اغاني .. واغاني

[زول الله]

تثنية على كلام الرشيد الفوق دا
-

الرشيد خلينا نتكلم بصراحة ووضوح عشان المجال هابشني
كتير من الموهوبين بضيعو روحهم بي يدهم
كثير منهم اصدقاء حميمين -معتز واحد منهم- وبعضهم معارف وزملاء

صباحي زول فنان وموهوب بدأ جيداً ونتمنى ان يرجع الى الصفر ليواصل من هناك.

وقفنا في دفن رضيع الفنان عمارالسنوسي وكان مساء نفس اليوم مرتبط بحفل زواج
أصر على إحياءه وذهبنا معه فإفتتح الحفل بإغنيتين وغطينا عنه الباقي
اذن القصة لادخل لها بالظروف ولا الضغوط

تكلفة "الكيف" بتكلفهم حاجات تانية أولها جماليات الاداء وتطلعهم من الشبكة
وتلقى الواحد ماقادر يتلم على نفسه وفي توتر دائم وأظن دا واضح على صباحي
وقدرما تنصح احدهم تجده يبتعد عن نصحك بفعل الشلة المحيطة بيهو
النتيجة واضحة ولايعرفها الا من وصل منهم الى نقطة ال لاعودة
والضحايا معجبيهم وقبلهم أسرهم وابنائهم






اقول قولي هذا واستغفر الله لي.................

[جيجي]

المشاركة الأصلية كتبت بواسطة عبدالله وداعه الامين

http://www.youtube.com/watch?v=pOcmKQfqB9Q

غايتو ياعبدالله فهيمة كرهتنا في العديلة زاتها
العديلة دي مااعندها غير طريقة واحدة يغنوها بيها

وعلى بالطلاق عمك كانديك دا دخلوا الكبر ساكت

---
صحي ياقيقا هي فهيمة دي ما لها بقت تخفف في دمها كدا لحدوت ما صوتها بقى زي صوت السخلة

[قيقراوي]

فاطمة: صوت صافي وأداء واثق مصحوب بابتسامة دائمة ومحبّبة.

فاطمة عمر نجمة (أغاني وأغاني).. وصاحبة (فرحانة بيك أنا يا جناي)


(35) ثانية كانت بمثابة النقلة الكبيرة لي وهي قدمت صوتي للناس


(35) ثانية فقط كانت كافية لأن تثبت موهبتها العالية.. (35) ثانية فقط كانت كافية لأن تحمل المطربة الشابة "فاطمة عمر" صوتها عبر بوابة الإعلان الخلفية إلى كل بيوت السودان.. (35) ثانية فقط نقلت فيها "فاطمة" بصوت يضوع شجناً و(حنية) أمنيات أم لولدها عبر الشعار الإعلاني (فرحانة بيك أنا يا جناي) الذي تفوق على عدد كبير من الأعمال الغنائية التي بذل فيها كثير من الجهد.. (35) ثانية فقط نقلت "فاطمة" من حيز مطربة لا يعرفها أحد إلى مطربة تبكي كل أمهات السودان مع شجنها حين تقول: (والليلة يا سيد الرجال فرحت أمك وحلتك).
انضمت "فاطمة عمر" إلى مجموعة (أغاني وأغاني) لهذا الموسم ضمن (جوقة) مطربيه، ورددت في اليوم الأول أغنية (من أجل حبي)، ووقتها قدمت نفسها للناس (صوت وصورة) بعد أن كان يصلهم منها (صوتها فقط).. (رياحين) التقت بـ"فاطمة" وأدارت معها حواراً صغيراً.
{ في البداية (رمضان كريم).. ومن هي "فاطمة عمر"؟
- الله أكرم، وتصوموا وتفطروا على خير.. أنا من مواليد أم درمان يوليو 1988 (أكتوبر)، ودرست جامعة الخرطوم قسم الإعلام.. أعمل الآن في شركة إعلانات.
{ ظهرتِ من وين؟
- ظهرت من خلال إعلان (فرحانة بيك) الذي قدم صوتي للناس، وقبل مشاركتي في (أغاني وأغاني) شاركت في مهرجان (أتنينا) ببورتسودان.
{ الشعار الإعلاني (35) ثانية غيّرت مسار حياتك؟
- فعلاً (35) ثانية كانت بمثابة النقلة الكبيرة لي وهي قدمت صوتي للناس. وبعض أقربائي وأصدقائي مذهولون من أنني صاحبة إعلان (فرحانة بيك) ولا يعرفون أنني من نفذته، والإعلان أحدث لي (خلعة) على مستوى تقبله من الناس.
{ في أول ظهور لك في (أغاني وأغاني) قدمت أغنية الفنان "عثمان حسين" بصورة جيدة؟
- أصلاً أنا بحب استمع إلى الأغاني القديمة.. بحب (قصتنا) وكثير من الأغاني القديمة وأغنية (من أجل حبي) أحببتها منذ أيام الثانوي بس ما كنت حافظة منها ولا كلمة، وكنت أستمع لها في (حافلة الترحيل)، وفي السنة الثانية انتقلت إلى مدرسة أخرى وبحثت عنها مجدداً وبديت بعد كده أفهم الكلمات.. وفي بعض الجمل في الأغنية كنت بحس إنو أنا الكاتباها زي (اصلي بعدك ما هويت).
{ ألم تتخوفي من الغناء لـ"عثمان حسين"؟
- لا.. لأني كنت بحب الأغنية وبحسها، ولو فرضت عليّ أغنية غيرها لم أكن سأجيدها.
{ هل (الشعار الإعلاني) أم (أغاني وأغاني) هو ما ساهم في تقديمك للناس؟
- والله الشعار الإعلانى هو اللي قدمني للناس.. وقصة الإعلان ده، أنا كنت قاعدة مع مديري في الشركة الإعلانية وطلبت منو شعر إعلاني بمقاييس محددة، إنو يكون بداية أغنية ويظهر في كل التلفزيونات السودانية وتكون كلماتو سودانية وتخاطب الأمهات.. وتفاجأت بعد ذلك بالنجاح الساحق للشعار الإعلاني.. حتى أن أحد أصدقائي المقيمين في القاهرة اتصل بي ذات ليلة وكان موجوداً في حفل زفاف لعروسين مصريين وأخبرني أن الأسرة المصرية زفت عرسانها بـ(فرحانة بيك أنا يا جناي).
{ الدخول من بوابة الإعلانات ألا يمثل مشكلة؟
- لا ليست مشكلة، هو نوع من الظهور.. في ناس بيظهروا في (نجوم الغد) أو مشاركة في مسرح.. وهو جزء من وظيفتي.
{ كيف تعاملت مع الشهرة التي أتت لك فجأة؟
- حتى الآن ليست بالأمر المخيف، وفي ناس في الشارع بينادوني (دي هي.. لا ما هي).. وحتى الآن الفئة التي تستمع لي هي فئة كبار السن.
{ مشاريعك الفنية؟
- لسة ما في حاجة واضحة.. وربنا يوفق.
{ بتعملي شنو في رمضان؟
- بروفات أغاني جديدة.. وعايزة أطلع أشياء جميلة لأنو الناس ما بتتوقع أظهر في شكل جديد أقل من (فرحانة بيك).. الوصول للقمة ساهل لكن المحافظة عليه صعبة.
{ أصابك الغرور؟
- لا، لأنو أعظم الناس كانوا بسيطين.

صحيفة المجهر السياسي



-------

الشكر لحبيبنا الفنان ابراهيم عبد الحليم

[الرشيد اسماعيل محمود]

المشاركة الأصلية كتبت بواسطة زول الله

تكلفة "الكيف" بتكلفهم حاجات تانية أولها جماليات الاداء وتطلعهم من الشبكة
وتلقى الواحد ماقادر يتلم على نفسه وفي توتر دائم وأظن دا واضح على صباحي

سلام يا زول الله،،
الارتباك البادي علي صباحي أكيد ما لأسباب فنية، لأنّ صباحي لولا أنه فنان يمتلك خامة صوتية مميّزة، وطريقة أداء مختلفة عن الآخرين، لم يكن ليجد له موطئ قدم في الساحة، في زمن تواجد فيه محمود عبد العزيز، فرفور ونادر!
وكون فنان شاب يظهر في فترة كان فيها الحوت في كامل سطوته وسيطرته علي الساحة الفنية الشبابية ويستطيع تكوين قاعدة من الجمهور الخاص، يبقي دليل علي تميّز تجربته الفنية بدون شك.
الفنان عشان يعمل قاعدة جماهيرية، يلزم أن يمتلك الأدوات الفنية من صوت وأداء وأغنيات وخلافه، اتفقنا أو اختلفنا في شكلها وقوتها ونوعها، ما دام في غيرنا اقتنعوا بيها وأدّوها أضانهم، من المجحف إنو نقول الناس ديل ما بفهموا في الفن، لأنّ التقبّل والتفاعل مع تجربة فنية زي الغنا، رهين للذائقة، التي لا يصح أن نقول للآخرين إن لم نتفق فيها معهم (ما عندكم ذوق بتعريفة)!
صباحي له معجبين لمِستْ فيهم طريقته في الغناء وتر التقبُّل فتفاعلوا مع تجربته بشكل كبير، وهذا بالضرورة دليل علي نجاح الفنان ومقدرته علي كسب قاعدة عريضة من المعجبين، وفيهم المحبين أيضاً.
نثبِّت إنو صباحي فنان له طريقته الخاصّة (غض النظر عن اتفاقنا عليها) وله جمهوره الخاص، بعد داك ممكن نختلف أو نتفق علي أدائه الباهت الذي غلب عليه التوتُّر والارتباك في برنامج أغاني وأغاني، لأنو من الظلم أن نحكم بالفشل علي تجربة فنية ليها أكتر من 13 سنة عبر 30 حلقة من برنامج زمنو نصف ساعة يومياً (بعد خصم زمن إعلان دقيق زادنا وشركة النيل للأعشاب إلخ)، وإلّا لكانت تجربة محمود عبد العزيز في الموسم قبل الفات من أغاني وأغاني استناداً علي ظهوره الباهت فيها، فاشلة تماماً (كل التجربة أعني).
عن نفسي:
من أروع اشرطة الكاسيت في الألفية، ألبوم (أحبك أكتر) للفنان صباحي، وتحديداً الاغنية دي - بالنسبة لي- ، غنّاها أفضل من سيف الجامعة وفيها شغل فني وتجويد وتطريب منقطع النظير. أتمني إنو الناس تسمعها بصوت صباحي.
معتز صباحي في نسخة أغاني وأغاني، ظهر مرتبك ومتوتِّر بشكل لا يحسد عليه، كأنه يغني للمرّة الأولي، رغم محاولات السر قدور الدؤوبة لتشجيعه ورفع معنوياته من خلال الاشادات القاعد يخصّو بيها بشكل مبالغ فيه، أضف لكدا، نظرات التعاطف من الفنانين الحضور اللي قاعدة توتِّرو زيادة في ظنِّي.

لكن كلامك عن (الكيف) وصّل لي الفكرة تماماً، ودي سلبية لم يستطع تفاديها حتي محمود عبد العزيز بعظمة تجربته النادرة.

شكراً يا عمّك (شايف في عضو جديد بالإسم دا، يبقي تاني شكلنا حنتقشف في استخدام اللقب دا)

[الرشيد اسماعيل محمود]

المشاركة الأصلية كتبت بواسطة قيقراوي

فاطمة عمر نجمة (أغاني وأغاني).. وصاحبة (فرحانة بيك أنا يا جناي)

يا مدير والله دي معلومة جديدة!!
فاطمة عمر زولة غنّاية والبرنامج حيختصر عليها مشوار طويل بدون شك!
أغنية عثمان حسين اتقطّعت فيها بالرغم من إنها تجربتها الاولي في التلفزيون وقدّام فنانين ليهم جمهورهم وخبراتهم، لكنها أدّتها بشكل مبالغ فيه، ولو ملاحظ الترويج بتاع البرنامج كانت فيهو أساسية بمقطع (اصلي بعدك ما هويت)، والانسان دايماً لو عايز يروِّج لحاجاتو، بختار أجمل ما عندو!

لمّا خالد غالي بقول البت السمحة ما دايرين يدوها فرصة تغني، كنت فاكرو قاصد فاطمة عمر دي، لكن بعد ما الليلة عرفت قصدو، شكلي حأختلف مع رؤيتو وأتفق مع رؤية أستاذنا أحمد زين.

[قيقراوي]

المشاركة الأصلية كتبت بواسطة الرشيد اسماعيل محمود

لمّا خالد غالي بقول البت السمحة ما دايرين يدوها فرصة تغني، كنت فاكرو قاصد فاطمة عمر دي، لكن بعد ما الليلة عرفت قصدو، شكلي حأختلف مع رؤيتو وأتفق مع رؤية أستاذنا أحمد زين.

حسن ليك تختلف معاهم الجوز وتتفق معاي انا دا على (فاطمة السمحة) دي













--------

المافي شنو!؟

انا شفتها باضاني في حنة الشمس المشرقة .. من الموسم الفات
واتذكر عملنا عنها بوست عديل بهناك


للامانة صورتا في اضاني اجمل بي كتير ..
لكن شوف العين سمعني حسها الداخلي العميق في تعابيرا واستغراقها في احساس الاغنيات

خالد دا وهم ساي .. ام ام دي اسي خلااااس يعني!؟

الزول دا عندو عمى اضان ول شنو!؟

[خالد غالي]

دقيقة بالله يا الرشيد وقيقراوي ماتخموني ساي

فاطمة عمر انا ماعندي عليها اعتراض، رغم انو اعلان الحنة ماعجبني، وكنت متخيلها مرة كبيرة ولابسة توب اخدر وطرحة برتقالية، اسي لمن لقيتها صغنتوتة كده في حاجة جواي اتكسرت ووقعت ماعارفها شنو
بشكل عام انا زي ماقلت فوق مابسمع الا البنات، فاطمة غناية وصوتها جميل وشجي واي حاجة، لكن البنت السمحة وكتين تبتسم ... الدنيا ياناس تنقسم

[احمد زين]

المشاركة الأصلية كتبت بواسطة الرشيد اسماعيل محمود

يا مدير والله دي معلومة جديدة!!
فاطمة عمر زولة غنّاية والبرنامج حيختصر عليها مشوار طويل بدون شك!

شكلي حأختلف مع رؤيتو وأتفق مع رؤية أستاذنا أحمد زين.

بمناسبة رؤية استاذنا احمد زين والفنانة فاطمة عمر
اول مرة استمع لفاطمة عمر بعد ال 35 ثانية بتاعة الاعلان الشهيرة ولزمن كافي
كان في ليلة ذكرى الراحل حسن عطية بالمسرح القومي وكان بمصاحبة مجموعة من الفنانيين الجيدين مثل عاصم البنا وابوبكر سيد احمد
فاطمة اليوم داك خذلتني خذلان كبير هي صوت جميل نعم لكنها كانت ما حافظة وزمنها فارق واربكت الفرقة الموسيقية والمايسترو احمد المك
عشان كده انا هنا ما نتظر منها الكتير ويبدو انو اغنية عثمان حسين هي فرمالتها والله اعلم

[الرشيد اسماعيل محمود]

المشاركة الأصلية كتبت بواسطة قيقراوي

لكن شوف العين سمعني حسها الداخلي العميق في تعابيرا واستغراقها في احساس الاغنيات

المشاركة الأصلية كتبت بواسطة احمد زين

عشان كده انا هنا ما نتظر منها الكتير ويبدو انو اغنية عثمان حسين هي فرمالتها والله اعلم

سلام يا دكتور،،
حتّة الفرمالة دي ما أعتقد، لأنو حتي الآن فاطمة غنّت أغنية واحدة كاملة ومقطع من قائد الاسطول (فرفور أصرّ يركِّب فيهو عودو) وأبدعت في الاتنين بأداء واثق وصوت واضح وفيهو تطريب عالي ومحبّب، وبتأدِّي بإحساس عميق واستغراق زي ما قال قيقا.
صوتها فسيح وعندها مقدرة أداء مختلف الاغنيات بمقدرتها التطريبية دي، لكن بتخيّل لي الاغاني الرايقة ذات الايقاع المقعّد بتتماشي مع طريقتها واسلوبها وحتي احساسها.
الفرمالات دي حقت العاطلين يا دكتور، صوت زي صوت فاطمة دا قدر ما تقول أدهشك، تلقاهو داسِّي ليك دهشات تانية.

[الرشيد اسماعيل محمود]

المشاركة الأصلية كتبت بواسطة خالد غالي

اسي لمن لقيتها صغنتوتة كده في حاجة جواي اتكسرت ووقعت ماعارفها شنو

ما دام هي اتكسرت الأوّل حتي وقعت، أكيد ما حتكون عارفها شنو!

طبعا اعجابك بالزولة البسّامة (حسب وصفك) دي محيّرني، لكن طبعاً مسألة الاعجاب دي غايتو عجيبة خلاص وبتدخل فيها عوامل كتيرة كدا من ضمنها الغربة طبعاً. أمس لمّا عرفت حنكك، اتذكرت النكتة بتاعت هيثم الكانوا كايسين ليهو!

[خالد غالي]

هوي يا الرشيد هوي ماتجدف لينا في المعتقدات بتاعتنا

بعدين انا مغترب في دبي انت قايلني في السعودية ولاشنو!






هيثم الكايسين ليهو قال شنو

[الرشيد اسماعيل محمود]

المشاركة الأصلية كتبت بواسطة خالد غالي

هيثم الكايسين ليهو قال شنو

قالوا كايسين لهيثم، قال يكوس معاهم وهو ما شاف هيثم، بس كايس بدلالة الاسم، في النهاية لقوهو، لمّا جا لقاهو زول دشن كدا، قال ليهم بالله هو دا هيثم؟!!، ياخي دا في كواستي دي لاقيتو زي عشرة مرّات.!!

زولتك الباكي فيها دي سمحة، لكن ما قدر السكلبة حقتك (ولا أصلو مشهادك في البكا كدا؟؟)، عندك مداخلة بكّاية كدا لمّا قريتها قلت والله غالي دا بكون قاصد زولة خلف الكواليس شايفها براهو، ولّا كمان متابع البرنامج من شاشة كبيرة شديد بشوف مساحة أكبر مننا. ياخي الحمد لله الطلعنا بنشاهد في حاجة واحدة، واذواقنا بس هي المختلفة.

[خالد غالي]

والله ياحبيبنا انا بس في فمي ماء، ماقادر اتكلم بي راحتي والا كان وريتكم انا مالي
بس الله غالب

[قيقراوي]

كلٌ يغني على ليلاه

الحاج سرور .. الشيخ قريب الله


رائع يا سني


قال البرعي اليمني:

اغالط عن سلمى بسعدى تنصلاً وما قصدي سعاد ولا لبنى ..
ما بغيتي الا قباءً و قبابها













-------

يا غالي ما سمعت بنكتة هيثم دي انتا ..

وانت الصادق يا رشيدنا بقت عليو نكتة السوداني واللبناني النسوانم راحن ..
لمن اللبناني وصف مرتو ..وسأل السوداني مرتك كيف شكلها؟
قال ليو كدي مرتي ارخيها اسي .. ارح نفتش مرتك دي!

البسمع بالمعيدي!!

[خالد غالي]

قال ليو كدي مرتي ارخيها اسي .. ارح نفتش مرتك دي!