباشر) سبقته أدوار عديده أجادت به علينا أسره الاستاذ فضيلى. شاى ولقيمات وأحاديث هنا وهناك.... عن أغانى الحكَََامات وأغانى البنات والغربه ووجع القلب والمصير..
[align=center]ليه بنهرب من مصيرنا
نمضى أيامنا فى عذاب
ليه تقول لى انتهينا
نحن فى عز الشباب[/align]
تغنت نانسى كدرويش مستلب فى حلقةٍ للذِكر الا أن أسباب الوجد هنا أكثر تشعبا كما أن الصوت أكثر أناقه. فى فضاءآت اللامحدود يتسرب قيثاره صافيه عزبه الى منابع الظمأ يسقيك طرب و يصيبك بالدروشه. يجدد أحزانك وأفراحك فى آنٍ وينعش أشجانك وذكرياتك
كده وزاد وجدى .... وقيل .....الاشتياق والاحتراق والوجد لنا.... تتملكك حاله من الابداع وتتخيل أن أنت المغنى ودون وعيك يخرج الصوت منك (بس مطره فى الزنكى) تنظر فى أوجه السماعين فتجدهم يعانون (الانضراس) .... يا الله....تااانى شترتها.... كيف الخلاص يادنيتى (مره تانيه غير القبيل ديك)
[align=center]نحن فى ماضينا قوه
قوه تتحدى الصعاب
ابتدت ريده وموده
واصبحت فى ذاتها غايه
كنت تمنحنى السعاده
ولى .....
لى تتفجر عطايا
ولم أغرق فى دموعى [/align]
تغرق فى دموعك تاكل نيم ياحبه ... ... وتشيل شيلتك براااك.....
ابراهيم عوض فنان مبدع ومقتدر وأغنية المصير بالتحديد يؤديها بصوره بديعه. أدتها نانسى وكانى أستمع لنفس الاغنيه وكأنى أستمع لأغنيه أخرى.... وكأنى إتوجدت هنا وهناك .....أعطت نانسى الاغنيع طعم جديد الا أنه اوريجنال، طعم لابد يسجل لها فى أماكن تسجيل براءآت الاختراع.

[align=center]كانت أيام ياوطنى
زى الاحلام ياوطنى[/align]
أداها الحضور برعاية المايسترو نانسى. أداء يستطيع أى أشتر أن يكون جزء منه أو هكذا تود أن (لو) تصدق (ياشباب عمرى.....)
لفضيلى والاسره كل الشكر ان جعلوا هذا ممكنا
قيثاره موده لكل حضور تلك الامسيه
ولنانسى فى فضاءآت الطرب الف تحيه وهى توقد شموع المجاذيب

مخرجان:
1- كما كان ابراهيم عوض، نور الجيلانى، هاديه طلسم ومحمود عبد العزيز مدارس جديده للغناء فى أزمان مختلفه من مسيرة الاغنيه السودانيه. هى نانسى فى اعتقادى مدرسة غناء جديده ...تنصهر فيها ملكات المطربه والمفرده واللحن ويكون الناتج غناء باحساس عالى (هى أشياء لاتشترى).
2- كل أسباب النجاح متوفره لنانسى إن وجدت الرعايه والتشجيع



التعديل الأخير تم بواسطة خالد الحاج ; 08-07-2007 الساعة 07:34 AM. سبب آخر: وضع فيديو
Asaad Alberair غير متصل   رد مع اقتباس
قديم 09-07-2007, 05:00 PM   #[2]
امجد محمد الامين
:: كــاتب نشــط::
 
افتراضي

اسعد

صوت نناسي عجاج
برد الروح
وينجد الملهوف
ويمرق الغرقان
ويطمن الخايف

والله ده ابداع ولا احلى
ياخي ده طرب.. بنتر نتر.. في الجوه
ويخلي القلب يقول تح.. تح.. تح



التوقيع: [frame="1 80"]لن تبصرنا بمآق غير مآقينا
لن تعرفنا مالم نخبرك فتعرفنا
أدنى ما فينا قد يعلونا
فكن الادنى تكن الاعلى فينا

الفيتوري
[/frame]
امجد محمد الامين غير متصل   رد مع اقتباس
قديم 10-07-2007, 12:19 AM   #[3]
خالد الحاج
:: كــاتب نشــط::
الصورة الرمزية خالد الحاج
 
افتراضي

أبو السعود سلام
لمتين يا أسعد؟؟
لمتين تقعد توجع في أخوك كده..
يعني بس تتشطر لي في (تعال غير جو) (لندن الأيام دي حلوة) ...
زي دي ما بتكلمني بيها مالك؟
نانسي وفضيلي..
شكيتك علي الله..
ده يا أسعد لقاء فيه شفاء للروح من كل سقم... أي والله..



التوقيع: [align=center]هلاّ ابتكَرْتَ لنا كدأبِك عند بأْسِ اليأْسِ، معجزةً تطهّرُنا بها،
وبها تُخَلِّصُ أرضَنا من رجْسِها،
حتى تصالحَنا السماءُ، وتزدَهِي الأرضُ المواتْ ؟
علّمتنا يا أيها الوطنُ الصباحْ
فنّ النّهوضِ من الجراحْ.

(عالم عباس)
[/align]
خالد الحاج غير متصل   رد مع اقتباس
قديم 10-07-2007, 09:39 AM   #[4]
خالد الحاج
:: كــاتب نشــط::
الصورة الرمزية خالد الحاج
 
افتراضي

[align=center][/align]



التوقيع: [align=center]هلاّ ابتكَرْتَ لنا كدأبِك عند بأْسِ اليأْسِ، معجزةً تطهّرُنا بها،
وبها تُخَلِّصُ أرضَنا من رجْسِها،
حتى تصالحَنا السماءُ، وتزدَهِي الأرضُ المواتْ ؟
علّمتنا يا أيها الوطنُ الصباحْ
فنّ النّهوضِ من الجراحْ.

(عالم عباس)
[/align]
خالد الحاج غير متصل   رد مع اقتباس
قديم 10-07-2007, 09:40 AM   #[5]
خالد الحاج
:: كــاتب نشــط::
الصورة الرمزية خالد الحاج
 
افتراضي

[align=center][/align]



التعديل الأخير تم بواسطة خالد الحاج ; 10-07-2007 الساعة 09:44 AM.
التوقيع: [align=center]هلاّ ابتكَرْتَ لنا كدأبِك عند بأْسِ اليأْسِ، معجزةً تطهّرُنا بها،
وبها تُخَلِّصُ أرضَنا من رجْسِها،
حتى تصالحَنا السماءُ، وتزدَهِي الأرضُ المواتْ ؟
علّمتنا يا أيها الوطنُ الصباحْ
فنّ النّهوضِ من الجراحْ.

(عالم عباس)
[/align]
خالد الحاج غير متصل   رد مع اقتباس
قديم 11-07-2007, 12:30 PM   #[6]
Asaad Alberair
:: كــاتب نشــط::
 
افتراضي

أمجد
ياأخوى دى درويشه..... تسمعها لا تعرف نفسك فى حمد النيل (الطرب مش الترب) لاتعرف نفسك فى حلم ولاعلم....
قلت
اقتباس:
صوت نناسي عجاج
برد الروح
وينجد الملهوف
ويمرق الغرقان
ويطمن الخايف

والله ده ابداع ولا احلى
ياخي ده طرب
.. بنتر نتر..
في الجوه
ويخلي القلب
يقول تح.. تح.. تح
وقلنا
اقتباس:
ولنانسى فى فضاءآت الطرب
الف تحيه وهى توقد شموع المجاذيب
فمرحبا بك ياأمجد حيث إيقاد الشموع .... .... ح أتصل بالرفيق (رغم أنفه ) حافظ يعمل ليك عضويه ... أنا نفسى ماعارف عضوية شنو .... الا يازول عجبنى والله كلامك الفوق ده



ود الحاج ودالحاج ودالحاج
تعلم محبتى وتعلم يقينى أن الاشياء بوجودك طعمها أحلى....
الحاصل قررت نانسى السفر فكرت وقدرت وقالت أبر(بر يبر برا بحرا أو جوا) ناس سودانيات فى شخص فضيلى وحنينه..... حصل اتصال بينها وحنينه وفضيلى. الخميس المساء اتصلو بى وآخرين. خلق الله دى كلها اعتزرت الا أخوك ... لكن عارفك لو كنا كلمناك السبت عشان تجى جمعة أمس كنت جازفت ليك جيه ... الا الله غالب
أها ياخوى كان فى زول تلومو مفروض تلوم نانسى.... بى طريقتك

الصور فى السلك



Asaad Alberair غير متصل   رد مع اقتباس
قديم 11-07-2007, 08:03 PM   #[7]
رأفت ميلاد
:: كــاتب نشــط::
الصورة الرمزية رأفت ميلاد
 
افتراضي

والله يا أسعد البرير
أسعد الله أيامكم والقصة متكررة ولا جات كدة

ما حسادة والله


اقتباس:
1- كما كان ابراهيم عوض، نور الجيلانى، هاديه طلسم ومحمود عبد العزيز مدارس جديده للغناء فى أزمان مختلفه من مسيرة الاغنيه السودانيه. هى نانسى فى اعتقادى مدرسة غناء جديده ...تنصهر فيها ملكات المطربه والمفرده واللحن ويكون الناتج غناء باحساس عالى (هى أشياء لاتشترى).
2- كل أسباب النجاح متوفره لنانسى إن وجدت الرعايه والتشجيع
حكيت وكفيت

الله يديك ويديها العافية



التوقيع: رأفت ميلاد

سـنمضى فى هذا الدرب مهما كان الثمن

الشـهيد سـليمان ميلاد
رأفت ميلاد غير متصل   رد مع اقتباس
قديم 11-07-2007, 08:12 PM   #[8]
haneena
:: كــاتب نشــط::
الصورة الرمزية haneena
 
افتراضي

سلام يا أسعد
مشتاقين شديد ياأخ
(معليش على الزيارة المتأخرة) ....
أختك مزرورة في الشغل أكثر من كلب طاحونة رأفت ميلاد!!!
و يا الله من ذلك اليوم
فضيلي
نانسي
و ذلك الصوت الذي تعرفه
وقبل كدة....بديع اللقاء
كان يومآ لا ينسى

لا ننسى حضور أختنا و عضوة سودانيات...
سهير شريف في آخر اللقاء
الأخ الضيف الزائر من الخرطوم الطيب العباسي
و شوقه للخرطوم التي لم يكن قد فارقها بأكثر من أسبوع
و( يا بلدي يا بلد أحبابي)

ماذا أقول
شكرآ ...فضيلي
شكرآ آسيا..زوجنه و رفيقة دربه الكريمة المضيافة
شكرآ شيراز
محمد
منتصر

في بيت فضيلي لا أعتبر نفسي ضيفة
بل مضيفة
أعزم الآخرين عنده و أنا ..مطمئنة

سأعود بالصور
بس الصبر



التوقيع: Life is all about choices
haneena غير متصل   رد مع اقتباس
قديم 11-07-2007, 09:49 PM   #[9]
فضيلي جماع
:: كــاتب نشــط::
 
افتراضي

في بيت فضيلي لا أعتبر نفسي ضيفة. بل مضيفةأعزم الآخرين عنده و أنا ..مطمئنة
[size=8]
شكرا يا دكتورة ..ولو قلت غير ذلك لغضب أهل البيت كلهم منك. شكرا يا أصيلة. كانت الليلة زاهية بوجودكم جميعا وبوجود الزائرة بنتنا الفنانة الموهبة نانسي عجاج ربنا يحفظها. أكثر ما سعدنا به في الجلسة أن الجميع كانوا يتصرفون بعفوية وبساطة..مما أزاح منا جميعا مؤونة التكلف.
[/size]



فضيلي جماع غير متصل   رد مع اقتباس
قديم 11-07-2007, 10:31 PM   #[10]
نبيل عبد الرحيم
:: كــاتب نشــط::
الصورة الرمزية نبيل عبد الرحيم
 
Thumbs up

الأخ العزيز أسعد
فاتنا يوم جميل بسبب التليفون وأيضا Short Notice كنا نمنى أنفسنا بلقاء الأستاذ الجماع و نانسى وأسرة سودانيات وإنشاء لله نلتق فى ظروف أحسن كما أتفقنا فى التليفون مع أسرة سودانيات مكتمله .
أسعد لك المودة



نبيل عبد الرحيم غير متصل   رد مع اقتباس
قديم 13-07-2007, 01:26 PM   #[11]
مي عبدالعظيم
:: كــاتب جديـــد ::
الصورة الرمزية مي عبدالعظيم
 
افتراضي

والله بختكم

قابلت الفنانة الرقيقة نانسي لاول مرة في بيتها الانيق في زيارة صيفية لهولاندا السنة الفاتت واطربتنا بصوتها الشجي الذي يصيبك بقشعريرة غريبة ولابد انكم استمتعتم بيها كما نحن...

وإنشاء الله المرةالجاية نكون معاكم



التوقيع: There a light
A certain kind of light
I want whole my life to be
To live it with you
Live it with you

مي عبدالعظيم غير متصل   رد مع اقتباس
قديم 17-07-2007, 08:25 PM   #[12]
haneena
:: كــاتب نشــط::
الصورة الرمزية haneena
 
افتراضي

عدنا
و عذرآ للتأخير

فضيلي يقدم ديوانه هدية لنانسي




التوقيع: Life is all about choices
haneena غير متصل   رد مع اقتباس
قديم 18-07-2007, 01:19 PM   #[13]
Asaad Alberair
:: كــاتب نشــط::
 
افتراضي

رأفت ميلاد ...
ماشفت العرب الفوق هناك ديلاك قالوا شنو (محادثة الاخوان فى الليالى القمرعلى الكثبان العفر )

اها يا حبيب حسادتك مقبوله ومقدره ..... واقول ليك أكتر كمان ....أنا ذاتى حاسدني.....
الا بنصحك يارافت كان الله قسم ليك تسمع نانسى لايف لازم تجى لابس ليك خوذه (helmet) عشان بعدين كان دقيت الدلجه ما نبقى فى نزيف داخلى ولا عنبر المجنونات
شكرا لشمعتك المضافه والمضاف اليها

نبيل يانبيل ....
مكانك كان شاغر ياصديق.... واهو الدنيا قسم.... ولازم نرضى بالمكتوب يا الله ... الليله هوى
أرخى أضانك قريب كده بجر ليك سلك.... ابقى جاهز...
على الهامش كده ... سعدت جدا أنا بالمحادثه التلفونيه



التعديل الأخير تم بواسطة Asaad Alberair ; 24-07-2007 الساعة 01:24 PM.
Asaad Alberair غير متصل   رد مع اقتباس
قديم 18-07-2007, 01:52 PM   #[14]
Asaad Alberair
:: كــاتب نشــط::
 
افتراضي

مى عبد العظيم .....
مدخل
وجودك هنا بالنسبه لى خاص .... شاكرك عليه كتير... فكرت أكتر من مره تأجيل كتابه البوست ده لاسباب عديده أهماها .. تقديرا لاحزانك.
قررت اخيرا كتابته.... وجودك هنا انسجم وتبريراتى العديده.
انا سعيد والله بيك هنا .... لك صادق تعازيى وودى الاكيد
مدخل للطوارئ
قلتى لى سمعت نانسى فى بيتها.... يظهر عليك انك من أهل الحظوه .... الا انحنا لينا الله وعيشة السوق.....نكابس فى اليوتيوب او يتفضلوا علينا الحبان (فضيلى وحنينه ) بما تيسر.... وشاكرين وحامدين وفى روايه أخرى لابدين.
وعدتى قلتى المره الجايه انشاء الله معاكم ..... اها من هس(ع)ـــــى انا بكلمك أبقى قريبه
شكرا لشمعتك ...
مخرج الى المحبه
فضيلى حنينه أو حنينه و فضيلى( لزوم الجندر كلكى)... اقول بجيكم بالمهله




Asaad Alberair غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 09:28 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.