الإسلام هو الحل

[بابكر عباس]

المشاركة الأصلية كتبت بواسطة محسن خالد

بل هو من صميم "مرقون" حسن موسى و"مقصده" من إيراد القصّة في ذلك السياق المحدّد والمتعيِّن. فكأنما حسن موسى ومعه ثقافتنا السودانية كلها انتظروا هكتارات من الزمن إلى أن تأتي باتريسيا وتنحرج لنا كي نعرف أن نساءنا يبكين "تمثيلاً"، مش؟
ياخي دي اسمها في ثقافتنا "مَوَاجَبَة" وفيها مداينة، فنحن البكاء دا ذاتو بنتشالبوا ونقسموا قدر عيونا ودموعنا. هذا نمط ثقافي جوهره حسن وخير كما أراه، ولا يمكن النظر إليه إلا بوسط بنائه الثقافي المتكامل، ولا يمكن عزله عن أنساقه بتاتاً وتفسيره بالتمثيل بهذا اليسر الخفيف.

هي بالظبط إنحرجتك؛ عشان ما عرفت كيف تواجب. لو قال: أنا إنحرجت من طريقة بُكا أهلي، لانو معانا خواجية، في الحالة دي، رد فعلك بستقيم. هو قال الخواجية إنحرجت وليس إستاءت. القصة في ذلك السياق داير يشرح بيها إرتباط رد الفعل تجاه الموت بالثقافة.

[بابكر عباس]

المشاركة الأصلية كتبت بواسطة أسعد

الناس فعلا داقسة ما بتدقق
لكن الله في ^_^
وثبت الحق حتى ولو بعد حين

اذكر ان بداية بوستك يا بابكر كان بعد فشل تجربة محسن حينما ادعاء هبة الباريء
وانت جيت عدلت والناس دقست وما دققت معاك كالعادة
ولكن الحياة ما بتدقس يا بابكر يا اخوي
اهو جابت ليك محسن (القوس قديما) وقلب ليك الطاولة القاعد تأكل فيها كبدة بالبيض وفول بالطوة يا قول محسن ^_^

كدي يا أسعد الناس، أثبت كلامك بإقتباسات توضح تواريخ المداخلات وتاريخ التعديل في المداخلات وتاريخ بوست هبة الباري

[بابكر عباس]

المشاركة الأصلية كتبت بواسطة خالد الصائغ

بعدين عايز أسالك يا بابكر, شنو هي معاييرك لي تحديد الدولة الدينية, و علي أي أساس إعتبرتا المهدية كانت دولة دينية, و جيت لبَّستا الإنقاذ نفس الجلابية, ياخ أنا أكتر حاجة بتذبحني يا بابكر هي التصنيفات اليقينية دي, لأنها بتلوي عنق الموضوعية لو ما كسرت رقبتا, و تصنيفك لي و الكوزنيالية اللبَّستني طاقيتا يشهد الله ما زعلني, لأنو يمكن تجاوزو في إطار الذاتي غير المؤثر علي جوهر النقاش, بس ياخ التصنيف غير المُعاير و آوت أوف كاليبريشن للسياقات الموضوعية زي ما عملتا مع المهدية و الإنقاذ و ختيتم الإتنين في مربع واحد, حقيقي بخلي الزول يطق ليهو عرق, فرفقا بنا و بالسياق يا دكتور.

معياري بسيط جدا في تصنيف الدولة وهو: هي الدولة التي يرفع مؤسسيها شعار "الإسلام هو الحل" وبجيبوا عدتم ويكوشوا على الحكم.
أبدا يا أخي ما كوزنتك ولا مهدوتك، انتا كابوس المستقبل الما داير تدينا فرقة ننسى وناوي لينا بدولة "رشيدة" تالتة.
قلت لي "آوت أوف كاليبريشن"؟ هو كان انتو ولّ الفاتو عندكم غير جملة "الإسلام هو الحل"؟ وبقية البرنامج غير جاهز حاليا.
هسع انت ومحسن خالد دا، خليناكم من الرؤية الاسلامية الشاملة لإدارة الدولة، أكتبو لي ستة سطور ونص عن تدوير الإقتصاد برؤية إسلامية.
سؤال ساهل

[بابكر عباس]

المشاركة الأصلية كتبت بواسطة محسن خالد

ليس كل الدول، فهولندا على سبيل المثال تجيز تناول المخدرات باعتبارها حقاً شخصياً، وتجيز الدعارة (أليست ضرراً!).
عن نفسي كنتُ أرى في الحشيش -مثلاً- حقاً تشتمل عليه الحرية وهو من صميم الاختيار بالنسبة لمتعاطيه، ليس هذا فحسب، بل حق الانتحار أيضاً، "كنت" أرى أنَّ من حق الإنسان أن يقرر لنفسه الحياة أو الموت.
ما رأيك يا بكّة في حق تقرير الحياة والموت ما دام الشخص سوي ونصيح لا يعاني من أي شيء ذهاني أو عقلي؟

- الضرر الذي يسببه الإنسان لنفسه يصعب معالجته بالقانون ومتناول المخدرات بالنسبة لهم مريض أكثر من مجرم. أكيد هولندا بتحارب ضرر المخدرات بوضع قوانين صارمة للإتجار فيها وفتح العيادات الطبية للمدمنين.
- هل تقصد انو هولندا تجيز تعاطي المخدرات والدعارة من أجل تفشيهما في المجتمع؟
- أُجيز حق الإنتحار للشخص النصيح، لكن لو ربنا فتح عليك بقانون ممكن يمنع الإنتحار دا، ألحقنا بيهو ينوبك ثواب.

[بابكر عباس]

المشاركة الأصلية كتبت بواسطة أسعد

آي لوف يو موهسن

المشاركة الأصلية كتبت بواسطة خالد غالي

والله ياخوانّا محسن خالد ده رجل خطير

الزول ده منطق ليك الناس بالعلمانية لمن اقتنعوا

واول ما اقتنعوا قام قال ليهم لالا يازول العلمانية دي ذاتها غلط

واسي ياهو ده قاعد يمنطق فيهم بانها غلط .. والغريبة حايقنعهم

المشاركة الأصلية كتبت بواسطة مبر محمود

والله كان يقنعهم ما عارف!

يا مٌبر،
خالد غالي، بالرغم من إستعمالو لضمير الجماعة، إلا انو قاصد (أسعد) الناس!

[imported_محسن خالد]

هي بالظبط إنحرجتك؛ عشان ما عرفت كيف تواجب. لو قال: أنا إنحرجت من طريقة بُكا أهلي، لانو معانا خواجية، في الحالة دي، رد فعلك بستقيم. هو قال الخواجية إنحرجت وليس إستاءت. القصة في ذلك السياق داير يشرح بيها إرتباط رد الفعل تجاه الموت بالثقافة.
بابكر عباس

أتعجّب في كونك تريد أن تشرح لي قصة باللغة العربية، ما علينا، فالقصة ياها دي تحت ولن يبدلها تبرعك بخدمة اتجاه لها غير موجود في الحقيقة.
تفكيك الدكتور للقصة يسلخها حرفاً حرفاً، لو أنت منتبه لعمله النقدي وبناء جمله التهكمية، أمَّا لدى آخر سطر من المقتبس فهو يتبنى غربةً تشبه ما أسماه بغربة باتريسيا

أذكر أننا ،في كل مرة رجعنا فيها(مع باتريسيا و العيال) للسودان، كنا ننظم حركتنا، في أيام إقامتنا المعدودات، على أولويات واجب العزاء ضمن خريطة الأقارب و الأصدقاء.و في لحظات اللقاء التي ترتفع فيها الأيادي بـ "الفاتحة" يسود صمت شعائري عجيب ، ظل هو أكثر ماحيّر أطفالنا " الفرنسيس" و سحر ألبابهم الأوروبية، فكأنهما سقطا، لثوان معدودات، في زاوية عمياء غير متوقعة بين العوالم التي كانا يظنان أنهما يفهمان تناقضاتها( الظاهرة على الأقل).أما في اللحظات التي كان البكاء " ينفتح" فيها بدون سابق إنذار فكان يصيبهما حرج عظيم لا يدريان معه أين يذهبان. و لو أن الأرض انشقت و ابتلعتهما في تلك اللحظة لكان ذلك أهون لهما من شهود موقف البكاء الجمعي المفاجئ .و قد حكت باتريسيا أول مرة حرجها الكبير حين عودتنا من فرنسا ( في1981 عقب وفاة شقيقييّ ) و كيف أنها وسط البكاء الذي اندلع فجأة بين جماعة من نساء الأسرة حولي( و أمي و شقيقتيّ) لم تدر كيف تتصرّف؟أوماذا تقول؟.و لم تعرف كيف تشارك في تصاويت هذا الـ" هابيننينغ" الفريد الذي انطلق و تمدد في الزمان و المكان بدون أي تحضير مسبّق..أذكر أني في عز التراجيديا المرتجلة حانت مني نظرة نحوها فبدت لي، في حيرتها ،كأنها معلقة بين السماء و الأرض على طريقة شخوص " شاغال" المرفوعة بقدرة خفيةـ ضد قانون الجاذبية ـ في سماء اللوحة.و قد حيّرها أكثر أن هذا الحدث/ العرض المسرحي انقطع فجأة كما بدأ، و التفتت الثاكلات نحوها يحيينها و يسألن عن صحتها و صحة أهلها و عمّا إن كان سفرنا قد تم بلا مشقة..إلخ.بل و فيهن من مازحنها و تضاحكن معها متمنيات لنا عشرات العيال و كثيرا من المال.
أقول أن ما حفزني على الخوض في هذا الأمر، أمر استجابتنا تجاة الموت، هو نوع ردود الفعل الأدبية التي صارت تطفح على مشهد الأسافير كلما مات لنا شخص نعزه.ذلك أنني ، أمام هذا الأدب الغميس ، وجدتني أحس بغربة تشبه غربة باتريسيا في تلك اللحظات التي باغتها فيها طقس المعزيات الثاكلات.
د. حسن موسى

------
الجملة التي يصف بها باتريسيا بشخوص شاغال المعلّقة طريفة ومعبّرة على نحو جميل السخرية

أذكر أني في عز التراجيديا المرتجلة حانت مني نظرة نحوها فبدت لي، في حيرتها، كأنها معلقة بين السماء و الأرض على طريقة شخوص "شاغال" المرفوعة بقدرة خفية ـ ضد قانون الجاذبية ـ في سماء اللوحة.
د. موسى

[imported_أسعد]

المشاركة الأصلية كتبت بواسطة بابكر عباس

كدي يا أسعد الناس، أثبت كلامك بإقتباسات توضح تواريخ المداخلات وتاريخ التعديل في المداخلات وتاريخ بوست هبة الباري

يا بابكر العذر والسموحة ياخ
يبدو انو اختلطت علي البوستات
بتذكر انك كنت كتبت بوست بنفس الفكرة الأنا اتكلمت عنها
فافتكرت انو دا ياهو البوست زاتو

المشاركة الأصلية كتبت بواسطة بابكر عباس

يا مٌبر،
خالد غالي، بالرغم من إستعمالو لضمير الجماعة، إلا انو قاصد (أسعد) الناس!

يا بابكر ياخ الاعجاب حاجة والقناعة حاجة تانية خالص
زي مثلا تعجب ليك بي بت وتتزوج واحدة مختلفة عنها تماما
اها بس نفس القصة معاي انا معجب بي كلام محسن لكن مقتنع بي حاجة تانية خالص الغير بتكلم عنها محسن حاليا او سابقا
اخوك وبدون فخر غير مقتنع بالقصص الميتة المورمين بيها اضانا دي من (شريعة) مرورا ب(الديموقراطية) و(الحرية) لحدي ما تدقر معاك في قيفة (الحب)
القصص دي قصص ميتة ابتكرها الانسان وامن بها ايمان منقطع النظير الى ان اصبحت واقعا معاشا (مع انو هي مجرد توهمات ساااااي)

وخليني النمسك ليك حتة الديمقراطية والعدالة
وكدي يا بابكر اعمل باك اب من سنة حفروا البحر وتعال لينا هنا مستصحب معاك من قصة نزول ادم لحدي طلوع مانديلا لغرفة نومه بالطابق الاول. وجيب لي قصة واحدة تثبت انو في نظام معين حقق ديمقراطية او عدالة -المزعومات- على الارض؟!
يا بابكر ياخ ارادة الحياة هي البتصنع المحبة والسلام والمساوة بين جميع البشر موش الانظمة البشرية ولا حتى (شرع الله) الناس البتدعو ليهو دا
ربك لمن يريد ان ينعم علي بشرية (بالقصص الميتة البتدعو ليها دي) اول حاجة بنشرها بين الشعب وبين نظامه الحاكم.
اسي عليك الله الشغلة لو ما قسمة ونصيب البخلي جنوب افريقيا تنعم بالقصص الميتة دي بس عشان مانديلا قضى زهرة شبابه في السجن وأهو دا محمود محمد طه قدم حياته كولها في شنقة حبل والسودان بعد دا في سجمو ورمادو سنين عددا!!
وهناك واحد متغشف يضرب عن الطعام فتنعم الهند كولها بسنين خير وفيرة الى زمننا هذا!!
وابراهام لنكولن لقى امريكا موزة مقشرة بعد ما ازكمتها رائحة الدماء المدفقة فوقها وناس شبعت موووت ما صدقت جاهم زول قال ليهم حيّ للحياة!!
بينما المانيا تعتر في زول يطير بيها فووووووووووق وتراااااااخ يدق بيها الدلجة
ومن دخان مهلكة اعظم قنبلة ذرية تنشأ اعظم دولة تكنولوجيا في التاريخ.
ومن خلال حكم ملكي بريطاني ينبثق نظام حكم ديموقراطي ومن ثنيا حكم جماهيري ليبي يطلع استبداد واستعباد ملكي.
وعبر حكام امويين ينهبون البلاد يطلع امير مؤمنين عادل فينشر السلام والمحبة بين جميع الخلائق.
ومن وسط اكثر شعوب الارض جهلا يطلع خاتم النبيين ليوصل اخر رسالة على الارض.
والخ الخ من قصص
ياخي عيسى عليه السلام حاول الناس ان يصلبوه، وانت جاي تدعو الناس لنظام يحقق العدل والمساواة؟!

ياخي لو تدبرت قصة سيدنا موسى وكيف ربنا صنع منو نبيّ، ح تعرف انو المحبة والسلام دي ايدامات يتم طبخها في نار السماء وما على سكان الارض الا يمسكوا رغيف رغباتهم ويقطعوا منها عشان يغمسوها في الايدامات دي.

ياخي سيبك من قصة سيدنا موسى والايمانيات دي، وكدي اتدبر معاي سيرة السودان من سنة غاغ الى يومنا هذا ، السيرة دي بس بتكفيك عشان تتلهي من علمانيتك البتدعو ليها دي.
بعدين علمانيتك البتدعو ليها دي حاليا عايشة في جاه الاسلام -المستكثروا علي الناس- بصناعة القاعدة في افغانستان والعراق والشباب الاسلامي في الصومال والكيزان في السودان والاخوان في مصر والوهابية في السعودية!!
غايتو كتر خير الاسلام ان جعل هذا ممكنا

[بابكر عباس]

المشاركة الأصلية كتبت بواسطة محسن خالد

أتعجّب في كونك تريد أن تشرح لي قصة باللغة العربية، ما علينا، فالقصة ياها دي تحت ولن يبدلها تبرعك بخدمة اتجاه لها غير موجود في الحقيقة.
تفكيك الدكتور للقصة يسلخها حرفاً حرفاً، لو أنت منتبه لعمله النقدي وبناء جمله التهكمية، أمَّا لدى آخر سطر من المقتبس فهو يتبنى غربةً تشبه ما أسماه بغربة باتريسيا

سلام يا محسن، حبيت أشرح ليك فهمي لكتابة حسن موسى دي، ولم اتبرع لخدمته شخصيا، هو مجرد تسلسل حوار، وعادي جدا ممكن تفوت علينا حاجات صغيرة تغير المقصود من الكلام.
إيراد حسن موسى لإنحراجة الخواجية لم يكن من باب التعالي، وإنما لدعم نقده لموقفنا من الموت من نظرة زول خارج الثقافة (الخواجية) لهذا التباكي.
يعني كلامك بتاع: ما تنحرج الخواجية كان إنحرجت" لا يتماشى بالنسبة لي مع مراد حسن موسى من القصة.

[imported_خالد الصائغ]

المشاركة الأصلية كتبت بواسطة بابكر عباس

معياري بسيط جدا في تصنيف الدولة وهو: هي الدولة التي يرفع مؤسسيها شعار "الإسلام هو الحل" وبجيبوا عدتم ويكوشوا على الحكم.
أبدا يا أخي ما كوزنتك ولا مهدوتك، انتا كابوس المستقبل الما داير تدينا فرقة ننسى وناوي لينا بدولة "رشيدة" تالتة.
قلت لي "آوت أوف كاليبريشن"؟ هو كان انتو ولّ الفاتو عندكم غير جملة "الإسلام هو الحل"؟ وبقية البرنامج غير جاهز حاليا.
هسع انت ومحسن خالد دا، خليناكم من الرؤية الاسلامية الشاملة لإدارة الدولة، أكتبو لي ستة سطور ونص عن تدوير الإقتصاد برؤية إسلامية.
سؤال ساهل

تحياتي يا بابكر

يعني قياساً علي ذات معيارك العجيب أعلاه, نقوم نقول الدولة العلمانية هي: الدولة التي يرفع مؤسسيها شعار (العلمانية هي الحل) و يجيبو عدتم و يكوشو علي الحكم !!!!
معقول يا دكتور ياخ المسألة تكون بالتبسيط المُخِل ده !!!

ثم إنو الكابوس الحقيقي يا دكتور في إصرارك علي إنك تذبحنا بالذاتي الما بضيف لي موضوعية النقاش حاجة, و إصرارك علي الإرتكاز علي توهم إنو الإسلام لا يملك برنامج, يا عزيزي يا بابكر, خلينا نصل بي نقاشنا حيال العلمانية لي ميسو بالأول, و بعدها لو ما جيتك و جاوبتا ليك علي أسئلتك و مطلوباتك تجاه النموزج الإسلامي, أصلك ما تعفي لي, ياخ رجاءاً يا بابكر خلينا نطلع من دائرية النقاش الما بتوصل لي ميس دي.

[بابكر عباس]

المشاركة الأصلية كتبت بواسطة خالد الصائغ

تحياتي يا بابكر

يعني قياساً علي ذات معيارك العجيب أعلاه, نقوم نقول الدولة العلمانية هي: الدولة التي يرفع مؤسسيها شعار (العلمانية هي الحل) و يجيبو عدتم و يكوشو علي الحكم !!!!
معقول يا دكتور ياخ المسألة تكون بالتبسيط المُخِل ده !!!

ثم إنو الكابوس الحقيقي يا دكتور في إصرارك علي إنك تذبحنا بالذاتي الما بضيف لي موضوعية النقاش حاجة, و إصرارك علي الإرتكاز علي توهم إنو الإسلام لا يملك برنامج, يا عزيزي يا بابكر, خلينا نصل بي نقاشنا حيال العلمانية لي ميسو بالأول, و بعدها لو ما جيتك و جاوبتا ليك علي أسئلتك و مطلوباتك تجاه النموذج الإسلامي, أصلك ما تعفي لي, ياخ رجاءاً يا بابكر خلينا نطلع من دائرية النقاش الما بتوصل لي ميس دي.

سلام يا صائغ
هو فعلا لا يملك برنامج يمكن يحقق الحد الادنى من الإتفاق حوله؟؟ لسبب بسيط، لانو إعتقاد والإعتقاد تتفاوت فيهو الرؤى بشكل كبير!
ناس علمانيتي لو فشل طرحهم طوالي بنشوف القوانين الفاشلة ونرميها في سلة المهملات ونصنع أخرى من واقع التطبيق والدراسة. المشكلة في الاسلام لو فشلت التجربة، طوالي بتجوا تقدونا ب:
العيب في التطبيق!!
ذبحتونا يا اخي، بإيمانياتكم الفي السهلة دي!

[imported_أسعد]

المشاركة الأصلية كتبت بواسطة بابكر عباس

سلام يا صائغ
هو فعلا لا يملك برنامج يمكن يحقق الحد الادنى من الإتفاق حوله؟؟ لسبب بسيط، لانو إعتقاد والإعتقاد تتفاوت فيهو الرؤى بشكل كبير!
ناس علمانيتي لو فشل طرحهم طوالي بنشوف القوانين الفاشلة ونرميها في سلة المهملات ونصنع أخرى من واقع التطبيق والدراسة. المشكلة في الاسلام لو فشلت التجربة، طوالي بتجوا تقدونا ب:
العيب في التطبيق!!
ذبحتونا يا اخي، بإيمانياتكم الفي السهلة دي!

يا بكور ياخ الاسلام دا أداة ياخ
وفشل تطبيق الاداة دائما بكون من الصانع
موش (اهلك) الانجليز بقولوا : الصانع الفاشل يتشاجر مع ادواته
أسي بدل تقعدوا تتشجاروا مع اداة شريعة الاسلام
حقوا تطورا من مهاراتكم شوية gap

[imported_خالد غالي]

سلام ياشباب

ياخي ده من امتع بوستات الحوار .. صفقة شديدة لكل المتداخلين هنا انكلودنق وجدي
لطافة وثقافة ومنطق واقناع حاجة ماتخلص

تحياتنا ليكم جميعا ياخ وشكرا على هذا الامتاع

خالد الصائغ ياخي I love you عديل كده

[بابكر عباس]

المشاركة الأصلية كتبت بواسطة أسعد

يا بكور ياخ الاسلام دا أداة ياخ
وفشل تطبيق الاداة دائما بكون من الصانع
gap

يعني يا أسعد، داير تقول انو الإنسان ما قاعد يطور أدواتو والقديم منها ما قاعد بعقوا (يرميه في سلة المهملات)؟

[imported_أسعد]

المشاركة الأصلية كتبت بواسطة بابكر عباس

يعني يا أسعد، داير تقول انو الإنسان ما قاعد يطور أدواتو والقديم منها قاعد بعقوا (يرميه في سلة المهملات)؟

لا أنا قصدت انو جميع الادوات الاتوفرت صالحة
لكن بس الانسان لانو صانع فاشل او فاشل صانع
عشان كدة دائما بقعد يقول الأداة دي ما بتنفع معاي ولازم ابتكر اداة جديدة

الزبدة:
تجربة الاسلام في السودان الفاشلة ليست دليلا على فشل الاسلام
بقدر ما هي دليل على فشل السودانيين في تقبلهم لحياة الديموقراطية -المزعومة-

[imported_أمين محمد سليمان]

المشاركة الأصلية كتبت بواسطة خالد غالي

خالد الصائغ ياخي I love you عديل كده

بالله يا غالي ضيف لينا وجدنا المتنكر في شكل أسعد لقائمة الحب دي بالله !!
و يا اخوانا رجاء ... بكة دا ما تعصرو عليه بالله