برنامج أغاني و أغاني/ النسخة ال11

[عكــود]

لمن يهمه الأمر

حسب وارد الوتساب، حلقة بكره سيشارك فيها الفنان محمد النصري.

[زهور]

مساء الخير عليكم
الزول ،انا برضو اتساءلت زيك منو القال لى هدى عربى انتى مغنية صوتا تعبان جداً وهى زى المهبوشة بسم الله

[آدم إدريس]

المشاركة الأصلية كتبت بواسطة عكــود

لمن يهمه الأمر

حسب وارد الوتساب، حلقة بكره سيشارك فيها الفنان محمد النصري.

أنا ممن يهمه الأمر، و كذلك هيثم الشفيع على ما أظن...بالرغم من خشونة وجدان الميكانيكي إلا إن مرات بكون حلو و ذوّاق

يا سلاااام يا عكود ياخ...الراجل دا مريح...إن شاء الله يبرنا بأم الحسن التي هي من أجمل أغاني الطمبور...فيها نوسالجيا و شغل كتير حلو...مليانة بالصور البديعة و نبض البادية الآسر

[imported_أمير الأمين]

هانئ عابدين
(6 من 10)
https://www.youtube.com/watch?v=-9o2abMmBRA

معقولة !!!
دى اجمل غنية تغنت الى الان فى برنامج هذه السنة
شوف البودى لانقوتش بتاعة الولد دا مع الايقاع


مكارم (10/10)
يا عمدة زولتك دى دائما بتخليها مقبقبا ليها شاب اكبر سنا منها وقاعدة تشلت فيهو برجولها

[عكــود]

المشاركة الأصلية كتبت بواسطة أمير الأمين

هانئ عابدين
(6 من 10)
https://www.youtube.com/watch?v=-9o2abMmBRA

معقولة !!!
دى اجمل غنية تغنت الى الان فى برنامج هذه السنة
شوف البودى لانقوتش بتاعة الولد دا مع الايقاع


مكارم (10/10)
يا عمدة زولتك دى دائما بتخليها مقبقبا ليها شاب اكبر سنا منها وقاعدة تشلت فيهو برجولها

معاك 100/100.
إن شاء الله ناس الفهم لا يفوتوا لا يموتوا..
هاني انا راهنت عليهو انو حيكون الأفضل في برنامج السنة دي، بس العوض الله يهديه.

فعلا شكلها النوع البيكفكف قميصو البيخوف الولاد، بس ياخي، مكارم بتشلت بعيونها ما برجولها .
عارف انها غلطة مطبعية منك وقعت فيها...
بتحصل!

تحياتي

[عكــود]

المشاركة الأصلية كتبت بواسطة خال فاطنة

أنا ممن يهمه الأمر، و كذلك هيثم الشفيع على ما أظن...بالرغم من خشونة وجدان الميكانيكي إلا إن مرات بكون حلو و ذوّاق

يا سلاااام يا عكود ياخ...الراجل دا مريح...إن شاء الله يبرنا بأم الحسن التي هي من أجمل أغاني الطمبور...فيها نوسالجيا و شغل كتير حلو...مليانة بالصور البديعة و نبض البادية الآسر

سلام يا خالا،

لو اللرض يا سيدي تنشال باللدين
كت برسلا ليك في لوري الخزين

خالد شقوري رجل مبدع في وصف حياة القرية؛
الأغنية التانية البتشبهها "لا تنجع " برضها إبداع مشترك بين الاتنين. كنت كتبت عنها بوست اسمو "الكتقةوقعت"
تلقاهو هنا... لو يهمك الأمر.

ثم، هيثم ده سيد الذوق والجمال، رغم ميكانيكيته

[imported_هيثم علي الشفيع]

المشاركة الأصلية كتبت بواسطة عكــود

لمن يهمه الأمر

حسب وارد الوتساب، حلقة بكره سيشارك فيها الفنان محمد النصري.

المشاركة الأصلية كتبت بواسطة خال فاطنة

أنا ممن يهمه الأمر، و كذلك هيثم الشفيع على ما أظن...بالرغم من خشونة وجدان الميكانيكي إلا إن مرات بكون حلو و ذوّاق

المشاركة الأصلية كتبت بواسطة عكــود

خالد شقوري رجل مبدع في وصف حياة القرية؛
الأغنية التانية البتشبهها "لا تنجع " برضها إبداع مشترك بين الاتنين. كنت كتبت عنها بوست اسمو "الكتقةوقعت"
تلقاهو هنا... لو يهمك الأمر.

عااااااااااااافي ليكم القطيعة فيني يا حلوين
وكت الجاب سيرتا
جية النصري
.
.
.

نعم
بيهمني شديد
{ ولا زالت ترن في إذني كلمات الراحل العظيم "حميد" و هو يتكلم مع مرافقي عن محمد النصري....
-ذات حفل بكازينو النيل الأزرق شارك فيه حميد ، والنصري ، وآخرون-...
قال له وقد بدأ النصري "ينقرش" طنبوره إستعداداً للغناء:
(أكنَّك أسمع الجنا دة .... غنّاي باللحيل)}

وتسلم يا عمدة على حسن الظن في شخصي المتواضع



بوست (الكتقة) راجعلو إن شاء الله بمزاااااااااااااااج -غير متوفر حالياً-

[عكــود]

هلا هيثم،

خليك قريب الليلي عاد، وحبابك في بوست الكتقة.
في حلقة النصري اتوقع مشاركة طيبة من:
حسين الصادق - لأنو بيغني إيقاع الدليب
مكارم - سمعت لها أداء لأغنية ام الحسن وأجادتها
آمنة حيدر - بحكم المنطقة

تحياتي

[imported_الزوول]

المشاركة الأصلية كتبت بواسطة عكــود

هلا هيثم،

خليك قريب الليلي عاد، وحبابك في بوست الكتقة.
في حلقة النصري اتوقع مشاركة طيبة من:
حسين الصادق - لأنو بيغني إيقاع الدليب
مكارم - سمعت لها أداء لأغنية ام الحسن وأجادتها
آمنة حيدر - بحكم المنطقة

تحياتي

...
طيّب

.....

....

[عكــود]

وهو المطلوب

[عكــود]

سلام،

الحلقة كان ممكن تكون أفضل كتير لو راعوا إختيار الأغنيات وتنوعها. كلها كانت تقيلة وأغنيتين كانوا حزينات جداً.

حسين الصادق كان قمة 10/10
أحمد بركات غنّى أغنية صعبة جداً واتوفق إلى حد ما 10/7
هاني غنى أغنية ما تتناسب مع صوته، لكنه اجتهد 10/6
مكارم أداءها كان وسط 10/5.

تفاعل عوض أحمودي أضاف حيوية للأداء.

باقي التعليق أتركه ليكم.

معليش بختلف معاكم
مافي ولا واحد ادى اداء مقنع ... الاغنية الشايقية صعبة جدا على المتغنين بغيرها ... لن يستطيعوا مهما اجتهدوا ان يوفوها حقها ... وكما قال السر قدور ايقاع الدليب درجات تقارب السبع فالمتغنين بغير الاغنية الشايقية وارادو التعامل مع الدليب اختارو الدرجات الاولى وغنو عليها فظبطت معاهم زي القمر بوبا والله ليلي عند وردي ويا حليلك يا بلدنا عند احمد فرح وخاتمي العاجب البنوت لابن البادية يا مولاي اه من غلبي الجيلي الشيخ ... الخ ... فالحلقة في رأي اضاعت معالم الاغنية الشايقية ولو تركوا الاداء للنصري فقط لكنا استمتعنا جدا ... نأخذ على النصري ايضا ادخال الكهرباء على الطمبور مما افقد الالة صوتها الفخيم فاصبحت مسخا لا هي جيتار ولا هي طمبور. فقط ذكرنا بطمبور ابو عبيدة حسن واغنية الجنني.

[آدم إدريس]

الليلة متحسر على الحلقة الفاتتني دي...حصلت الغنية الأخيرة و في نهاياتها...حسين مع النصري...ما قدرت أقيم لأن الجزء الحضرته كان بغنوا سويا....

[imported_الزوول]

صراحة كنت أود أن يأتي التعليق على الحلقة من غير أهل المنطقة
فما يلتقطه هؤلاء من هنات وأخطاء قد لا يسمعه غيرهم
وبذلك تكون درجة تقييم هؤلاء مختلفة كثيراً
لكى أوضح أكثر أضرب مثلاً
جواهر وستونة تغنيان في القاهرة ووجدتا قبولا كبيراً من المصريين وأولاد الجالية السودانية المولودة والمقيمة بمصر.
ولكن لو سألت اي سوداني عاش في السودان عن غناء جواهر و(كده كده يا الترلة) فسيرد لك بدون تردد أنه لا يعتبرها فنانة وانما شئ آخر ويردفها بأنه يستغرب عما يعجب المصريين فيهما
ومن قبل الفنان سيد خليفة والمامبو السوداني ... فالكثيرون في السودان كانو يعتبرون غناءه ذاك مجرد (عوارة) ويستغربون لماذا اشتهر ولم يجد فنانين عظماء في تاريخ السودان أمثال محمد وردي ومحمد الأمين وعثمان حسين حظهم من الشهرة والاعجاب كما وجدها سيد خليفة والمامبو السوداني.
لذلك سآتي بأغاني الحلقة هنا
ثم نترك أخونا خال فاطمة والأخوة لنسمع تعليقهم
الشايقية يمتنعون

[imported_الزوول]

تصحيح بسيط للعك القالو عمنا السر قدور في بداية الحلقة
هناك اختلاف في تسمية أغنية الشايقية أو منطقة منحنى النيل
فالبعض يرى انها يجب أن تسمى اغنية الطنبور كما جرى العرف ولكن البعض يعترض ولديه أسباب وجيهة ، فالطنبور ليس حكراً على المنطقة فهو مستعمل في البطانة وشرق السودان وكردفان والنيل الازرق وتقريباً في كل السودان وكثير من البلاد خارج السودان.
كما أن هناك أغاني كثيرة شايقية لا تستعمل الطنبور أمثال ما يغنيه حالياً هشام الصحوة وقبله خالد الصحافة
ولذلك نشأت جماعة الدليب وهي تستند على أن المنطقة يضمها ايقاع واحد مميز هو ايقاع الدليب (او الايقاع الشايقي) ويمكن تعريف اغنية المنطقة به سواء استعمل الطنبور أم لا
وهكذا تحاول الجماعة فرض تسمية أغنية الدليب بدلا عن أغنية الطنبور