*** مصطلحات عامّية سودانية ***

[أشتر]

المشاركة الأصلية كتبت بواسطة شبارقة

سلامات ..
هاكم المصطلحات دي ونشوف شطارتكم في معرفتها أو تفسيرها لغاية ما نرجع ليكم :

الغُشغُش - العدَار - الكَروَرِية - الكَدوبَه - الدَفِيس - التَرتوس - الموليته

كلامك دا باصات ساااااااي
غايتو الا (الموليتة)
والجابرنا شنو على المر غير الأمرّ منو ...
وكان ما متنا شقينا المقابر


هي نبتة برية مرة جدا .. وبرغم كدا بياكلوها ... ليه ما عارف !!!!

[أشتر]

المشاركة الأصلية كتبت بواسطة Babiker Mukhayer

الهباب
الهبوب
الهبابايا
الهبابا
سجم
سجمان
سيجيمان

رماد
رمدان

سمح شرط
شرط للواطة

قاعد ساكت
بيتكلم ساكت

ماشي جري
قاعد يمشي

الهبوب ... الهوا
الهبابايا ... قصدك الهملايا او البابايا
الهبابا ... الزول المقبوض اربعطاشر
سجم ... سجم الخشم وسندباد في بلاد السجم والرماد .. الرماد الذي كال حمّاد ومن قبله ناس كتيرة
سجم وسجمان وسيجيمان ..... ياها فعل وفعلان وفيعيلان دي اسأل منها فلان او علّان .. كان ما جابو ليك العلة

رماد رمدان ... دا تابع لى حمّاد

سمح شرط
شرط للواطة ... هي شرط للأرض ... دي الحاجة البتخليك تقعد وتخت يديك في راسك

قاعد ساكت .... ما فيها حاجة .. زي البسجل دخول المنتدى وما يشارك ... ادب وكدا
بيتكلم ساكت ... يعني كان سكت عندي اخير ليهو

ماشي جري ... دي ما سمعنا الا تكون زيادة مشاركة ساي
قاعد يمشي ... صيغة مبالغة

[أشتر]

المشاركة الأصلية كتبت بواسطة فتحي مسعد حنفي

أما العدار فهو قش القمح

العدار هو الذرة الرفيعة (العيش) لكن بدون قندول (يعني ذرة كاذبة) ويستخدم في اغلب الأحوال علف فقط ...

[شبارقة]

المشاركة الأصلية كتبت بواسطة محمد أبوعاقلة

غايتو الا (الموليتة)

وهي نبتة برية مرة جدا .. وبرغم كدا بياكلوها ... ليه ما عارف !!!!

المشاركة الأصلية كتبت بواسطة محمد أبوعاقلة

العدار هو الذرة الرفيعة (العيش) لكن بدون قندول (يعني ذرة كاذبة) ويستخدم في اغلب الأحوال علف فقط ...

الإجابات صحيحية والتقدم ملحوظ ...أنا كنت قايلك حنكوش

[أشتر]

المشاركة الأصلية كتبت بواسطة شبارقة

الإجابات صحيحية والتقدم ملحوظ ...أنا كنت قايلك حنكوش

حنكوش دي بالحاء !!!
قلنا ما متنا لكن شقيناها

ذكرتني استاذ عمر ..
اللخو عندو ميول تدريسية

[فيصل سعد]

المشاركة الأصلية كتبت بواسطة محمد أبوعاقلة

حنكوش دي بالحاء !!!
قلنا ما متنا لكن شقيناها

ذكرتني استاذ عمر ..
اللخو عندو ميول تدريسية

لا عندو ميول بوليسية ، بالمناسبة شبارقة اشترى البوست دا و دفع كاش و استلم اوراقه سليمة فما تلاوز ليو و ترازيو كتير يا شوال

[أشتر]

المشاركة الأصلية كتبت بواسطة فيصل سعد

لا عندو ميول بوليسية ، بالمناسبة شبارقة اشترى البوست دا و دفع كاش و استلم اوراقه سليمة فما تلاوز ليو و ترازيو كتير يا شوال

شايف عندو نوايا استعمارية وجايب ليك مرتزقة هنا ... لكن اشتراو دي ما سمعنا بيها
الا يكون بى تحت تحت ... وشغل الطرابيز دا ما بخارج معانا
بيعت شنو البدون شهود وتواقيع !!!
لكن بالجد ... إستاهلو
كتبت اسمك في باب الشارع وعصرت ضنبك ...
وكت ما قادرين على الشغلانة دي بتنططو مالكم

[همس الشوق]

والله انا زمني دا كله قايله روحي مرجع في المفردات السودانية

لكن لقيت نفسي ............... ببالغ

[بابكر مخير]

المشاركة الأصلية كتبت بواسطة حلم الاماسي

والله انا زمني دا كله قايله روحي مرجع في المفردات السودانية

لكن لقيت نفسي ............... ببالغ

أول حاجة
مرحب بيك
تاني حاجة
قبل ما تردي ولا تاخدي في الموضوع أي حاجة، اسألي فتحي سعد عن هضربت عمو بابكر دي
وإستعيني بصديق إسمو أبوعاقلة، بس أبعدي من حاجة إسمها فتحي مسعد، بجيب وجع الراس ورأفت ميلاد بيلخوت المزاج.

قلتي ليا كيف مرجع في المفردات السودانية؟؟؟

ياها كلمة برييييييدو
لي علمك هي أصل الكلمة برييييدو، يعني أربعة يايات بالعدد وبس
مرحب بيك تاني

[فيصل سعد]

المشاركة الأصلية كتبت بواسطة محمد أبوعاقلة

شايف عندو نوايا استعمارية وجايب ليك مرتزقة هنا ... لكن اشتراو دي ما سمعنا بيها
الا يكون بى تحت تحت ... وشغل الطرابيز دا ما بخارج معانا
بيعت شنو البدون شهود وتواقيع !!!
لكن بالجد ... إستاهلو
كتبت اسمك في باب الشارع وعصرت ضنبك ...
وكت ما قادرين على الشغلانة دي بتنططو مالكم

اعتمدناك شاهد في البيعة و انت وقعت اثناء ما كنت مخدر و مبنج و سارح في غناء ود النصري و افيونه داك دقائق بعد ما لطشت مداخلتي النية ديك وقع ليك يا الحبيب

[فيصل سعد]

المشاركة الأصلية كتبت بواسطة حلم الاماسي

والله انا زمني دا كله قايله روحي مرجع في المفردات السودانية

لكن لقيت نفسي ............... ببالغ

سلامات يا زولة و يشرفني ان ارحب بك بعد عمنا بابكر عمدتنا و شيخ الديوان و ابونا و كبيرنا
كدي ادينا عينة بتبالغي كيف في المفردات العامية؟

[شبارقة]

المشاركة الأصلية كتبت بواسطة حلم الاماسي

والله انا زمني دا كله قايله روحي مرجع في المفردات السودانية

لكن لقيت نفسي ............... ببالغ

مرحب بيك يا حلم الأماسي .. وورينا مرجعيتك دي ..وهاكم إلى أن ألقاكم:

1- أم بُقبُق 2- الحَويه 3- الكرّاب 4- الكَرو 5- التِعل 6 - البربور 7- الإنقايه

8- الوقايه 9- التُقابه 10- الورتابه

[أشتر]

المشاركة الأصلية كتبت بواسطة حلم الاماسي

والله انا زمني دا كله قايله روحي مرجع في المفردات السودانية

لكن لقيت نفسي ............... ببالغ

قدر ما حاولت اتمها غلبني ...

غايتو انا لقيت نفسي طيره ساي ... انتي لقيتي نفسك شنو ؟

[أشتر]

المشاركة الأصلية كتبت بواسطة Babiker Mukhayer

اسألي فتحي سعد عن هضربت عمو بابكر دي

معانا واحد هنا اسمو فتحي سعد ؟ ويا عمو بابكر (دي) ما طريقة ...

المشاركة الأصلية كتبت بواسطة Babiker Mukhayer

وإستعيني بصديق إسمو أبوعاقلة.

لا ... دي طريقة تمااااااااام التماااااام

المشاركة الأصلية كتبت بواسطة Babiker Mukhayer

بس أبعدي من حاجة إسمها فتحي مسعد، بجيب وجع الراس ورأفت ميلاد بيلخوت المزاج.

النصيحة دي ما تشتغلي بيها ...

بيلخوت دي جبتها من وين ولا فيها خطأ إملائي

[أشتر]

المشاركة الأصلية كتبت بواسطة فيصل سعد

اعتمدناك شاهد في البيعة و انت وقعت اثناء ما كنت مخدر و مبنج و سارح في غناء ود النصري و افيونه داك دقائق بعد ما لطشت مداخلتي النية ديك وقع ليك يا الحبيب

لقيتك لسه في الخاطر ...
الاغنية فيها كلمتين الا يجي عكود يشرحا

رحراح : من السياق اعتقد واضحة لكن بالضبط ما عارفه (تكون المساسقة) ؟
الفجّاج : .........................*
لدايات :
الرمّاي :

ونضاريك في العيون تظهر**