دبوس من كفتو رماه
*📌دبابيس📌*
*📌دبوس من كفتو رماه ....*
الشروق مرت من هناك .....
يقول لك في واحده من الحلال التي تطل على البحر (النيل) كان فيها راجل درويش ...
زي مابيقولوا زول الله ساكت وما عندو خبر بالدنيا فيها شنو ...
كان من عادة هذا الدرويش أن يتحمم في البحر ....
وكان من عادة هذا الدرويش ايضا انه يتخلص من كل هدومه تماما وينزل يتحمم في البحر يا مولاي كما خلقتني ولما ينتهي من الحمام والسباحه ويرجع عشان يلبس هدومه كان اول حاجه يعملها يقيف طوله ويشيل الطاقيه ويلبسها ويقعد يَقَلْوِظ (يبرم) في الطاقيه ويعاين لي ضله ثم يرجع يَقَلْوِظ فيها ثم ينظر الى ظله حتى يتأكد من انها ظابطه ثم بعد داك يلبس العراقي وآخر حاجه يلبس السروال ....
--------------------------------
بمناسبة طاقية الدرويش دي نشكر السيد معتمد محلية ابوحمد على دعوته ورعايته لبرنامج (الشروق مرت من هنا) لتمر من ابوحمد لتعكس صورة عن المحلية وهو عمل نحمده له ....
والشروق مشكورة مرت اول ما مرت بابوحمد المدينة وبينت في اول مابينت لنا ولغيرنا من خلال مرورها ان ابوحمد الآن اصبحت قوميه وذلك من خلال الحضور الذين كانوا في البرنامج والذين كان واضح جدا انهم من مختلف مناطق السودان حتى يخيل لمن يستمع اليهم وهم يذكرون اماكنهم الاصليه انهم ذكروا كل مناطق السودان ....
اهلا بهم في ابوحمد اخوان اعزاء وأهل احباب والعنقريب يشيل مئه ...
حسب المعلن أن البرنامج سيسجل عدد خمسة حلقات في جميع انحاء المحلية غايتو في الحلقه الاولى دي البرنامج حاول ابراز الوجه الحضاري للمدينه فلم يجد غير المينا البري والمستشفى الذي بناه رجل البر بابكر عباس (شقيق النائب المستقل مبارك عباس) والذي لاقى فيه من تعنت ومعاكسات ما يجعل اي رجل بر يحجم عن مد يده بالخير لكنه اصر على تأدية واجبه تجاه اهله .....
اها غير ديل تاني ناس الشروق يبقالهم بالخراب ما لقوا اي حاجه يصوروها ....
عموما نقول للسيد المعتمد ومن خلفه السيد اللواء حقوقي والي الولاية ومن خلفهم هناي وهناي (هم عارفني وانا عارفهم) غايتو الشروق مرت من ابوحمد وقَلْوظت لكم الطاقية أها حا تقعدوا تقلوظوا فيها لي متين ؟ ...
نصيحة ليكم خلوا الشروق تركز على احتياجات المحليه ويصوروا ليكم المدارس المهدمه والجوامع والخلاوي التي تساوت بالارض ....
خلوهم يصوروا كيف الناس بي يشيلوا المريض بالعنقريب في المركب وكيف بي ينقلوهو في البوكسي ....
خلوهم يزوروا المراكز الصحيه المهجورة التي يسكنها البوم ....
زوروهم حديد الكبري المرمي ليهو كم سنة في مقرات ....
خلوهم يزوروا أهل الاطفال الذين توفوا خلال الاسبوعين الاخيرين جراء لدغات العقارب ...
وروهم الناس بي يشربوا المويه من وين
وروهم عمدان الكهرباء المستخدمه كمرابط للحمير ولا فائدة منها اكتر من ذلك ...
خلوهم يزوروا محطات السكه حديد التي كانت تضج بالحركه واصبحت اثرا بعد عين
وروهم طريق الباصات وكم يبعد من مناطق سكن الناس وكيف الناس بي توصل بيوتها لما تنزل من الباص ....
وروهم الالات التي يستخدمها الناس في الزراعه
وروهم برميل الجاز في ابوحمد بي كم
وروهم ووروهم ووروهم
لو استحيتوا ....
اقعدوا قلوظوا في الطاقيه وعاينوا لي ضلكم زي درويش الحلة وخلوا الشعب يتفرج في عورتكم وراء وقدام ....
قال الشروق مرت من هنا قال
📍هسع الزول الكسب الفرن الكهربائي دا لو طلع ساكن برا مدينة ابوحمد دي بي كيلو واحد يغز البلك حق الفرن دا وين ؟
الاجابه متروكه لاهلي بني رباط
قال الشاعر :
يا غفيرا عليك الرسول
لحظة بس انظرا ما في طول
جيت اشوف الاناناس شتول
منو لي زمن طولت طول
قال لي : فوت اختاني يازول
إنت جنيت والا مخلول
افرض اتلقاني مسؤول
ولَيِ جابك ... انا شن أقول ؟
📌ابووضاح📌
منقول
اقول قولي هذا واستغفرالله لي..........................
|
