*** مصطلحات عامّية سودانية ***

[شبارقة]

المشاركة الأصلية كتبت بواسطة آخـر المواني

لكن البجي يقرأ كلامك عن كلها معروفات دي وما شرحت الا الكنيزر ح يقول عمك دا زائغ
كان مفروض تشرحها كلها وما تكتفي بي كلهن معروفات دي لأنو ما تعرفه أنت ربما غيرك لا يعرفه !

اما الكنيزر في اغلب المناطق تطلق علي تلتي الطوبة البتكون في الزاوية او الترويسة وليس اي قطعة طوبة لسد الفراغات ! وبرضو ربما تختلف المسميات حسب المناطق !النصيحة لي الله انا كلهن عارفن الا القهبونة .. لكن في ناس بكونو شايفين الكلام دا رطانة ما ! .. أنا ما قلت فلان ..

وعليكم السلام

هلا بأخونا آخر المواني وحبابك عشرة

لو رجعت حركة وراء في هذا البوست لكنت أدركت بأنه أقرب للمسابقات وإنو نحن دائما ً بندي فرصة للآخرين لمحاولة الإجابة (ما بنحرق الفيلم طوالي)... ولكن الحاجات الما عارفنها بنقول ما عرفناها (زي القهبونة مثلا ً)..

اللخو مزارع ولا طـُلبة بنيان

الإقتباس أعلاه دليل على إنو الواحد ناقش معاني الكلمات الفوق ديلك ... لكن دائما ً ندي الآخرين فرصة وبعدين بنجيكم صادّين...

وبرضو ربما تختلف المسميات حسب المناطق

ده كلام سليم وهو أحد أهداف هذا البوست

مرحب بيك مرة تانية يا آخر المواني .

[آخـر المواني]

المشاركة الأصلية كتبت بواسطة شبارقة

وعليكم السلام
هلا بأخونا آخر المواني وحبابك عشرة

شاكر لك ترحيبك ..

المشاركة الأصلية كتبت بواسطة شبارقة

(ما بنحرق الفيلم طوالي)... ولكن الحاجات الما عارفنها بنقول ما عرفناها (زي القهبونة مثلا ً)..

الإقتباس أعلاه دليل على إنو الواحد ناقش معاني الكلمات الفوق ديلك ... لكن دائما ً ندي الآخرين فرصة وبعدين بنجيكم صادّين...

كان كدا يبقي كلام سليم ..

بوركت من فتى ..

[شبارقة]

المشاركة الأصلية كتبت بواسطة أشتر

اليوم البشيل أهلي ما بتعرّفو علي ...

ياخ والله ذكرتني تعابير لي زمن ما سمعتبا ... شايل مدني ... شايل الخرتوم

أنت عارف كتيرين هنا ما بكونو فهموا جملتك الفوق دي .

[فيصل سعد]

المشاركة الأصلية كتبت بواسطة شبارقة

ياخ والله ذكرتني تعابير لي زمن ما سمعتبا ... شايل مدني ... شايل الخرتوم

أنت عارف كتيرين هنا ما بكونو فهموا جملتك الفوق دي .

سلامات يا شاب و ماك طيب :

كلامك صاح و نحنا طبعا همباتة بدل "شايل البندر" بنقول "قالعين الصعيد" و ناس الاستشراق و الحداثة بقولوا كاسحين و هم اساسا طاشين و كدا زي قصة "الطشاش في بلد العمي شوف" و لا يفوت فراستك و حصافتك انه شغلانة الطشاش عندها علاقة بالذي اكل الكباب و كدا

القهبونة : الحر الشديد والذى لاتستطيع معه البقاء أو الانتظار
وهو الحر الذى يقلى الحبة و السموم اللافح ..

اها العرموص و جمعها عراميص تبع المسطرينة و المونة و القدح
و الملود كما تعلم تابع الحواشات و المنجل و الطورية و الكرك ..
اها بتعرف الصي ؟؟

الايامات دي اجارك الله عندنا برد " نخرة كلب" اها العلاقة شنو بين الاتنين ديل .. غايتو انا مخمختها و دورتها ما لقيت غير انه الكلب بركلس و برطب تحت المزيرة و دا الببرد نخرتو

سلام ..

[سمراء]

المشاركة الأصلية كتبت بواسطة فيصل سعد

الايامات دي اجارك الله عندنا برد " نخرة كلب" اها العلاقة شنو بين الاتنين ديل .. غايتو انا مخمختها و دورتها ما لقيت غير انه الكلب بركلس و برطب تحت المزيرة و دا الببرد نخرتو

سلام ..

الله يبردة علينا ، واليومين ديل نحن على النقيض منكم
يعنى قهمووووبة شديدة

[آخـر المواني]

المشاركة الأصلية كتبت بواسطة فيصل سعد

القهبونة : الحر الشديد والذى لاتستطيع معه البقاء أو الانتظار
وهو الحر الذى يقلى الحبة و السموم اللافح ..

شكرن للمعلومة .. لكن نحنا بنقول ليها الجهمورة

المشاركة الأصلية كتبت بواسطة فيصل سعد

اها بتعرف الصي ؟؟

اما دا زي الواحد لما يقول ليك قاعد في الصقيعة كدا او المرأة تقول ليك امرق تمرق في الخلاء و الصي ..! و المعنى واضح

المشاركة الأصلية كتبت بواسطة فيصل سعد

الايامات دي اجارك الله عندنا برد " نخرة كلب" اها العلاقة شنو بين الاتنين ديل .. غايتو انا مخمختها و دورتها ما لقيت غير انه الكلب بركلس و برطب تحت المزيرة و دا الببرد نخرتو

الغريب في الأمر انو الكلب بكون يلهث من العطش و لا تزال نخرته باردة

[فيصل سعد]

المشاركة الأصلية كتبت بواسطة آخـر المواني

شكرن للمعلومة .. لكن نحنا بنقول ليها الجهمورة

سلام يا كوتش و مرحبيك بيجاي
اها بتعرف الجعمورة ؟؟

[فيصل سعد]

المشاركة الأصلية كتبت بواسطة سمراء

الله يبردة علينا ، واليومين ديل نحن على النقيض منكم
يعنى قهمووووبة شديدة

عليكم بمزيدا من الداندرمة
او البوظة حسب رواية ابو اليشا و كدا !!

سلام ..

[جانيت]

اقتباس:
المشاركة الأصلية كتبت بواسطة فيصل سعد

سلام يا كوتش و مرحبيك بيجاي
اها بتعرف الجعمورة ؟؟

شنو يا بوكش انت بقيت تنجر من راسك
انا البوست ده خشيتو فترة كده بي ثقة لكن بعد نجرك ده اخير نتضاير



خبرك يا اللخو

[فيصل سعد]

المشاركة الأصلية كتبت بواسطة آخـر المواني

الغريب في الأمر انو الكلب بكون يلهث من العطش و لا تزال نخرته باردة

دا يكون كلب حر ساي يا ابن العم ..
كدي ننتظر عاصم يجي يفلفل لينا
مصطلح "كلب الحر" دا و الله
يكرم السامعين ..

[شبارقة]

المشاركة الأصلية كتبت بواسطة فيصل سعد

الايامات دي اجارك الله عندنا برد " نخرة كلب" اها العلاقة شنو بين الاتنين ديل .. غايتو انا مخمختها و دورتها ما لقيت غير انه الكلب بركلس و برطب تحت المزيرة و دا الببرد نخرتو

لغاية ما يجيكم بابكر عباس خلونا نفتي ليكم :

الكلاب ليس لها مسامات ولذلك تقوم بتنظيم درجة حرارتها (ترطيب وكده) بواسطة اللسان والأنف ... شغل ليهو علاقة بالتبخر ومن ثم التبريد ... أعتقد إنو داخل أنف الكلب توجد غدد خاصة تفرز سوائل وهي السبب في النهاية إنو النخرة تكون باردة جدا ً .. (نخرة الكلب لونا أسود ومكنة التلاجة لونا أسود ).

[فيصل سعد]

المشاركة الأصلية كتبت بواسطة جانيت

اقتباس:
المشاركة الأصلية كتبت بواسطة فيصل سعد



شنو يا بوكش انت بقيت تنجر من راسك
انا البوست ده خشيتو فترة كده بي ثقة لكن بعد نجرك ده اخير نتضاير



خبرك يا اللخو

سلام يا اللخت .. و الله الخبر شالوا النسيم !!
قلتلي الجعمورة غلبتك.. طيب بتعرفي الجاغورة
او الكسمبر او الكرنديس ..

[سمراء]

المشاركة الأصلية كتبت بواسطة فيصل سعد

عليكم بمزيدا من الداندرمة
او البوظة حسب رواية ابو اليشا و كدا !!

سلام ..

بوظة !!
والله ابو اليشا ده اعصابو البايظة
نحنا البوظة دى بنسمع بيها فى اسبيستون بس

[احمد سيداحمد]

المشاركة الأصلية كتبت بواسطة فيصل سعد

دا يكون كلب حر ساي يا ابن العم ..
كدي ننتظر عاصم يجي يفلفل لينا
مصطلح "كلب الحر" دا و الله
يكرم السامعين ..

كلاب الحر او كلاب الهجيري(عندنا في بلاد الشايقي) هي عبارة عن اشكال خيالية متحركة تشاهدها وانت جالس في الضل ايام الحر الشديد

[فيصل سعد]

المشاركة الأصلية كتبت بواسطة فجر المشارق

كلاب الحر او كلاب الهجيري(عندنا في بلاد الشايقي) هي عبارة عن اشكال خيالية متحركة تشاهدها وانت جالس في الضل ايام الحر الشديد

شكرا للمعلومة الثابتة
و حبابك الف ..