إلى كل من بارح صفحات سودانيات أو تكاسل

[عكــود]

المشاركة الأصلية كتبت بواسطة الوليد عمر

[align=center]...................[/align]





[align=right]


يا سلام عليك يا كبير القوم

قرقار مراقد الفيل عكود أبوى

تعرف كيف تمرق الفكك من الرويحة و تدفق حنَّك الطاعم دا وتذكِّر الناس بالذى ما دايرنو يكون مضى ، مبادراتك الدغرية الدافية دى البتخلى الزول يخش فوق ضوافرينو ، ياخى أنا بس خجلت ساى ما أخش عليكم بى جاى ، حتى إن بِقى بعد الصفحة الخامسة المهم الواحد يبادر بالتصالح مع نفسو ويطاوعها فى أحاسيسها ويحاول قدر ما يمكن أنو يكون ذات نفيستو دون ملاواة أو مجابدة ، ليه ياخى و أنا بحب المكان دا و ناسو الفيهو ، ليه ما أندفِق و أتحتحت و ليه ما أوفِّر للرويحة ملاذاتها و نفاجاتها للقلوب الصافية بالعشرة الطويلة ؟ ليه ياخى حالة التضاد النفسية الجوانا دى ونحن الكلام فى الخاطر و نتحاوم فى المكان زى ود أبرك حايد الشرك ، نرفرف جاى و جاى دون أن ننبهِل بالبُهار المخبأ فى القراطيس ، مرَّات يطقشك ليك بوست فى الصميم لامن تحفِّظوا لى محرِّك بحثك ، وتخش تتاوق زى الحرامى تقرأ وتعيد ، تقرأ وتعيد و الرأى ماهو بعيد ، فوق طرف لسانك ، طيب ما ترشُّوا و خلى الباقية التبقى و محل الرهيفة التنرتق .

ياخ أنا شدة ما خجلان ، لامن الوسيعة ضايقابى

ما عندى عذرا أقولو ولا إستيضاح أقدمو

قاعد حايم بى جاى بقرأ و بقرأ وبقرأ لكل الناس

و المدهش مرّات أنسى حتى أعمل (ساين إن) كأنو التداخل بقى ما أولوية ، طيب ياخى ما أمش أشوف لى رواية مكسيكية أحتل فيها ولا أكوِّن أيتها رأى ، خلى النكمِّل بيها باقى الحاكوكة و الشره الذهنى الحاصلة على دى ، سودانيات ليست كتاب فى تقديرى ، رغم أنها أجمل ما تكون الكتابة ، سودانيات عالم من التواصل و المحبة ، أها ما أظن فى زول عندو أدنى شك فى المحبة ، طيب و الشق الأول ، أحى أنا من الشق الأول ، التواصل دا ياهو ذاتو الجنًّن عبد القادر إقتباسا من قتيل ظبية المسالمة فى بوست مجاور عبأنى بالكثير جدا مما توجَّبت على كتابته و لم أفعل و جايى لى عكود أتشكى و أتعذَّر !

ياخ أنا زعلان من نفسى شديد ، و بقدر ما أتوق إلى التواصل مع الأحباب فى سودانيات بقدر ما تخمنى الدنيا فى دوكتها المشكنبة وحينما تفرغ من بشتنة أحوالى و دردرة محتالى ، ترمينى على قارعة رويحتى التعيبانة دون أقل إعتذار


الذى يربطنا بهذا الإسفير هو أن للناس هنا نكهة غير و بهاء مختلف و قلوب نقية لا تشوبها الشوائب ،يجمعهم عشقهم للنور و كرههم للظلام و يهيمون شغفا بتراب الوطن ويتفقون حول ثوابت الخير والجمال


ياخى أنا عايز أتواصل زى زمان و أكتر مع الناس الرايعين ديل
سنين طويلة وما بهتت صورهم فى البال
ولا نسى القلب طعم الحروف البهية
تتقاذنا الأنواء والأهوال ولا ننفك نحن إليهم فردا فردا
و نشتاق نشتاق ونخرم نخرم كما قال عكود لحروفهم السمحة

شن نسو يا كبير القوم ؟

الغياب شيطانو شاطر



و الذين تكاسلو و ما أدراك من هم ، حالتى من بعضهم و حالتهم من بعضى و الباقى علينا دا عين حاسدة و قاصدة عديل كى . الراى كيفنهو يا الحبان؟







النجيضة :


و جبت الإشادة بمداخلة مليانة للطيبان و بمتاوقة الباش




[/align]

















[align=center]...................[/align]

[align=justify]سلااام يا الوليد،
وحبابك ما غريب الدار (مع الإعتذار لمعارضي مايو!)

أنت من الناس البيكتبوا، عن أي موضوع، بمزااااج وتسيّح مخّو،
رغم إنّك مُقِل في مواضيعك وتكتفي، في كثير من الأحيان، بالمداخلات في المواضيع المطروحة.
بس برضو قبلانييين وراضيييين، لأنّو مداخلاتك دي، بتسوى موضوع/مواضيع بحالها.
هسّع عليك الله زي الكتابة الحبّرتها فوق دي، في زول عاقل بيجي يقدر يقول أزيد لي فيها حرِف؟
والله إلاّ زولاً مجنون وللاّ واحداً عاضّيهو كلِب!

دحين أنا ياخوي ما زلت بكامل قواي العقليّة . .
وكنت، وما زلت، أبعد من درب الكِلاب قدر المستطاع.
فــ . .
شوف غيري.

على جنب:
والله ما تتخيّل فرحتي كيف برجعتك دي،
لو عرفت مقدارا يا الوليد، ما بتغيب تاني . .
يا مؤمِن "في كل كبدٍ رطبةٍ أجرُ". [/align]