إيه يعني .. لو بعنا الرغيف ...؟
[poem=font="Simplified Arabic,6,black,normal,normal" bkcolor="burlywood" bkimage="backgrounds/1.gif" border="solid,7,darkred" type=3 line=0 align=center use=ex num="0,black"]
تسألني كيف ..؟=
والكلمة زي حجراً بلعتو وفي حشايا عمل نزيف=
والنطع مفروش يا ظريف ومسلول أمام عينيَّا سيف=
ولا فوق روحاً تحتمل حر الهجير والدنيا صيف=
لا فوقي حيل يسندني شان أقدر أقيف=
ما إنت عارف ردي حيكون شكلو كيف=
ما نحنا في زمناً بقت فوقو الحقيقة شبح مخيف=
زمناً بينضح بالأنا وما بقبل الزول الشفيف=
حتكون متل قابض الجمر لو كان بقيت توبك عفيف=
حتكون رسول طردوهو قومو وصدُّوا من وشُّو الشريف=
ما نحنا في زمناً فصولو إتبدلت جافا الخريف=
والمفردات إتحرفت كل المعاني إتجوفت قول يا لطيف=
والليل يزح زي الجبال وضو الصباح شايفنو زيف=
والناس تقوم من الصباح أحلامها يومها تقضي كيف=
يوماتي يلتحفوا السماء والقعدة بى فوق الرصيف=
الناس تقوم ضهبانة تب عميانة تب ماب تعمى كيف=
وريني كيف الشوف يكون والقافلة حاديها الكفيف=
وريني كيف الهم يكون وأنا ماشي مكسور الكتيف=
وريني وين العزَّة يوم تتضارى لو كان جاكا ضيف=
حتى المطر لو مرة صبت بس تصب فوق الحريف=
تتكبا بى فوق القصور السمحة ماب تغشى الصريف=
والنسمة كان هبَّت تهب تتهادى في الخد الوريف=
والريح كمان لو عصفرت تعصر تنوح فوق الضعيف=
شن ليهو عاد في الدنيا غير الفاقة والليل السخيف=
خليني ما تسألني تاني وإنت عارف ردِّي كيف=
ما تهيِّج الوجع البينحر جوَّا إحساسي الرهيف=
ما تفتِّح الطاقات عليّ وتزيد على قلبي الرفيف=
ما نحنا بعنا زمان كتير إيه يعني لو بعنا الرغيف=
....................................[/poem]
|
