الدكتور الشاعر محمد بادي

[حافظ حسن مختار]

المشاركة الأصلية كتبت بواسطة سارة

حافظ يا جميل
لك ولبادى ولضيوفك كل المحبة
بادى رجل يستحق الاحتفاء به

ساعود كما اتفقنا
مودتى التى تعلم

تسلمي يا سرورة وفي انتظار مداخلتك على جمراً تهبو الريح كما قال شاعرنا الحبيب ود بادي في قصيجته العصماء والتي يقول مطلعها

أنا الراجيك ومستنيك فوق جمراً تهبو الريح
وفرسي الابيض الميمون على الترحال يصيح ويصيح
........

[جيجي]

ياخ انا الحزب البفتش ليه ود بادي دا زاتو بفتش ليه
وعندي فكرة اعملو على مستوى سودانيات
المعاي منو؟

[جيجي]

حزب قائم على مبدأين
- ماتألف الحرام
-وما تقصر راي الاخر
بنفس لغة دعوة الاخ في خطابه

[حافظ حسن مختار]

المشاركة الأصلية كتبت بواسطة نبراس السيد الدمرداش

سلام يا حافظ
شكرا على البوست الفخم

وصحي سمح الخمج الفوق اسيادو

وعليكم السلام يا نبراس

تسلمي كتير
وسمح العز المن اجدادو

[حافظ حسن مختار]

المشاركة الأصلية كتبت بواسطة معتصم الطاهر

اقتباس:
المشاركة الأصلية كتبت بواسطة النور يوسف محمد



و عليك السلام النور


زين ( الثقافية) يديرها أناس يحبون الثقافة و يستغلون ذلك لصالح زين و الحركة الثقافية.
نعرف ود بادى ..جدا .. لم ينزوى .. ففى غربته كان يكتب
لكنه رجع و لا أريد أن أقول ( من كهف)..
فقط ليس بطعم ود بادى.

معتصم الطاهر

تسلم يا غالي على المداخلة الجميلة

[حافظ حسن مختار]

المشاركة الأصلية كتبت بواسطة أمير الأمين

ود بادى رغم اشعار الحلمنتيش الجميلة التى ادهشنا بها يبقى
هوس اعجابه بالشاعر الكبير ود حد الزين وغربته خصماً على
شاعريته ومعرفة الناس به.

أمير الامين ... حبابك
أكاد أجزم أن غالبية الشعب السوداني مفتون بشعر اسماعين ود حد الزين

[حافظ حسن مختار]

المشاركة الأصلية كتبت بواسطة جيجي

ياخ انا الحزب البفتش ليه ود بادي دا زاتو بفتش ليه
وعندي فكرة اعملو على مستوى سودانيات
المعاي منو؟

المشاركة الأصلية كتبت بواسطة جيجي

حزب قائم على مبدأين
- ماتألف الحرام
-وما تقصر راي الاخر
بنفس لغة دعوة الاخ في خطابه

جيجي ...
سجليني في أول القائمة

[سر الختم إبراهيم نقد]

سلام حافظ وبقية المتداخلين
القصيدة التالية ألفها ود بادي في الثمانينات قال إنها في قصة امرأة من جزيرة عبدله التي ترعرع فيها، القصيدة تفيض إنسانية وهو يشجعها ويدفعها لمقاومة اليأس لرقة الحال ، والقصيدة فيها من الألفاظ الجزلة والتعابير الجميلة ما فيها حتى إنني خلته من أشعر شعراء السودان فإليها:

كابي المقنع الجرجار على موية الوجه يا حوا كابيهو
وزازي الدمعة منك بي طريف التوب أحزمي حشاك أكربيهو
خيرا ولى مو مدخور رزق الليلة داب الليلة والباكر تشابي
وما بيجيبيهو
ويا حوا الوكت مرواح وزمنك راح أمسكي ضرع شويهاتك
أحلبيهو
ليش ماك حامدة ، ليشن جاحدة والرزق العليك هطال شربتي التاني
فوق بكريهو
محمود الغني ومشكور، غيارك فردة من نسج الكمالي وتاني توب
جيرانو بنقالي
ومحمود الغني ومشكور ، وعاجك فضة من دق ود التبيد الغالي
ومحمود الغني ومشكور، نارك موقدة ماعونك ملان مو خالي
ومحمود الغني ومشكور، وأحمد قتي نور عينيك مختر فوق بطان
الحلة خوجالي
ومحمود الغني ومشكور وأبو زينوبة ناهض فيها ما هو الخملة عنقالي
عصاية الصبينة المكسية بي جلد الندف والخامة سرهيتا
وسرج المرقة سناري ومسمر فوق سراة الباني سنكيتا
وجزلاناُ مجنزر وطيه رزما من بطون الطينة مبحوتة
ولازم الفنجرة انبشقت سبع خمسات تصل
حاكت حجول المارقة من بيتا
ومتلفح كساوي الساكوبيس صوبان وظهرة تقيلة
تبرق سنو سوميتا
جيدن جيت وجيدلك حوا بي جنس الجنا القاري
وجيدلك حوا بالولد البعوم الشبكة سداري
متلك حقو لا تتلامي لا تنضامي لا تنضاري
وإنتي ولدتي للبلد البجيب راس العشاري
عدلك هادو في كوم الرجال أحمد يمين مقنع ولايا
وفي دارة البنات زينوبة فرقت منهن فرقة كتيفا من الفداية
عصاري الوردة فوق المشرع أب مسكا دفق شرق الترايا
بنات الحلة كان عقدن تياب المرقة فوق روسن وقايا
وسون قدلة الوز الرطن صباحي شاقات أب شرايا
تبين زينوبة حين تتوقى شعراً كاب بعد ما انساب على الخد المراية
عصاري الفزعة و الفازعات يجن بكر تنايا
ويات من تبقى حازمة التوب على النص القناية
تبين زينوبة حين تتحزم الخصل الشرابن صندل الناس الغنايا
شن معنى الكسوف يا حوا والحزن البجيب ليك الشماتة
وكنزك في الكنوز زينوبة وأحمد كل يوم زايدين قيراطين فوق تلاتة
نجوم السعد فوق حجرك تباسم وإنتي شارفة ترمي في ودع البخاتة
شتول الفرحة تتفتح قبالتك مادة ليك الإيد وما لاقية إلتفاتة
أقطعي الزند البقودك من فلاة الخير على بلد الدراهم
واقلبي الطوف إن كسح من جروف الخير على جزر المراهم
يا ديار حوا المراقدك في رويس عبدله وينك
يا المشاوير المشيتك يا المشارع السالكة وينك
بالي فيكي إلا درب العيشة باعد بيني بينك
يالبينة المغربية النازة من أطراف سعينك
يا السرابة الحبلى كل الناس تعاين لي جنينك
ياالسبايك الساوي شيلك ولا طويرة الجنة تسكر من مدينك
ياالسواقي النايحة زيك زي حنان أماتنا في حرقة حنينك
يا بنية طرية طامرة كنوزا بي طرف الطريحة
يا نسيمة ورشة باردة تجيني ساعة أشيلك موية الصفيحة
يا مليحة يا العقيد النام موسد راسو حبات السبيحة
يا صباح الرحمة ياالروح البتلفى حوارا تمرق من ضريحا
يا حزيمات القمح منشرة في زمن الحصاد قبل السراديب
يا رياح الشتوي هابة على مساجين المشال بالفرحة والفرج القريب
يا نزيل قمر التمام الحشو في شيلتو السناجك والارابيب
يا ولد نقرات تقيك الفي الحصاد عاقباها بعد المسرى نقرات الدليب

مرة في سودانيز قرأت لأحدهم شرح للبيت:
وفي دارة البنات زينوبة فرقت منهن فرقة كتيفا من الفداية
قال إن ذلك كناية عن طول العنق فالفرق في جمال زينوبة من قريناتها يساوي الفرق بين الحلق الذي تلبسه والكتف في الجمال فرق شاسع، وفي طول الرقبة وهو علامة من علامات الجمال أيضاً فرق شاسع.

[عادل عسوم]

المشاركة الأصلية كتبت بواسطة أمير الأمين

ثلاثة شعراء اذكرهم على منصات الشعر فى الجامعة
ود القدال
ودبادى
ومعز بخيت
معز بخيت لم يخرج ابداً من جلباب "غزل فى إمرأة"
حتى بعد مرور الكثير من السنين وبافتراض تراكم التجربة
الشعرية التى تضيف/تصقل/تجود التجربة فى عمومياتها
إلا اننى اجده يقف حتى الان فى محطته الاولى تلك.
ود بادى رغم اشعار الحلمنتيش الجميلة التى ادهشنا بها يبقى
هوس اعجابه بالشاعر الكبير ود حد الزين وغربته خصماً على
شاعريته ومعرفة الناس به.
ود القدال الوحيد الثابت/المتغير تطورا فى تجربته الشعرية
اضافة وفتحا لمنافذ جديدة اخرى.

بالله انتا عجوز كدا ياامير؟!
...
أتفق معك بأن (هوس) ود بادي بود حد الزين قد وصل مبلغا عظيما...
ولعل مآلات ذاك الهوس قد رفدتنا بالكثير الجميل المثير من شعره!
وليت ود بادي قد واصل المسير على خطى اسماعيل حسن...ليته!
وهنا قمن بي أن أثني رأي معتصم الطاهر اذ يقول:

زين ( الثقافية) يديرها أناس يحبون الثقافة و يستغلون ذلك لصالح زين و الحركة الثقافية.
نعرف ود بادى ..جدا .. لم ينزوى .. ففى غربته كان يكتب
لكنه رجع و لا أريد أن أقول ( من كهف)..
فقط ليس بطعم ود بادى.

فقد تغير (جَرسه) وشَحُبَت المفردات لديه!
فستظل (هوي ياوليد) و(مرثيته لود حد الزين) فاتحة وبقرة في مصحف شعره...
تترا معهما كل قصائده التي الّفَها عندما كان في جلباب ود حد الزين...
وقد يكون الأمر أمر(خصوبة ابداعية موقوتة بزمان ومكان) كما قال راحلنا الطيب صالح رحمه الله...

[سر الختم إبراهيم نقد]

قصيدة حوا المذكورة كنت أحفظها من عشرين سنة، وعندما حاولت إحضارها إلى هنا أردت أن أتأكد من حفظي لها فلجأت إلى منتدى البركل ووجدتها ممهورة بتوقيع المرحوم خالد الحاج عليه الرحمة والرضوان،واهتمامه يدل على جودة هذه القصيدة ورونقها، لهذا وجب التنويه.