اقتباس:
المشاركة الأصلية كتبت بواسطة عبدالمنعم الطيب حسن
ابوحمد كانت محطة حنينة بالنسبة لينا..
وعارفين بعدا بتجي النمر تاني الا حلفا
محطة السكة حديد قريبة من البحر
الصباح نمشي نتسوك جمب البحر ونشرب
ونستحم عديل من الكتاحة..
محطة ابوحمد محطة ممتعة
مرة سواق القطر حل الراس وركب معاه كم واحد مشوا يعزو صديقم سواق قطر برضو في وفاة ابوهو في كريمة ..
والقطر والاف الركاب منتظرين،
رجعوا بعد يومين😂😂😂😂
|
ههه والله يا منعم اثرت فينا الكثير من شجون الذكريات ابوحمد ترتبط بذكرياتنا وقطار كريمة في اقتلاعنا من الجذور او الرجوع اليها فهي المحطة التي يطول فيها توقف قطار كريمة والمحطة التي تنفد من المسافرين الزوادة فيها من بيض ولحمة وقراصة متمرة ودجاج وهي المحطة التي غالبا ما يتعطل فيها قطار كريمة لمدة يوم أو يومين ومرات تلاتة أيام .. وللمسافرين فيها سجالات مع أهلها المشهورين بسرعة البديهة والرد الساخر المسيخ وعادة ما يصلها القطار في الفجر تصدق ما قابلني برد زي برد ابو حمد لي درجة لو كنت من المسطحين في القطار يغلبك تنزل الا بعد الشمس تطلع والدنيا تدفا حبة
أه نجي للمطاعم بعد اليوم التاني (موية البحرة العكرانة مع ويكة بي قراصة) وقس على ذلك
في آخر سفرة لي بي قطار كريمة وانا راجع من الجامعة سألت شافع فارش ليهو برتكان والله قريب مابذكر عن سعر الكوم والشافع كان مكوع بس حرك رجلو (حتى ما يدو) عشان يسالني داير من الكوم دا والله الكوم دا تخيلت المنظر دا زول مكوع ويأشر ليك بي رجلو علي كيمان البرتكان قدامو المهم بي رجلي برضو اشرت ليهو على الكوم الدايرو فضحك شديد وقال يمين حتما تكون انت رباطابي وحلف يدينا الكوم بي بي خصم خمسين في المية من السعر
قطار كريمة قصة طويلة وعجيبة وغريبة ...ان شاء الله الزملاء وخصوصا عكود يتحفونا بذكرياتهم في سفريات الإياب والذهاب بقطار كريمي
تحيات وتقدير
