اقتباس:
المشاركة الأصلية كتبت بواسطة مشرف منتدى نوافذ
إتعطل سير البوست ده لأسباب تنظيمية ليس إلا..
والحمد لله تم إنشاء منتدى نفاج خالد الحاج إللي حيستوعب أي عمل طوعي يبادرو بيهو الزملاء أو الزميلات
وتخصيص منتدى وارد/منصرف إفطار طالب ، وسير العمل
فعلى المسئولين التنظيميين ( أشرف السر/ خال فاطمه ) إنو يبادروا بالعمل ، وليهم التحية على تصديهم للمسئولية الأخلاقية دي..
حيقوم أشرف السر بتمليك العضوية رقم موبايلو ، لتنسيق التحاويل المالية ، ولتنسيق آلية تحويل الرصيد بالنسبة للناس المتواجدين في السودان ، علماً بإنو لمن تلجأ لبيع رصيدك بيكون في خصم مقدارو 20% من المبلغ الكلي..
عندو تصوًر كلي للإدارة المالية حيقوم بتمليكو ليكم ..
والخال العزيز حضورو الإنساني في العمل الطوعي أكسبو خبره في إدارة وتنسيق المبادرات.
طيب..
بالنسبة لنفاج خالد الحاج..
في عدة بوستات نزلت في منتدى الحوار حول
مساعدة أطفال أبكرشولا : لمهند الخطيب
وحول النفاج : لشليل
وحول الإهتمام بالمرضى : لماجد تاج
على سبيل المثال لا الحصر..
هل إنتفت الحوجه لمتابتعتها والإهتمام بيها ؟
أو نقفز لسؤال تاني.. هل بالضرورة نعمل أبديت للجمعية العمومية لنفاج خالد الحاج لأنو في ناس إبتعدو وفي عضوية جديده ؟ وعلى ضوء تقسيمات الجمعية العمومية من ملتزمين بالدفع الشهري ومن مبادرين بتسيير المشاريع ، وقرارات الجمعية العمومية بالإجماع ، وتقييم الوضع المالي نقدر نحدد إذا بنقدر نسوق البوستات الإتفتحت دي وللا لأ..
رايكم يهمنا.
|
ـ
أكيد سمعت بإدارة عموم الزير يا شليل ..
إن ما سمعت بيها ممكن أكتب ليك عنها هنا ..
المعنى الا تتوسع في التفاصيل الادارية والبيروقراطية لأنها ممكن تقتل الموضوع بمنتهى البساطة ودون أن تعرف مكمن الخلل
قصة إفطار طالب دي وعن تجربة تقوم على ركائز واضحة
تجميع فلوس
تحديد مدرسة
شراء الاغراض ( فول ، كبكي ، جبنة ، زيت ، طحنية ، مربة .. غاز أو فحم )
تحديد مين ح ينجض الفول ، ومين ح يجهز السندوتشات ، ومين ح يوزعا
أكتر من كدا ح يبقى تفاصيل ما ليها أهمية في بداية العمل
اللجنة مسئولة توثق عملها ( المالي والاداري والتنفيذي ) لأغراض الشفافية وتجويد الاداء مستقبلاً
لو في خمسمية جنيه المفروض على طول يتم تجهيز أول دفعة سندوتشات وتوصل للطالب بأسرع وقت
حتى لو فطرناه يوم واحد بس ما ساهلة ، ونسأل الله الثبات والدوام
في تجربة مماثلة تقوم بيها منتديات ود مدني ويسهم فيها عدد من الاخوة في قطر
( ممكن أزودك برقم هاتف المسئول بالدوحة
وهو رجل خلوق ممكن يقدم ليك تفاصيل مهمة في كيفية تجويد العمل دا
أزودك هنا طبعاً )
المهم الفكرة تقوم على تقسيم العمل على مجموعات متطوعة كلها
واحدة تعمل الفول .. واحدة أو واحد يجهز السندوتشات .. ومجموعة للتوصيل أو التوزيع
أبدو والمسائل ح تتوسع بشكل يفوق التصور ..
والاسهام من خارج عضوية المنتدى ح يكون أكبر من داخله
أنا ممكن أجيب مصادر تمويل خارجية بإذن الله إن المشروع بدأ بالفعل ..
وما أكثر أهل الخير حيث نقيم ..
المهم ضربة البداية ، والباقي ساهل ..
ـ
