الإخوان وسعار فقدان الكرسي....مصر الجديدة وزلازل متتابعة...حركة تمرد وصناعة النصر

[أبوبكر عباس]

بالله شوفوا المفكر الكبير النور حمد قال شنو!
بمنتدى فورل أول

أما الجانب الأهم في نظري، فهو أن تنظيم الإخوان المسلمين، كما تفضل الأستاذ عبد الماجد، والأستاذ عادل السنوسي، تنظيم فاشي لا يؤمن أصلا بالديمقراطية. وهو تنظيم غير قابل لأن يطور مفاهيميه. ولو حدث أن طور مفاهيمه فإنه سيصبح شيئا آخر لا صلة له بالفكرة الإخوانية، ولا بالتنظيم الدولي للإخوان المسلمين. الديمقراطية بالنسبة لهذا التنظيم مجرد سلم للصعود إلى الحكم، وحين يصلون يسحبون ذلك السلم حتى لا يصعد أحد آخر من العالمين. فهم يؤمنون حقيقة بأن السلطة لا ينبغي أن تكون لأحد غيرهم أبدا. فهي بالنسبة لهم "حق إلهي مقدس" يخصهم هم وحدهم، وليس أداة يتداولونها مع الآخرين في جدلية تفضي بأحوال المجتمع إلى الأفضل.

أيضا، من المهم جدا أن ألا نكون ملكيين أكثر من الملك، أو كاثوليكيين أكثر من البابا. فالمعارضة المصرية، وهي معارضة تقف ضد الأنظمة العسكرية، لم تقبل بتدخل الجيش لرسم خطة طريق وحراستها، إلا بعد أن تأكد لهم بما لا يدع مجالا للشك أن الإخوان قد شرعوا بالفعل في "أخونة الدولة". وبهذا أظهر المجتمع المدني المصري يقظة ونضجا وتماسكا وقوة. فهم قد استبقوا مسار الأحداث، وحالوا دون أن تتكرر عليهم تجربة السودان. ولقد أطلق المجتمع المدني المصري منذ الوهلة الأولى، بناء على ملاحظاته على ما شرع الإخوان في مصر القيام به: "أخونة الدولة". و"أخونة الدولة" إسم آخر لـ "التمكين" الذي قام به الترابي وتلاميذه في السودان. ولو ترك المجتمع المدني المصري - الذي أشعل الثورة وتحمل عبئها ودفع ثمنها، حين كان الإخوان المسلمين مترددين بل ذهبوا لمفاوضة العسكر - لتناقصت فرصة تعديل الوضع، بل ولتعذرت تماما، على الأقل في المدى القريب. فالإخوان سوف يعملون على ضرب كل التجمعات السياسية المناوئة لهم، ولسوف يفقرونها، ولسوف يدخلون بينها ويقسمونها إلى كيانات، ولسوف يصادرون إعلامها، ويخرسون صوتها، ويخرجونها من القوة إلى الضعف. كما سوف يتلاعبون بنظام الانتخابات ويتحكمون في وضع الدوائر ورسمها بحيث يأتون هم بالأغلبية ويبدو الأمر وكأن الديمقراطية هي التي أتت بهم. كما سيجعلون مصر طاردة للكفاءات، ولقادة الرأي، كما جرى في السودان، وحينها سوف يطول الدرب ولسوف يبكي المصريون على عهد مبارك، على سوئه الشديد.

أيضا، يجب ألا ننسى أن النازية والفاشية أتيتا للحكم عن طريق الديمقراطية. ولكن حين أسفرتاعن حقيقتهما وبان للعيان خطرهما كانت كلفة استصالهما موت 45 مليون من زهرة الشباب الأوروبي وخراب أوروبا بأكملها. كما يجب ألا ننسى أن الثورة الفرنسية أخذت زمنا طويلا جدا حتى أصبح تطبيق شعاراتها التي رفعتها ممكنا. فما يجري الآن نقلة داخل مسار ربما طال وربما قصر.
مع المودة

أها يا مفكر يا كبير، الكيزان ديل، في مجتمعاتنا نعمل معاهم شنو؟ نحظرم؟ ولّ نبيدهم؟ ولّ نسوي معاهم شنو؟
المشكلة انو الناس دايرا تثبت النظام الديمقراطي من غير أي تضحيات وصبر على الديمقراطية

أشيد بموقف دولة النرويج والإتحاد الأفريقي الرافضين لإنقلاب الجيش

[سر الختم إبراهيم نقد]

سلام لكل المتداخلين
المشكلة في مصر لم تكن "أخونة" الدولة كما يظن البعض بتفكير سطحي، المشكلة هي أن المعارضة وعلى رأسها الساقطين في انتخابات الرئاسة كانوا يخشون من نجاح محمد مرسي في قيادة الدولة فتفتقت عبقريتهم عن هذا المصطلح يخوفون به الشعب المصري وبالذات قطاع الفنانين، لم يمسك أحد على الرئيس مرسي شبهة فساد واحدة، لم يمسك عليه احد انتقام من أحد معارضيه أو قل مهينيه وهو رئيس الجمهورية ، لم يسكن في القصور كما سكن أسلافه العساكروآخرهم حسني مبارك المغرم بشرم الشيخ، ثم ماهو مصطلح الأخونة، ما كل رئيس يتبع برنامج حزبه وإذا نفذه بحذافيره لا يلومنه أحد ، فما هي هذه الأخونة المخترعة من قبل المعارضين الساقطين في مصر.
ثم إن رائحة تدخل المخابرات العالمية واضح ويزكم الأنوف الموساد والسي آي أيه هؤلاء يخشون من نجاح أي حكم إسلامي في أكبر بلد عربي وإسلامي سلوا محتشدي التحرير من أين جاءت البطاطين الجديدة والوجبات الساخنة وربما الفلوس فلوس البترول التي تدفع بها دول خليجية أعلنت مباركتها الفورية للانقلاب على الديقراطية والشرعية في مصر.
الأيام وحدها كفيلة بفضح المتورطين.

[أمين محمد سليمان]

بكة الذي باركنا حوله و الدكتور طارق كانديك ...
شكرا على المبدئية في زمن الطعمية .... مصدوم حد الدهشة !!
يبدو إنو رسالتنا التنويرية لازم تتمدد لتشمل من هم بقامة النور حمد !!

و لحدي ما نجي برواقة كان الله هون : من يبرر للعسكر ازاحة رئيس منتخب، ما يجي يكلمنا عن الديمقراطية.... لا الليلة ... لا بكرة ... لا يوم الدين !!!

[أبوبكر عباس]

المشاركة الأصلية كتبت بواسطة أمين محمد سليمان

يبدو إنو رسالتنا التنويرية لازم تتمدد لتشمل من هم بقامة النور حمد!!

أها يا بروف، نوع ناس النور ديل، بتعبونا في قصة الإستنارة دي، أكتر من ناس الجيلي، لانو لازم نغلف ليهم رسائل الإستنارة.
أهم شئ يا أمين في رسالتنا دي، الصبر ثم الصبر وبعدو الصبر!

[خالد غالي]

بكة والبروف ودكتور كانديك الرومانسيون الحالمون

مرسي رئيس شرعي جا بالانتخاب ماقلنا حاجة، لكنو وبعد فترة قصيرة اتغول على صلاحيات غير الممنوحة ليهو، حصن نفسو ضد القانون بي اصدار قوانين قاطعها من راسو ده، ما احترم القضاء وبدأ في سياسة تمكين واحلال ناس من جماعتو في الاماكن المهمة في الدولة، عزل قيادات الجيش الوطنية، ده غير طبعا الفشل الواضح جدا في ادارة الدولة
اها الكلام ده خلا الشعب يحس بالخطر ويحس انو الزول ده ماياهو زولهم العايزنو، طالبوا بي حاجات من ضنها انتخابات مبكرة، الزول ركب راسو زيو وزي اي دكتاتور وبقى يجيب سيرة الدم والعنف، وماننسى الهالة القدسية والدينية البقوا يضفوها عليهو جماعتو من شاكلة امامة الصلاة بالنبي الكريم وجبريل والخ من خزعبلات لاتخفى عليكم
اها احتقان الشارع المبالغ فيهو ده كان مؤشر اكتر من واضح انو ثمة كارثة حاتحصل خاصة بعد خطاب مرسي الاخير
الكلام ده سبب اكتر من موضوعي لتدخل الجيش لمنع حمام الدم الكان واضح انو حايحصل، قرار الجيش بالتدخل لحامية المواطنين من انهم يقتلو بعضهم ده من صميم عمل ومهام اي قوات مسلحة محترمة، لايمكن نقول انو العملوهو ده انقلاب لانهم حقيقة ما استولو على السلطة ولا عينو حاكم عسكري على البلد ولا فرضو قوانين طواريء ولا عملو اي شي اساسا غير انهم رجعو السلطة المتنازع عليها لممثل للشعب هو قاضي اعلا محكمة لغاية ماتتعمل انتخابات
العايز يقول انو الحصل ده انقلاب لازم يورينا انقلاب كيف، بس مجرد قوالة انو ده انقلاب ماكفاية لازم تقول شواهدك على انو ده انقلاب
مرسي هو اول من انقلب على الديمقراطية بتشريع القوانيين المحصنة ليهو واللهي اكبر من الصلاحيات المنحها ليهو شعبو وده كافي ياطارق كانديك لتوجيه تهمة الخيانة العظمى موش كده ؟
لماذا لم يتم الامر بالطرق الدستورية؟ لانو وببساطة مرسي عطل الطرق الدستورية الرسمية او خلاها غير فاعلة للتعبير عن رغبة الشعب، ده غير انو التظاهر السلمي حق مكفول للمواطن وما اظن في سقف للمطالبات
ماعارف اقتراحاتكم للحل شنو؟ لو قلتو انو الناس تنتظر 4 سنة وبعد داك يصوتوا ضد مرسي في الانتخابات ، تكونوا بالغتو عديل كده



تحياتي استاذة لنا صاحبة البوست

[خالد غالي]

كتب محمد المشرف وهو رجل حبابه عشرة، ولسانو مطاوعو، في سودانيز اون لاين

لا شرعية الا للشعب ..
ينتخب من يشاء .. ويعزل من يشاء .. ويرفض تزييف الارادة الشعبية وتجييرها لمصلحة جماعة أو حزب
من انتخب مرسي لم ينتخب أخونة الدولة ..
هل تعلم شيئا عن عمليات أخونة الدولة يا بدرالدين ؟!!
وإن كنت تجهلها يا صديقي فانك لا تجهل مآلاتها بالتأكيد ..
ولا الناس فاكره انو الاخوان المسلمين هم حزب العمال البريطاني ؟!!
ما كان يحدث في مصر خلال العام الفائت هو كل ما تعلمون عن أساليب وأدوات الدولة الشمولية ..
والديمقراطية ليست صندوق انتخابات ..
الديمقراطية مفاهيم ومؤسسات راسخة في الدولة ..
ومن يعتدي علي أسس وهياكل الدولة ومؤسساتها لا يكون الصندوق الانتخابي عاصما لشرعيته ..
وأول مفاهيم الديمقراطية هو التعبير عن كافة الشعب .. من ادلي بصوته الانتخابي لك او ادلى به عليك ..
وأن تحظي ب 25% من اصوات الناخبين الذين لا يعادلون اكثر من 10 % من الشعب .. ذلك كافي لممارسة الحكم .. ولكنه لا يعني مطلقا أن تتغول على دولة كاملة بشرعية الصندوق الانتخابي ..
لا يوجد مطلقا ما يعطيك شرعية لممارسة الشمولية ..
والاخوان المسلمين تغولوا على الدولة المصرية .. ومارسوا شمولية صريحة جدا ..
لذلك خرج عليهم الشعب المصري .. وفرض ارادته وشرعيته الحقيقية .. وسيفرض الاليات الديمقراطية الحقيقية من خلال ارساء قواعدها الصحيحة ومفاهيمها الحقة ..
عشان الصندوق الانتخابي ده لمن يجيب زول تاني .. ولو كان الاخوان المسلمين .. يفهموا كويس انو التفويض الانتخابي ما تفويض بممارسة الشمولية ..
هو تفويض ديمقراطي بممارسة الحكم من خلال ادوات ومفاهيم ومؤسسات الدولة الديمقراطية ..

تحياتي

[أمين محمد سليمان]

المشاركة الأصلية كتبت بواسطة بابكر عباس

أها يا بروف، نوع ناس النور ديل، بتعبونا في قصة الإستنارة دي، أكتر من ناس الجيلي، لانو لازم نغلف ليهم رسائل الإستنارة.
أهم شئ يا أمين في رسالتنا دي، الصبر ثم الصبر وبعدو الصبر!

بالمناسبة يا بكة، الجيلي رايو شنو في الحاصل ده ؟!!

[أبوبكر عباس]

المشاركة الأصلية كتبت بواسطة خالد غالي

ماعارف اقتراحاتكم للحل شنو؟ لو قلتو انو الناس تنتظر 4 سنة وبعد داك يصوتوا ضد مرسي في الانتخابات ، تكونوا بالغتو عديل كده

صاح اتوا أخدتوا حكم من المحكمة الدستورية بحل البرلمان؟ ليش ما دام اتوا متأكيد من أغلبية الشوارع دي، كان تجوا تكتسحوهو في البرلمان وتحجموهو وممكن كان تعملوا إنتخابات رئاسية مُبكرة
يا أخي عليك الله، حل البرلمان بواسطة المحكمة الدستورية موش دي قمة الديمقراطية؟

لكن والله، كلام الأخوان صاح، المحكمة الدستورية والقضاء حسناوي حسناوي!!
ورينا على ماذا إستند رئيس المحكمة الدستورية في إعترافو بدستورية ما فعله الجيش أمس؟
لو قلت لي ما إعترف، بزعل منك!

[أبوبكر عباس]

المشاركة الأصلية كتبت بواسطة أمين محمد سليمان

بالمناسبة يا بكة، الجيلي رايو شنو في الحاصل ده ؟!!

الجيلي نصف مستنير، بدينم كلهم!

[أبوبكر عباس]

المشاركة الأصلية كتبت بواسطة خالد غالي

كتب محمد المشرف وهو رجل حبابه عشرة، ولسانو مطاوعو، في سودانيز اون لاين

المشرف دا، قول ليهو كلامك دا، كلام ساكت، ممكن يخم بيهو طير ناس أونلاين ديك وقديما قيل: الطشاش طشاش!

[خالد غالي]

المشاركة الأصلية كتبت بواسطة بابكر عباس

صاح اتوا أخدتوا حكم من المحكمة الدستورية بحل البرلمان؟ ليش ما دام اتوا متأكيد من أغلبية الشوارع دي، كان تجوا تكتسحوهو في البرلمان وتحجموهو وممكن كان تعملوا إنتخابات رئاسية مُبكرة
يا أخي عليك الله، حل البرلمان بواسطة المحكمة الدستورية موش دي قمة الديمقراطية؟

لكن والله، كلام الأخوان صاح، المحكمة الدستورية والقضاء حسناوي حسناوي!!
ورينا على ماذا إستند رئيس المحكمة الدستورية في إعترافو بدستورية ما فعله الجيش أمس؟
لو قلت لي ما إعترف، بزعل منك!

يابابكر
اغلبية الشارع دي حصلت مؤخرا، يعني بعد ماخلاص الناس فهمت كويس مرسي موديهم علي وين
رئيس المحكمة وقائد الجيش الاتنين استندوا على الاغلبية الفي الشارع، وهم الاتنين اسي قاعدين ينفذوا في مايريده الشعب
لو قلت لي كيف عرفت انو ده العايزو الشعب بزعل منك!

[أبوبكر عباس]

المشاركة الأصلية كتبت بواسطة خالد غالي

رئيس المحكمة وقائد الجيش الاتنين استندوا على الاغلبية الفي الشارع،

قلت لي رئيس المحكمة بنى حكمو على تقدير للأغلبية! أها قال ليهم أرفعوا يدينكم ولّ حسبوهم ليهو ناس قوقل إرث
عليك الله يا خالد، إتّا ما حاسي بروحك تحنن؟

[خالد غالي]

المشاركة الأصلية كتبت بواسطة بابكر عباس

قلت لي رئيس المحكمة بنى حكمو على تقدير للأغلبية! أها قال ليهم أرفعوا يدينكم ولّ حسبوهم ليهو ناس قوقل إرث
عليك الله يا خالد، إتّا ما حاسي بروحك تحنن؟

والله تحنن انت ده يابابكر

اسي انت من الموضوع ده بدأ قاعد بس تتكلم كلمتين كده تفكهن هنا وهنا وتسخر وتسأل اسئلة وخلاص، ياخي حاول قول ليك كلام كده مسترسل تفهمنا بيهو وجهة نظرك دي مبنية على شنو؟ جاوب علي اسئلتنا دي، قول لينا اي حاجة كده نفهمها بدل الكلام من عل ده!
ملاسي ببقى ليك شنو انت؟

[أمير الأمين]

المشاركة الأصلية كتبت بواسطة خالد غالي

ملاسي ببقى ليك شنو انت؟

ملاسى محسوب مع الطير
زولك دا شوف ليهو قرابة اكثر
استنارة

[كيشو]

أختنا العزيزة لنا كانت ما بتطيق المصريين
فجأة كدا اتكيفت من تلاتين مليون مصري في ليلة واحدة، وفي شنو؟ في اعتدائهم السافر على الديمقراطية
ياخي والله السياسة دي عجيبة خلاص