اسئله حاده

[imported_محمد الحاج]

يخوض اليوم منتخبنا الوطنى مباراه هامه فى تصفيات امم افريقيا ضد اثيوبيا
والشارع هادىء لا شىء فيه يدل على ان هنالك لعبه هامه..لا اعلام..ولا حركة مشجعين.. عكس مباريات الهلال..والمريخ..التى تحدث فيها الظيطه والظمبريطه!!
هل المنتخب سقفه ادنى من سقف الفرق؟لذا لا بواكيه له
وهل الوطن اقل قيمة من الفبيله والانتماء له انتماء صورى؟
و هل الانتماء للقبيله يعادل او يفوق الانتماء للوطن؟
وهل القبيله = المواطنه؟
ومن اين دخلت الى اضابير الدوله؟........؟
...

احاول ارفع ايدى الفى الدم منقوعه
وامسح سواد سور المدن المفجوعه
واهمز ركاب خيلا بقت تابعه ما متبوعه
واهز الساق على المهماز الاالساق مقطوعه

[imported_حافظ حسين]

العزيز محمد الحاج
تصدق نفسي أسئلتك دي دارت بخلدي و أنا بقرأ خبر مباراة الفريق القومي, علي فكرة أنا ما لاحظت ملاحظاتك دي, حول ما في ظيطة و زمبريطة لحدث زي دا, لانني ببساطة ليس لي كبير غرض في كورة القدم, لكن قريت خبر في جريدة ....
أن صقور الجديان الليله لاعبين مع الاثيوبيين و أن الدخول للمساطب الشعبية مجان... تصدق مجاااااااااان.... و التذاكر إشتراها كلها الكاردينال كدعم لمنتخبنا الوطني....
إتساءلت أسئلتك دي بشكل تاني:
هل الحال وصل بينا أننا ما يكون عندنا حس قومي لدرجة الكاردينال يشتري لينا التذاكر عشان نخش المساطب الشعبية؟
بالتأكيد يا محمد لم الوم أحد و لكن زادت تساؤلاتي و إزدادت حدة.....
العلاقة الجدلية بين الوطن و المواطن من يحددها و بمن و ماذا تتأثر؟
هل يكفي اننا نقول بنحبك يا سودان و فعلاً بنكون بنحبه؟
الي أي مدي ناس الكورة, الغناء, الربات و الخ ممكن يكون هم ثيرمومتر حقيقي لقياس علاقتنا بهذا الوطن؟
الفريق القومي غير مشرف نعم و كثير الاخفاقات .... لكن هل أكثر أخفاقاً من النيل عطبرة, أهل شندي , أو اي من فرق المدن الناس بتجيها صدمة سكري في حالة الفوز أو الغلب؟

[imported_رأفت ميلاد]

والله كلامك فى الحس الوطنى البقى إرتباطو بالكورة دى حاجة تمخول .. أنا ما ناكر أفضال الرياضة فى السياسة .. نلسون مانديلا ذوب الجليد بين البيض والسود بالرياضة .. لكن دى الحتة الواقفين فيها نحنا

حافظ بقول:

هل الحال وصل بينا أننا ما يكون عندنا حس قومي لدرجة الكاردينال يشتري لينا التذاكر عشان نخش المساطب الشعبية؟

ياخ الكاردينال ده بشترى تذاكر المساطب الشعبية كلها .. ما تمشوا ليه يساهم معانا فى (إفطار طالب)

تعيش كتير تشوف كتير

[قيس شحاته]

سلام يا محمد الحاج وحافظ

ما أظن تشجيع المنتخب أو عدمه معيار لوطنية الفرد، بقدر ما هو حالة انعكاس لنتائج المنتخب.
المنتخب الذي يستجدي اتحاد الكورة المؤسسات لدعمه ورعايته، لن نطلب منه أن يحقق نتائج جيدة، ولن نطلب من الجمهور أن يلتف حوله بالتشجيع، في ظل واقع الإعلام الذي يكرس لامبراطورية هلال مريخ، وفي ظل تبرؤ الدولة منه.
لاعبو المنتخب يلعبون بلا مقابل، خدمة للوطن، والوطنية وحدها لا تكفي لتحقيق الفوز دائما، فشكرا لهم على أية حال.

[imported_سلمى الناير]

المشاركة الأصلية كتبت بواسطة قيس الصديق شحاته

سلام يا محمد الحاج وحافظ

ما أظن تشجيع المنتخب أو عدمه معيار لوطنية الفرد، بقدر ما هو حالة انعكاس لنتائج المنتخب.
المنتخب الذي يستجدي اتحاد الكورة المؤسسات لدعمه ورعايته، لن نطلب منه أن يحقق نتائج جيدة، ولن نطلب من الجمهور أن يلتف حوله بالتشجيع، في ظل واقع الإعلام الذي يكرس لامبراطورية هلال مريخ، وفي ظل تبرؤ الدولة منه.
لاعبو المنتخب يلعبون بلا مقابل، خدمة للوطن، والوطنية وحدها لا تكفي لتحقيق الفوز دائما، فشكرا لهم على أية حال.

انا مثلا ما عندى كبير غرض بالكورة كيفن يكون قياس معيار الولاء حقى للسودان بمباراة فريق كرة القدم السودانى؟

[imported_أسعد]

يا اخوي في السودان اصبح احكام العقل ضرب من الجنون
اعمل نايم وعيش اللحظة









ياخ (عيش اللحظة) فيها حلاااااااة دين اعلان

[معتصم الطاهر]

ما هو مقياس انفعال الناس بالوطن ..

مظاهرات الجوع

تشجيع كرة القدم

نظافة الشوارع

معرفة التاريخ

طاعة اولى الامر


اخ... أقل حاجة ( تجويد العمل) ..

[imported_محمد الحاج]

الاخ حافظ
شكرا لمرورك
فهذه اسئله صغيره فى مجرى الوطن الكبير؟
فيبدو انها سوف تتناسل منها اسئله كبيره..
كأن نُعرًف ماهو الوطن؟
لانه اصبح محاصر بالقبيله؟
وتحضرنى هنا يوميات التحرى مع الضابط على عبداللطيف عندما ساله المتحرىالانجليزى ما قبيلتك؟ نفس السؤال يشهق من جديد!!فى المستشفيات واستمارات التوظيف..و...
فهذا مبدأ فرق تسد

[imported_محمد الحاج]

رافت مبلاد
لك المحبه
الكوره هى جزء من حياة الناس وهى دبلوماسيه شعبيه..وخرجت من تعريفها الاولى كلعبه مرتبطه بالمتعه..وبدات تاخذ سمة المعركه..لان الناس نقلوا اليها احباطاتهم وقلقهم وهزائمهم وتوتراتهم الحياتيه وبداوا يفتشوا فيها عن زهو انتصار فما زادتهم الا احباطاعلى احباطهم.فالكوره تعزف لها اناشيد وترفع لها اعلام..فالبرازيل ذاع صيتها بكرة القدم وليس بانتاجها للبن..لذا يسعد الناس كثيرا عندما يكون فريقهم الوطنى ممثل لهم فى محافل الرياضه الدوليه..فماتقدمه الرياضه تعجز عنه السياسه

[imported_محمد الحاج]

الاسعد
لك التحايا
عيش اللحظه يعنى صهين
قدرنا قادنا الى دروب لم تعلمنا سماكة الصهينه
وخدر المشى فى حالة السرنمه
..........
عيش اللحظه
يا صديقى الاسعد

[imported_محمد الحاج]

قيس وسلمى
لكما التحايا
ليس للوطنيه مسطرة قياس واحده نحدد بها الوطنى وغير الوطنى ..فمثلا عندما يعزف النشيد الوطنى او يرفع العلم فى باحة المدرسه او اى مؤسسسه ..تزداد ضربات قلوبنا مع الطبول وتخفق على الساريه..هل هذا هو الوطن لكنها رمزية الوطن نرسخها بفعلنا وانفعالاتنا ونعززها بصدق الانتماء .
موضوع البوست من احداث اليومى والعابر اخذناه لكى (نكفش)به بعض المسكوت عنه ولكى تدلو بدلوكم
لكما المحبه

[آدم إدريس]

هل المنتخب سقفه ادنى من سقف الفرق؟لذا لا بواكيه له
وهل الوطن اقل قيمة من الفبيله والانتماء له انتماء صورى؟
و هل الانتماء للقبيله يعادل او يفوق الانتماء للوطن؟
وهل القبيله = المواطنه؟
ومن اين دخلت الى اضابير الدوله؟........؟

يا ود الحاج أنا أمبارح خشيت الكورة دي، و دي تاني مرة أدخل كورة ...اللذيذة الناس خلت المستطيل الاخضر الأخضر و قعدت تتفرج في الحبشيات الجو يشجعو فريقهم...واحد من المهاويس ديل صاحبي دخل معاي الكورة، و الله الزول دا في تلاتة أقوان ما شافهم، سمع الكواريك بس...تقول لي وطنية

[قيس شحاته]

المشاركة الأصلية كتبت بواسطة خال فاطنة

الناس خلت المستطيل الاخضر الأخضر و قعدت تتفرج في الحبشيات الجو يشجعو فريقهم

الافتتان بالحبشيات - الجوا يشجّعوا فريقهم - فيهو نوع من التعبير المكنون عن الوطنيّة، ولكنكم - يا خالا - لا تشعرونgap

يعني الواحد لمّن يتأمل الحبشيّة وهي تتمايل بذخاًgap بستحضر في اللحظة دي - من وحْي إيقاع بنات اللذينَ ديل - بطولات عبد اللطيف ألماظ وتضحيات الرعيل الأول، وهنا بتتحقق الوطنيّة في تمام المشهد.
حقو - بعد الشرْح الوافي دا، تعتذر عما قلته في حق الجماعة ديل

[ناصر يوسف]

الناس خلت المستطيل الاخضر الأخضر و قعدت تتفرج في الحبشيات الجو يشجعو فريقهم

والله برضو سلاح فتااااااااك ،، النعمنو كدي وكتين أنا أمشي الأستاذ وأنطط عيوني في بنات الحبوش السمحاااااااااات ديل بيقل تشجيعي لفريقي ،،، الشكية لي الله بـــــــــس يا خال فاطنة

المسألة يا محمد الحاج بالفعل تحتاج لوقفة ومن زمن مُش من هسي ،،
التشرزم في حتة ضيييقة زي ( هلالابي ،، مريخابي ،،، أو مريخابي ،، هلالابي ) دي ،،
لما يكون الفريقين لاعبين مع بعضهم في كتار بيسألوني أها هلالابي ولا مريخابي ؟؟
بقول ليهم لا هذا ولا ذاك ،،، أنا بشجع اللعبة الحلوة ،، وبستمتع بفريق برشلونه وسانتوس البرازيلي وأهلي شندي لكن ما عندي فريق معين بعتبره فريقي المفضل
لكن لما يكون المريخ ولا الهلال ولا أهلي شندي ولا الأمل عطبرة ولا الموردة مثلاً ،، لاعبين بإسم السودان ،،، أنا بكون مع الفريق السوداني قلباً وقالباً لأنو بيمثل السودان ،،،
مره فريق المريخ لاعب بإسم السودان ،،، مشجعي الهلال واقفين ضدو وبيشجعو في الفريق الأجنبي ،،، ونفس الفعل تمَّ من مشجعي المريخ ضد الهلال وهو لاعب بإسم السودان ،،
ياخي ده إنتماء شكلو قبيح شوية من جانبي أنا ده والله ،،،

أمَّا مسألة مقارنة قول البوست في مفهوم الوطنية بالحاجات الإتفضلوا القبالي بذكرها ،،، برضو فهم آخر ،،، لكن أظن صاحب البوست بيناقش مفهوم الوطنية في الكورة ،،، ولا شنو ؟؟

عموماً مهما تكالبت علينا الظروف القبيح منها ،،، بنبقي يانا السودانيين ويبقي السودان أولاً وأخيراً

هو ذاتو شنو يعني 3/5 لصالح السودان ؟؟ نتيجة لا تُبشِر بشئ يعلم الله ،،،
عُمر بخيت ده مالو ما خلاه يدخل في الشوط التاني ،، ؟؟ !!! أقلاها كان شتت للإخوة الإثيوبين خطتهم وكورتهم وما أداهم فرقة إنهم يحرزوا هدفين إتنين كمان

ولا شنو بالله ؟؟

[imported_محمد الحاج]

خال فاطنه
لك اجمل التحايا
عشان كدا الفريق فى الشوط الثانى انهار
حتى اللعيبه قطعوا ..والاقوان كانت ساهله