اقتباس:
المشاركة الأصلية كتبت بواسطة مجدي مسعد حنفي
الحمدلله من دقايق كلمت الاستاذ جعفر بدري
وعرفت منو سبب الغياب كان بسبب بعض المشغوليات
وان شاء الله يرجع يواصل الطلّه العزيزه فوراً فتحياتنا ليهو
وبالمناسبه دي اهديهو واهديكم العمل الجديد دا واتمنى اني اكون وفقت
في صياغتو ..
في الباســـــــــقات
00000000000
في الباسقات وسط الحقول
جلستنا كانت دون عزول
******
الدعوه جات من زول اصيل
كلمني بي اسلوب جميل
قال لي لا بد نلتقي
قبل السفر قبل الرحيل
انا قلت يازول ماعليك
انا ذاتي مشتاق ليك عديل
شوف انت وقتك والمكان
وكلمني وقت الدنيا ليل
******
يوم السبت كان الزمان
وفي الباسقات كان المقيل
في صحبه من خيرة الرجال
ماليها بين الناس مثيل
كان قلت اكتب وصفهم
ماأظني احتاج لي دليل
اخوان وتب نخوه وكرم
زي نخوة الفارس النبيل
******
في الباسقات قضّينا يوم
بين الزهور ونغم الهديل
فيها النسيم ريان عليل
يزداد عبق وقت الاصيل
يشهد على قولي الزمان
للباسقات ما من بديل
فيها الجمال من كل لون
بي لهفه فيهو العين تجول
******
مسك الختام كان الغدا
قبل الشمس ترحل تميل
الشيّه من النار تجيك
حلاة طعم شي مستحيل
والشطّه حاره لذيذه جد
خلّت دموع العين تسيل
بي سرعه مرّ الوقت فات
والوقت ليه دايماً عجول
في الباسقات وسط الحقول
مجدي مسعد حنفي
|
الحبيب / مجدى
لقد جعلت لتلك الجلسة تاريخا ... مدوّنا ... و مدوزنا ... بهذه الكلمات الباسقات .... و التى
لا تصدر إلا من إنسان ... قلبه عامر بالشعر و الشعور الطيب و الإلفة .... ما زال الرفاق
يسألونى عن أخبارك كلما التقينا .
و اليوم إن شاء الله ... أطبع من هذه القصيدة ... نسخا بعدد من كانوا معنا ... حتى يطّلعوا
على هذا الجمال و الوفاء .... الذى سيؤكد لهم أن من يسألون عنه ... رجل يستحق المكانة
التى وضعوه بها ... و يؤكد انطباعاتهم الجيدة عن وقت جميل إنقضى سريعا و يرددون معك
بى سرعة مرّ الوقت فات
و الوقت ليه دايما عجـول
و على المحبة نلتقى .
