الليلة غايتو سهر الجداد
المحاضرات البجهز فيها ان شاءالله اقدر اتمها
طيب ،
يا عم فتحي أنا من الأول كلامي كان محدد : أنا الوم ناسنا قبل ما الوم المصريين ،
صراحة لا تهمني مآلات مصر ومآلات شعبها الا بقدر تأثيرها علي السودان وعلي كسوداني ،
انا واحد من الناس علاقتي ضعيفة بالفن المصري والثقافة المصرية في عمومها ،
لا يمكن طبعا تجاوز اشخاص كأمل دنقل مثلا في الشعر أو صنع الله ابراهيم في الرواية ،
ودا طبعا ما موضوعنا ، لكنو ذا علاقة بالباراغراف الفوق دا ،
طيب تاني ،
الفشقة موضوعا مختلف ،
الحبش لم يدعوا انها ارض حبشية او علي الاقل لم يحاولوا تحبيشها !
انا لفيت كتير في مناطق القضارف الحدودية دي ايام شغلنا في الكلازار والموضوع هنا مختلف ،
بالنسبة لمسألة الدخول في الحرب دي فأعتقد انو المصريين هم الاقرب للدخول في حرب مع السودان وليس الاثيوبيين ،
وبالمقارنة اذا كان في حرب بين اثيوبيا والسودان فهي في الغالب ح تكون محدودة بخلاف الوضع لو قامت مع مصر .
مسألة انو السودانيين بيكرهو المصريين كراهية غير مبررة فدا ما صحيح علي اطلاقه ،
ارجع للرابط الفوق القبيل وشوف تاريخ العلاقة ماشة كيف ،
غير كدا هسه قريب دا ياخي ايام كورة الجزائر ومصر في الخرطوم شفت الناس دي استهزأت بينا كيف؟
ياخي في واحد مذيع قعد يكورك صحوا الرئيس !
فتأمل .
اكرر انو المسألة ليست كرها في المصريين ، المسألة حبا في السودان المسكين دا ياخي.
ليه تبيحوا للمصريين انهم يستغلو ضعف حكوماتنا وتشوفوهم عورا اذا ما استغلوا انبطاحاتها وتستنكروا علينا اننا ما نحب الناس البيمارسوا السلوك دا علينا ؟
مالكم كيف تحكمون ياخي ؟
مسالة محبة المصريين للسودانيين دا موضوع ما باقدر افتي فيهو ولا بيهمني عموما باعتبار الشواهد والممارسات تلغي ذلك ،
يعني ناس يحبوك وجيشهم يحتل جزء من بلدك !
يعني هل ح يكفي للاسرائليين انهم يحبوا الفلسطينيين ويعاملوهم كويس والقصة تنتهي ؟
عموما فيما خص الحبش فانت لما تمشي في شوارع اديس برضو ما بتحس انك غريب ،
غير كده عادي انت ممكن تسمع محمد وردي من الاذاعة الاثيوبية والناس ديل بيحتفو بيك جدا لما يعرفو انك سوداني ...
الحبش ديل عموما موضوع تاني وكنت قريت بعض الدراسات او الاوراق البتقول انو الجعليين والشايقية اصولهم حبشية ،
في دراسات تانية برضو بتشير الي انهم نوبة مستعربين ،
في كل الاحوال اثيوبيا موضوعها مختلف.
اخيرا يا عم فتحي اكرر، لا يهمني المصريين الي درجة ان اكرههم او احبهم،
لا أكرههم - وهذا لا ينقصهم شيئا وكذلك لا يزيدهم - ولكني لا أحبهم - ودا برضو لا ينقصهم شيئا ولا يزيدهم - ،
لكن بالمقابل ح اكون حريص انو اساهم بما اقدر انو الناس - السودانيين قصدي -تعرف نوايا الناس ديل وممارساتهم تجاهنا كارض وشعب .
احب اضيف هنا انو انا مصدق تماما كلامك في معاملة الناس الطيبة ليك هناك لكن دا ممكن يتغير اذا الحكومة بتاعتم رأت انها محتاجة تعبي الناس ضد السودان - ودا ما حاصل لغاية الان لأنو الدايرنو بيلقوه بلا مقابل !
