جو سوي أباس ... لعنة عباس تطاردني...

[ملاذ حسين خوجلي]

salut monsiuer Abas

عارف يا استاذ خالد فى الثانوي نقلوني من مدرسة نظامية جدا - منهجها منهج شريعه كأننا فى خلوة ما بنعرف العلوم الا عن طريق الايات والاحاديث - المهم انتقلت لمدرسة فى العمارات بنات سمحات جدا اسلوب اللبس مختلف لغة الكلام
( معطشه ) وانا يا زول جايه داقشه قروية جدا مرتبه جدا حتى فى السلوك والحديث مع الاستاذ العين ما بتترفع الصوت منخفض وما الى ذلك .. المهم اكتشفت انه بدرسوهم اللغة الفرنسية من السنة الاولى وانا جاية فى السنة التانية فكانت بالنسبة لي عبئ اضافي حتى اللغة الانجليزية الدرسناها وقتها يا الله .. فكان بروفيسور زكريا أحد المساهمين فى منهج اللغة الفرنسية للمرحلة الثانوية - متعه الله بالصحة والعافية- مُصر جدا انه لمن يجي وقت القرايه بقول malaz , lisez le texte ملاذ اقري .. وانا مسطحه تماما المهم فكنت بقرأ سريع جدا وباكل الكلام واعمل فيها البت خطيرة عشان اخلص فكان بعاين ليا بقعر عينه كدة واسكت مسافه ويقول لي ( اقعدي ورجغتي سمممممممح ) وهنا الفصل بكون اخر ضحك وسخرية لانه ولا كلمة من الانا قلتها بتكون صحيحة .

سبحان الله لمن جيت ادخل الجامعه نسبتي كانت ما بتدخلني اقتصاد كرغبه قمت دخلت اداب وفى اداب لغه فرنسية .. فلقيت بروفيسور زكريا وهو بضحك علي فى المعاينه وانا متتعضة واقول ليا ( اها .. اقعدي سوي لي ورجغتك الزمااااان ديك ) .. وبعداك انجبرت وبقيت انجعص فى الواطه واكتب نطق الكلمات بالعربي عشان اباسي فى الامتحان .. هل تتخيل اني عشقت اللغة الفرنسية واتفوقت فيها لكن اول ما جاتني فرصة تصعيد لكلية اقتصاد جريت جري وخليتها .. بس واصلت فى المركز الفرنسي وفاءاً للبروف لانه مرة قال ليا عبارة ( يا ملاذ اللسان الفصيح .. ما بتغلبه اللغة بس انتى امسكي طرف الخيط ( بقصد الفرنسي) ) ..

فيا سيدي نحن تحت الخدمة لن تستعصي عليك هذه الخلاسية

bon courage .. الله يقويك