تم نشره في بداية رمضان العام الماضي !!

[أبو أماني]

سلوا صيامكم مع أبي أماني ..

الحراااااااامي ...!!!

[justify]
جاء العم وأسرته في إجازة صيفية .. وكعادته جاب لينا الهدايا فردا فردا .. ولكن عين ود أبونا آدم ما بتتملي .. وكنت رغم الهدايا الخاصة التي وصلتني من عمو دونن عن ساير الباقيين رغم كده كنت متربص ليكم بشنطة العم الرهيبة (الدوائر) .. وداير ألقى لي فرصة فيها دون جدوى فالعم كان ماما حريصة .. قافل طالع نازل وشايل مفاتيحة .. أها ربك رب الخير أنا قاعد جاء العم فتح الشنطة وطلع ليو كروسة سجائر روثمان .. وقبال يقفل الخزنة سوري قصدي الشنطة .. جاء صديقه الأوحد كمال عبد الجبار .. لتحيته ولما سمع العم صوت صاحبه كمال نسى المفاتيح والشنطة فاتحة وجرى على صاحبه وهاك يا أحضان ومقالدة .. في اللحظة دي كان الذئب في حالة إنفراد تام بالضحية .. ولم يجد إبليس عناء يذكر في إقناعى حيث دخلت يدي بسرعة البرق تحوص داخل الشنطة ودقات قلبي تقول يا غربتي .. وأثنا طوفان اليد في داخل الشنطة لمست ليكم حاجة قوووية ..وسمينة .. وكمان برضو ثمينة فيما يبدو .. وسحبتها ليكم لقيتها ساعة منبه ضخمة ملفوفة في cover بلاستيك للوقاية وكان منظرها جذابا وصوت عقاربها يدندن في روعة .. تيك تاك ..تيك .. تاك .. ولست أدري لماذا سمعت هذه الدقات كما لو كانت الساعة تقول لي .. شيلني .. معاك .. شيلني .. معاك .. ولم أود أن اكسر بخاطر المسكينة فشلتها ولففتها داخل هدومي وإنسحبت لغرفتي وختيتها في الدولاب ثم رجعتها .. ثم تحت السرير .. ثم وراء الدولاب .. وبقيت شايلها ولافي بيه جوه الأودة زي الشايل ليو جنازة ومالاقي حتة يدفنها فيها .. المهم حلت عليا فجاءة نعمة الذكاء العائلي الموروث وختيتها وسط الهدوم داخل الشنطة حقتي الفي رأس الدولاب .. وشلت نفسى بكل إرتياح وختيتو ..ومرقت في براءة الأطفال .. أوزع في الإبتسامات الرشيقة لكل من يلقاني .. بدون أدنى سبب ظاهر ..

إكتشف العم مزمل فقدان الساعة المنبة وهاج وماج .. وصخب وهدر .. ثم هدأ فجاءة ونظر إليا نظرة جعلت فرائصي ترتعد .. وقال بصوت هادي .. عموما أنا الشال الساعة حا أعرفو ..!! كنت في حالة رعب لا أحسد عليها .. وكانت الساعة داخل شنطتي في نظري وفي تلك الظروف أشبه بقنبلة زمنية موقوتة وداير أتخارج منها ما قادر .. قضيت ساعات في مرحلة إنعدام الوزن تلك وفي حالة شتات ما بعده شتات .. إلى أن جاء وقت شاي المغربية وجلسنا في حوش حبوبة خجيجة .. والعناقريب الهبابيات جمب بعض وعنقريب بدون لحاف جلست عليه الحاجة والشاي قاجي ومزمل قاعد نص قعدة في لحاف مفروش على الهبابي وعليه سجادة ناعمة إيرانية .. وهو ينظر لساعته بين الحين والحين ويغالب الإبتسام .. والمنظر ده والله يا أخوانا وغوشني وقلبي ما راده .. لاكين نقول شنو في القسمة .. المهم عندما تعامدت عقارب ساعة العم مزمل بصورة عامودية .. مشيرة للسادسة مساء من ذاك اليوم الكؤود .. سمعنا فجاءة صوت جرس المنبه يدق من الساعة المسروقة .. مسروقة شنو ؟ الساعة المعارة .. وكان للأسف الشديد الصوت طالع من غرفة عابدين ..ومن جهة دولاب عابدين وعلى وجه الخصوص من راس الدولاب داخل شنطة الهدوم ... شنو؟؟؟ وبعدين؟؟؟؟ بعدين في عينكم خليكم ظريفين كملوا الباقي براكم أعفوني من الخاتمة الأليمة دي .. عالم (سكة) فالحين تسمعوا لي شمارات الناس وتتضاحكوا عليهم لاكين معليش وكل سنة وإنتو طيبين .. يلا .. ششااااوووو حتى سانحة أخرى ..

[أبو أماني]

سلوا صيامكم مع أبي أماني ..

على فكرة !!!

السنة الفاتت لما نشرت هذا الموضوع لم يتكرم بالتعليق سوى العزيزة آمال الشيخ .. وعليه ركبت في رأسي أدخل في تحدي مع الذات وأشوف السنة دي في تغيير ولا تستمر الصهينة!..

[هيثم علي الشفيع]

سلامات لي عمنا الحبيب

ورمضانك كريم

وإن شالله تصوم وتفطر على ألف خير..
(أوووووووووووع تكون خشيت الزون بتاع فاطر بأمر الدكاترة داك؟؟)

أهاااااااااااا

طبعاً أنا أكتر "سوداني" في "سودانيات" بيمشي {يفتش الماضي}

وعااااااااااااادي ببحت لي بوست ليهو سنتين ونص

وعاااااااااااااااادي الجماعة بيصهينوا منو لامن يندفن تاني





فاااااااااااااا شنو؟؟؟؟

الجاتك في منبهك سامحتك

ومااااااا تتحسس شديد كان مافي زول جاك حايم بي جاي



وأسأل .....


واحد جنّو يبحّت بوستاتو القديمة

[أبو أماني]

المشاركة الأصلية كتبت بواسطة هيثم علي الشفيع

سلامات لي عمنا الحبيب

ورمضانك كريم

وإن شالله تصوم وتفطر على ألف خير..
(أوووووووووووع تكون خشيت الزون بتاع فاطر بأمر الدكاترة داك؟؟)

أهاااااااااااا

طبعاً أنا أكتر "سوداني" في "سودانيات" بيمشي {يفتش الماضي}

وعااااااااااااادي ببحت لي بوست ليهو سنتين ونص

وعاااااااااااااااادي الجماعة بيصهينوا منو لامن يندفن تاني





فاااااااااااااا شنو؟؟؟؟

الجاتك في منبهك سامحتك

ومااااااا تتحسس شديد كان مافي زول جاك حايم بي جاي



وأسأل .....


واحد جنّو يبحّت بوستاتو القديمة

هيثومة .. والله بعد مداخلتك دي لو ما في زول تاني عبرني ما يهمني تب .. يا خي والله مشتاق ليك شوق شديد بلحيل .. كيف الحال والأحوال .. والأهل والحبان والمعنويات .. إنشاء الله كل حاجة تمام .. وهل من جديد في عالم الشعر اللازوردي ...؟؟؟ لك الحب قناطيرا مقنطرة ..

[هيثم علي الشفيع]

المشاركة الأصلية كتبت بواسطة أبو أماني

هيثومة .. والله بعد مداخلتك دي لو ما في زول تاني عبرني ما يهمني تب .. يا خي والله مشتاق ليك شوق شديد بلحيل .. كيف الحال والأحوال .. والأهل والحبان والمعنويات .. إنشاء الله كل حاجة تمام .. وهل من جديد في عالم الشعر اللازوردي ...؟؟؟ لك الحب قناطيرا مقنطرة ..

تسلم والله يا عمنا

والأشواق من هنا لا عندك





أما الشعر...
ف
دي كانت آخر حاجة -يناير الماضي-

http://www.sudanyat.org/vb/showthread.php?t=29289

وبعدها...............وقفنا



عظيم التقدير

[فتحي مسعد حنفي]

وأنا المسكين دا زعلان علي سندويتش بيرقر والزول أتاريهو حرامي محترف من جهلتو

[فتحي مسعد حنفي]

المشاركة الأصلية كتبت بواسطة أبو أماني

سلوا صيامكم مع أبي أماني ..

على فكرة !!!

السنة الفاتت لما نشرت هذا الموضوع لم يتكرم بالتعليق سوى العزيزة آمال الشيخ .. وعليه ركبت في رأسي أدخل في تحدي مع الذات وأشوف السنة دي في تغيير ولا تستمر الصهينة!..

ما رضيت أكسر بخاطرك..يللا عنو ما حد حوش.

[يحي عثمان عيسي]

الحبيب ابو اماني

رمضان كريم ومشتاقين
وتاني شنو يا ربي .. ايوه يا اخي قفلت علينا الباب يعني هثومه وبس

[أبو أماني]

المشاركة الأصلية كتبت بواسطة يحي عثمان عيسي

الحبيب ابو اماني

رمضان كريم ومشتاقين
وتاني شنو يا ربي .. ايوه يا اخي قفلت علينا الباب يعني هثومه وبس

تصوم وتفطر على خير يا صباح الخير كله .. يا أخي والله اللوم قالوا بيجي بالغفلات لاكين برضو مقامك لا يطال .. إنت الخير والبركة يا أبو العبد .. بس الحلبي البقولولو فتحي مسعد ده البيحلني من الساندويتش حقه ده شنو؟؟ معقولة ساندويتش أربعة سنة وشوية ما يتهضم لي وواقف لي في حلقى .. عليك الله يا يحي يا ود أمي دي نصيبة شنو دي ؟؟؟؟