[سلمى الناير]

المشاركة الأصلية كتبت بواسطة فتحي مسعد حنفي

تعرف يامنعم انت قلت كلام منطقي ومحسوب بدقة حسب المعطيات الأدتنا ليها سلمي.
تعرف أنا في النهاية وصلت لي انو سلمي الناير دا اسم وهمي وربما كان برضو محمد فرح بمكنة جديدة..وبقول ليها خلينا نفترض انك صح وأنا غلط فهميني بتتهربي ليه من انك تقولي انتي من وين من بحري..مع اني وصفت ليك بيتنا بي خرطة وقلت ليك أمشي أسألي عني هناك ولكنك تصرفتي تصرف الشخص الذي يعلم تماما مقدرتي علي كشف ملفك خلال ساعة واحدة بمكالمة تلفونية واحدة..
الحاجة التانية أنا ما فاهم سر الاحترام الغير مبرر لي وعدم ردودك علي رغم مهاجمتي لك وكأن الأوامر قد جائتك بعدم التعرض لي لسبب لا أعلمه وأتمني أن أجد له اجابة حتي لا أستمر في مهاجمتك والتشكيك فيك بلا سبب منطقي وأقول لك كما قلت لحاتم شتم الكيزان ليس دليلا علي عدم انتمائك لهم..
كدي خلينا نعمل نقطة ونبتدي سطر جديد وساعديني بالشرح وأثبتي لي اني غلطان عشان أعتذر ليك هنا مرة تانية وأجي السودان مخصوص أعتذر لك في بيتكم..
الغريبة أنا أعرف معظم عوائل الخرطوم بحري واسم الناير دا ما صادفني وحسب كتاباتك بتحاولي توري انك انسانة متقدمة في السن لكن الواضح هنا هو العكس والواضح كمان انك بتنزلي هنا الردود البتجيك جاهزة من من جهة مجهولة ولكنها معلومة.ودي ما غلوتية
استمري ياماما فأيامك هنا قد أصبحت معدودة الا اذا أثبتي لنا خطأنا في حقك.

شوف يا مسعد حنفي
كلامك دا فيهو اساءة وعدم احترام لخصوصيتي ياخ انا من ما جيت هنا كل الناس حذرتني منك وفهمت منهم انك انسان سخيف او حشري وتتدخل فيما لا يعنيك فقررت ما احتك بيك دا اولا ..
تانيا ايه علاقة البكتبو هنا بسكني واسرتي انت زول ما عندك شغلة ولا شنو ؟ وهل خلاص مشاكل السودان دي كلها وقفت على اني شخصية وهمية ولا حقيقية ..
هنا في ناس بكتبوا باسماء ما معروفة زي همسة شوق وسمراء وما شاكل مع الاعتذار ليهم وكان ممكن اسجل باسم (قنبلة) او (فاطنة رشدي) او ممكن انتحل شحصية رجل ا او الخ ..
انت حدك معاي تناقشني في البكتبو هنا تتفق معاهو او تختلف على كيفك لكن تقول لي بيتكم وين وجاي اشرب معاك شاي واشرب لي حجر شيشة مع زوجك ما مسموح ليك ولا مرحب بيك فاهم ولا ما فاهم ؟
ومع ذلك ومين قال ليك الناير من الاسر المعروفة في بحري حامد الناير التقلاوي كان معلم ونقابي ومن المغضوب عليهم كل سنتين في بلد لحدي ما نزل المعاش ومتزوج من بحري ولو ملاحظ انا قلت والدتي هي المن بحري وعلى العموم انا مولودة في حلة حمد نفسها وفي بيت المرحوم علي مرسي وعلى يد الداية زكية ..
واسكن حاليا حلة الدناقلة في منزل مملوك لزوجي ... اكتر من كدا ما من حقك تعرف ولا مفروض تعرف .. اما حكاية ايامي بقت معدودة في المنبر دا دي انا برفعها للادارة ونشوف رايهم شنو فيها اذا لم يتخذوا ضدك اجراء مناسب انا التي ساغادر ..
وتاني ما تجيني تعتذر لاني ما حارد عليك لأنك لا تحترم الاخرين وخصوصياتهم وما بتعرف حدودك وين ..
والسلام