عـِيـَنْ الخريف

[عبدالله علي موسى]

المشاركة الأصلية كتبت بواسطة شبارقة

ولكن إذا نظرنا إلى أسماء باقي العـِيـَن تجد أنها جميعها مرتبطة بالأسد الحيوان فبخلاف ضراع الأسد نجد النترة وهي (نترة الأسد - والأسد النتر) والطرفة وهي طرفة عين الأسد وهي مشهورة عند الأسد (تطرف إحدى عينيه) وكذلك الجبهة (جبهة الأسد) .. إلخ العـِين ... والله أعلم

كلامك سليم! أنا مع الحماسة لم انتبه لهذه النقطة. مشكور على التوضيح و متابعين بمزاج. تحياتي

[حافظ حسين]

المشاركة الأصلية كتبت بواسطة شبارقة

العـِيـَنة الأولى : الضـُراع

كل التسميات التي نحن بصددها كما أسلفنا مربوطة بالأسد وهي هنا تشير لضـُراع الأسد .. ويبدأ الضـُراع من يوم 7 يوليو الى يوم 21 منه .. ويقال عنه: إن صح خريف وإن بطل صيف ... يعني الـ 13 يوم دي لو كانت ممطرة فإن الخريف سيكون رائعا ً من حيث الزرع والضرع... وإلا فإنه سيكون صيف

شبارقة سلام يا خي و رمضان كريم و تصوموا علي خير
بالجد من البوستات الجميلة جداً و كان الله أدانا العافية بنجي نخرف* معاك في
البوست دا ....

و الضراع و ما أدراك ما الضراع ...... عينة الضراع دا عينة فيها الجوء ملائم جديد للإنبات (المسوك)..... اضافة الي ذلك في عينة الضراع ما في اي آفات زراعية مثل الحشرات و الطير و البحات .....
عشان كدا و تأكيد لكلامك الفوق (إن صح خريف وإن بطل صيف).... يعني الفلاحين بكونوا مهلوعين جداً و لازم يزرعوا في خلال ال 13 يوم و دا و الا جات نترة الطير و الحشرات .....
و حد فهمي أن إسم (الضراع) ليه مدلوله الاقتصادي يقول ليك كسرت ضراعي.... ضراعك أخدر و شد الضراع ذاتو

[شبارقة]

المشاركة الأصلية كتبت بواسطة عبدالله علي موسى

مشكور على التوضيح و متابعين بمزاج. تحياتي

تسلم أستاذنا عبد الله وتشكر على المتابعة وأنا سعيد بذلك.

[شبارقة]

المشاركة الأصلية كتبت بواسطة حافظ حسين

شبارقة سلام يا خي و رمضان كريم و تصوموا علي خير
بالجد من البوستات الجميلة جداً و كان الله أدانا العافية بنجي نخرف* معاك في
البوست دا ....

و الضراع و ما أدراك ما الضراع ...... عينة الضراع دا عينة فيها الجوء ملائم جديد للإنبات (المسوك)..... اضافة الي ذلك في عينة الضراع ما في اي آفات زراعية مثل الحشرات و الطير و البحات .....
عشان كدا و تأكيد لكلامك الفوق (إن صح خريف وإن بطل صيف).... يعني الفلاحين بكونوا مهلوعين جداً و لازم يزرعوا في خلال ال 13 يوم و دا و الا جات نترة الطير و الحشرات .....
و حد فهمي أن إسم (الضراع) ليه مدلوله الاقتصادي يقول ليك كسرت ضراعي.... ضراعك أخدر و شد الضراع ذاتو

يا سلام ياخي .. حافظ حسين معانا بي جاي ؟ والله ده يوم سعيد

حبابك .. وكل عام وأنتم بخير .. تشكر على الإضافة الحقيقية والثرة

وجودك وباقي الأحبة المعانا هنا إثراء حقيقي للبوست .. تسلم.

[حافظ حسين]

العكير أخوي تعال بسراع.......
العكير أخوي ما يفوتك الضراع.....

هذه الترنيمة نغنيها أنا و أختي الكبري, و شقيقي الأصغر و ابناء عمي و بناته, نغني بهذه الترنيمة نبدأ بذر الأرض بعد ان يدمدم ابي ببعض الادعية لم أحفظها و حد علمي ان فا ت علي فوات استرجاعها مرة أخري , بعد أدعية أبي أختي الكبري تبدأ ببذر أول بذرة و قدرت ما أجتهدت عشان أحظي ببذر البذرة الأولى بئت بفشل كبير .... و القصة زي ما بيقولوا اولاد الزمن ديل .... القصة مأكله معاي جنبة شديد .... مرة أحتجت لأمي قلت ليه ايش معني هي عشان أبوي يديها اول البذار (الفرعة)... أمي شكلها زعلانة منها و من أبوي في لحظتها بإستياء كدا كان ردها (أبوك بيقول بخيته .... لكن باختتها دي ما ظهرت علي ابوكم دا)
المهم بعديها بديت اعمل تيرسنق لموضوع بخاتتة أختي ليه بخيتة لكن ما لقيت أي إجابة بس بعد كبرت عرفت أن الوالد كان يمارس negative discrimination
اها واقفين وين ؟
ايوة نغنا لأخونا العكير و بعدها نبدأ الزراعة و ندعو رب الضراع يجيب المطر و لو ما جاء الضحك شرطنا .... لكن بكرة بنمشي مع أبوي المرة دي بلاد عمي و بنعمل نفس الحركة .... الأغنية .... البذرة الأولي و حكمة الله برضو بتبذرها بت عمي ما ولد .... شكلها بخاتة قايمة علي النوع gender base luck
ما عارف عمي دايما وقت الزراعة بيكون ما في ما عارفه بمشي وين ....
و نرجع لعينة الضراع .... العينة دي تحديداً بتخش الضحي و بدأت تغيرات واضحة في السحب .... سحب سوداء سريعة الحركة ..... مجموعة من النسور تسبح لله في السماء .... الجو بتغير بوضوح ... بعدين العينة بتخش دون اي مقدمات يعني تنوم تصحي تلقي نفسك في الضراع
و لحد ما نجي راجعين
للنترة السقاية
الطرفة البكاية
الجبهة النداية
الخرسان اليتم مجان
العوي و السماك
و يا سما امسك ماك
و يا بحر بقفاك
و لو في العمر بقية مرة تاني بجي

شكراً شبارقة علي هذه السياحة

[شبارقة]

يا سلام عليك يا حافظ ياخ

شكرا ً ليك إنت ياخي على هذا الإبداع الجميل

والله يا حافظ أكاد أبالغ لو أقول ليك أنا هسه بكلامك ده شميت ريحة التراب والطين وشعرت بصبيب المطر والمويه تبلل عراريقنا .. ورجعتني لأبعد من ذلك عندما كنا نغني صغارا ً : يا مطيرة صبي لينا في عينينا.

يا لها من أيام ياخي ... والله عدلت لي مزاجي يا حافظ .. تسلم ،،،

[شبارقة]

العينة التانية : النترة

النترة هي العينة التي تلي عينة الضـُراع مباشرة وهي تبدأ من يوم 22 يوليو* إلى يوم 3 أغسطس .. وكما أشار أخونا حافظ في مداخلته فإن النترة فعلا ً هي العـِينـْة التي تنمو فيها الحشائش والشجيرات وتظهر فيها حشرات الخريف وما أدراك ما حشرات الخريف (أنا غايتو عندي زكريات ما جميلة مع الفسـّاية )

ذكرنا في بداية البوست إنو عـِيـَنْ الخريف مرتبطة بأعضاء الأسد أو بعض تصرفاته وصفاته .. وهنا نجد أن النترة هي إحدى صفات الأسد وهي المشي بطريقة معينة وكأنه يجبد شئيا ً (مشية فيها بعض الخيلاء والترفع) والبعض يقول بأن النترة إستخدام الضراع في الجبد (الجذب) بقوة.

أبو الطيب المتنبي قال واصفا ً أسد :

يطأ الثرى مترفقاً من تيهه فكأنه آس يجس عليلا

يعني يضع رجله على الأرض برفق ويرفعها برفق (نوع من التيه والخيلاء والشوفونية ) وياها دي النترة زاتا .. وشبه هذه المشية بفعل الطبيب عندما يجس المريض

هناك من يقول بأن النترة هي زئير الأسد وهذا غير صحيح والدليل على ذلك إنو هناك عـِينة تقابل زئير الأسد ألا وهي عينة (العوا) والعواء ليس للأسد كما نعلم ولكن أهلنا زمان لا يعرفون إستخدام تعبير زئير فأصبحت العواء صفة عامة للكلب والذئب والأسد .. والله أعلم.

* عمي حاج علي كان عسكريا ً قبل أن يصبح مزارعا ً (تعرض لما تعرض له بعد فشل الحركة التصحيحية بتاعة هاشم العطا) .. كان بقول لينا إنو نترة الخريف دائما ً تعيد إليه زكريات حزينة .. والإشارة طبعا ً ليوم 7/22 وما تلته من أيام عصيبة على السودان والعالم في ذاك الزمن.

[حافظ حسين]

كتبت مداخلة طويلة و عريضة بعنوان المثل البيقول وليد الفترة زراعتو في النترة و دي كناية عن الفشل

[خالد غالي]

ياسلام ياسلام ياسلام

هذا والله بوست جميل وحميم

اعتقد والله اعلم انو فات عليكم ان تذكروا بان اهم مايميز عينة الضراع هو الرائحة الجميلة المسماة الدعاش

(ما كان كفي بين كفك في وداعك غير إشعاع البروق يشدُنا
عبق الدعاش إذا بدا في غير موسمه الخريف)
او كما قال عالم عباس محمد نور
واعتقد ان رائحة الدعاش المميزة تنتج بعد اختلاط اول زخات المطر مع تربة الصعيد الخصبة المخلوطة ببعض انواع الحشائش اليابسة مامتذكر اسمها شنو

ودي دعوة للكاتب الاديب القاص المستنير نائب رئيس مجلس الادارة
السيد ابوبكر عباس، ليحكي لنا عن عبق الدعاش البكر وعن ذكرياته في مناطق الصعيد الواعدة والموعودة

تحياتي ومحبتي للجميع

[حافظ حسين]

يا شبارقة اخوي دي شيعة شنو ادخلني فيها دي غير مباراة أولاد الفلاحين! عادي ممكن يفوتك الفطور و تكتبك من الموبايل. و لكن لذاكرة النار كلو يهون....... اها اجيك للمثل، ويا عكود انا صاحب غرض و مرض و بكتب من الموبايل عليك الله تبري المداخلة و صحح الأخطاء اخوك ما يبقي فرجة بين القبائل، اها المثل بيقول: وليد الفترة زراعتو في النترة
الفترة هي المرة الخملة الكسولة و مفروض تجيب جنا كسول يخلي الضراع كلو ويجي يزرع في النترة، و البذرة لو نجت من الطير ما بتنجو من القبور، و لو طلعت من القبور البحات راجيها، يعني مسور ما في.
يا شبارقة انا ذكرياتي الأليمة مع النترة هي الدود، و حتي أخاف الدود و تجار الشيل و عليك النبي وقت تصل الجبهة النداية تقول لي عشان اكتب المرابين الصغار ديل.

[عبد المنعم حضيري]

والله يا حافظ ما شاء الله مزارع بالفطرة

واصل يا شبارقة وفوتنا النترة وولادة الفترة دي ... البرق قبلي والريح صلاح

تحياتي

[شبارقة]

الأعزاء حافظ حسين وخالد غالي وعبد المنعم الحضيري

والله مداخلاتكم وكلامكم عن المطر والزراعة والمسور والدعاش وريحة الطين والقـِرة والبروق بالإضافة لصوت الرعد والغنم وبيوت الطين ورفع التراب فوق البيوت وتنضيف الصـبّابات ... الكلام ده خلاني في حالة من الشجن وبعض الحزن

ولغاية ما أجيكم برواقة يا ريت تستريحوا معانا ونستمع ونشاهد المبدع القدال وهو يتغنى شعرا ً غير بعيد عن فحوى هذا البوست

https://www.youtube.com/watch?v=LuPEW9oPUnk

[حافظ حسين]

المشاركة الأصلية كتبت بواسطة عبد المنعم حضيري

والله يا حافظ ما شاء الله مزارع بالفطرة

واصل يا شبارقة وفوتنا النترة وولادة الفترة دي ... البرق قبلي والريح صلاح

تحياتي

ابرق يا بريق مكادا
و طبق فوقنا العينة
وقت الوليد يطل بالطاقة
أنا أموت كاتمة شهادة
عبدالمنعم الراجل الجميل سلام و تحية
با خي أخوك فلاح بالفطرة ساي و كنت بعرف الهوا و البرق البجيب المطرة
بعرف مطر البخات الكبا و فات
بعرف عريج
أنا كزول مهذب يا حضيري بستني شبارقة يكتب العينة و أنا أجي أعلق
و بالله يا شبارقة تعال لبوستك دا و الا ممكن اديك خلو رجل و بستلمو

[معتصم الطاهر]

شبارقة

بوستك دا زارعو فى نترة ..

ما تعال ..
لأنو وراك فى زول قاعدة يسقي سقاية مطر الليل ..

[الرشيد اسماعيل محمود]

مادام شبارقة بقى يعمل حركات وما داير يجي، انا بسأل حافظ حسين عن عينة الخرسان،، شنو علاقتها بالأسد!؟